Shkencëtarë planetarë kanë llogaritur se në galaktikën tonë ka qindra miliarda planetë si Toka që mund të mbështesin jetën.

Studimi i ri, nga shkencëtarë të Universitetit Kombëtar të Australisë (ANU), arriti në këtë përfundim duke aplikuar një ide 200-vjeçare për vëzhgimin e mijëra e ekso-planeteve me anë të teleskopit Kepler.

Shkencëtarët vunë re se çdo yll standard ka dy planete në të ashtuquajturën ‘zonën e artë’, që është distanca nga ylli, ku uji mund të ekzistojë. Kjo bën të mendohet se komponentet për jetën, dhe mjediset e banueshme janë të shumta.

Megjithatë, universi nuk është mbushur me qenie inteligjente që mund të ndërtojnë teleskopë, radio dhe anije të hapësirë, përndryshe, do kishim parë apo dëgjuar prej tyre.

Kjo tregon se ka disa vështirësi për shfaqjen e jetës, të cilat njeriu ende nuk i kupton, apo qytetërimet zhvillohen, por pastaj vetë-shkatërrohen.