Florida ştatının cənubunda yerləşən Hallandale Beach şəhərində oktyabrın 18-i Azərbaycanın Müstəqilliyi günü elan edilib. Şəhərin meri Coy Kuper Hanandale Beach şəhərində yaşayan azərbyacanlılarla görüşündə oktyabrın 18-ni Azərbaycanın Müstəqilliyi günü elan edilməsi hadqa imzaladığı rəsmi sənədi açıqlayıb. Rəsmilər bu addımı Hallandale Beach şəhərində yaşayan təxminən 150 amerikalı azərbaycanlının müraciətini nəzərə alaraq və Azərbaycanın Sovet İttifaqından müstəqilliyini qazanmasının 21-ci ildönümü münasibətilə atıldığını bildirib.

Sənəddə Birləşmiş Ştatların Azərbaycanın ərazi bütövlüyü, suverenliyi və müstəqilliyini qeyd-şərtsiz dəstəklədiyini bildirilir. Burada Sovet İttifaqının dağılmasından sonra yaranmış tarixi şəraitdə Azərbaycan xalqının 20-ci əsrdə ikinci dəfə müstəqilliyini qazandığı qeyd edilir. Sənəddə bildirilir ki,

Mer Coy Kuper Hallandale Beach şəhərinin sakinlərini bu günü demokratiya, bərabər hüquqlar, söz, din və toplaşmaq azadlıqları ruhunda qeyd etməyə çağırıb.

Florida ştatında fəaliyyət göstərən Azərbaycan-Amerika Mədəniyyət assosiasiyasının prezidenti Töhfə Eminova mer Coy Kuperin ofisində keçirilən görüşdə şəhərdə Azərbaycan-türk icmasının nümayəndələrindən ibarət 10 nəfərlik heyətin iştirak etdiyini deyib. Onun sözlərinə görə, mer Joy Kuper Azərbaycanın Müstəqilliyi gününün əlamətdar bir hadisə olduğunu qeyd edib.

“Joy Kuper bəyannaməni oxuduqca mən böyük fərəh hissi keçirməklə yanaşı, həm də kövrəlirdim. O, Azərbaycanın dövlət himninin musiqisinin Üzeyir Hacıbəyov tərəfindən bəstələnməsi, mətninin isə şair Əhməd Cavad tərəfindən yazılması kimi faktları, Azərbaycan bayrağı üzərində səkkizguşəli ulduza kimi detalları nəzərindən qaçırmamışdı. Bu onu göstərir ki, o, həqiqətən də Azərbaycan haqda məlumatlarla tanış olub. Biz merə və şəhər rəsmilərinə çox minnətdarıq”-deyə Töhfə Əminova Amerikanın səsinə bildirib.

Töhfə Əminovanın bildirdiyinə görə, bəyannamənin rəsmi açıqlanmasından sonra Hallandale Beach şəhərində yaşayan Azərbaycan-türk icmasının üzvləri “Türk evi”ndə Müstəqillik gününü qeyd ediblər.

Yerli “San Sentinel” qəzeti merin açıqladığı bəyannamə ilə bağlı məlumatında bildirib ki, Xəzər dənizi sahillərindən çox uzaqda olmasına baxmayaraq, Hallandale Beach şəhərində Azərbaycanın Müstəqillik günü qeyd edilir.

Hallandale Beach şəhəri Florida ştatının Bovard dairəsində yerləşir. Florida ştatında Mayami şəhəri, həmçinin Mayami Deyd kimi başqa inzibati dairələrə daxil olan şəhər və qəsəbələrdə yaşayan azərbaycanlıların icmaları mövcuddur.

2006-cı ildə Mayami şəhərində Azərbaycan-Amerika Mədəniyyət assosiasiyası yaradılmışdır. Təşkilat amerikalılara Azərbaycanın mədəniyyəti və tarixini tanıtmaq missiyasını yerinə yetirir.

İcma üzvlərinin səyləri nəticəsində Florida ştatında Azərbaycanın Müstəqilliyi günü, habelə may ayında Azərbaycanın Respublika günü münasibətilə şəhər bələdiyyələri və inzibati dairələrin rəsmiləri tərəfindən rəsmi sənədlər qəbul edilmişdir.