Adam Sterlinq: Azərbaycan istər bölgədə, istərsə də dünyada Amerikanın güclü tərəfdaşıdır

Posted April 9th, 2012 at 10:08 pm (UTC+5)
Leave a comment

Adam Sterlinq

Amerika ilə Azərbaycan arasında diplomatik əlaqələrin 20-ci ildönümü münasibəti ilə Bakıda Azərbaycan hökumət rəsmilərinin, deputatların, siyasi partiya rəhbərlərinin, ictimaiyyət nümayəndələrinin iştirakı geniş tədbir keçirilib. Tədbirdə ABŞ Konqresindən 10 senator, Azərbaycanın Amerikadakı səfiri Elin Süleymanov, keçmiş səfirlər də iştirak edib.

ABŞ-ın Azərbaycandakı müvəqqəti işlər vəkili Adam Sterlinq bildirib ki, Amerika Azərbaycanın sülhsevər, çiçəklənən, müstəqil və demokratik dövlət kimi inkişafını davam etdirməsini dəstəkləyib və  bundan sonra da dəstəkləmək üçün əlindən gələni edəcək. “Güclü Azərbaycan istər bu önəmli bölgədə, istərsə də dünyada ABŞ-ın güclü tərəfdaşıdır. Əhalisinin əksəriyyətini müsəlmanlar təşkil edən, əsrlər boyu xarici hökmdarların öhdəsindən gəlmiş, uzunmüddətli tolerantlıq və müasirlik ənənələrini qoruyub saxlamış, dünyəvi, demokratik Azərbaycan, hər şeyə rəğmən, qadınlara seçki hüququnu Birləşmiş Ştatlardan öncə verib. Azərbaycan bu bölgədə və ondan kənarda nümunəvi və lider ölkə ola bilər”.
Cənab Sterlinq iki ölkə arasında əlaqələrin təhlükəsizlik, enerji, demokratik və iqtisadi islahatlar sahəsində ortaq maraqlara əsaslandığını bildirib. “Azərbaycan beynəlxalq təhlükəsizlik və terrorla mübarizə sahəsində önəmli rol oynayır”. Burada o, Azərbaycan və Amerika əsgərlərinin Kosovo, İraq və Əfqanıstanda birgə fəaliyyətini xatırladıb.

“Azərbaycan həmçinin Əfqanıstanda NATO əməliyyatlarının dəstəklənməsi üçün önəmli nəqliyyat marşrutudur”, – deyə müvəqqəti işlər vəkili vurğulayıb.

O Azərbaycanın təhlükəsizliyinə diqqət çəkərkən deyib ki, Dağlıq Qarabağ münaqişəsinin sülh yolu ilə və ədalətli nizamlanmasında hər iki ölkənin ortaq sadiqliyindən daha önəmli heç nə ola bilməz. “ABŞ ATƏT-in Minsk qrupunun həmsədri kimi danışıqlar yolu ilə uzunmüddətli nizamlanmaya nail olmaq üçün tərəflərlə sıx əməkdaşlığı davam etdirir”.

Cənab Sterlinq enerji sahəsində güclü əməkdaşlığın sübutu kimi Bakı-Tbilisi-Ceyhan neft kəmərini misal çəkib. “Bu gün, biz Azərbaycan təbii qazını Avropaya ixrac etmək üçün cənub dəhlizinin yaradılması məqsədini bölüşürük”.

O həmçinin demokratiya və iqtisadi islahatlar sahəsində Amerika və Azərbaycanın uzunmüddətli əməkdaşlığa malik olduğunu önə çəkib. “Biz Azərbaycanın qeyri-adi potensialını tam şəkildə gerçəkləşdirməsi üçün zəruri olan qanunun aliliyi, fundamental azadlıqlar, fəal vətəndaş cəmiyyətinin təşviq olunması üzrə birgə fəaliyyətimizi səbirsizliklə gözləyirik”, – deyə o qeyd edib.

Azərbaycan xarici işlər nazirinin müavini, ölkənin Amerikadakı ilk  səfiri Hafiz Paşayev vaxtaşırı problemlərə baxmayaraq  Azərbaycan-Amerika münasibətlərinin strateji  tərəfdaşlıq səviyyəsinə yüksəldiyini bildirib.

Cənab Paşayev iki ölkə arasında enerji layihələri, təhlükəsizlik və terrorizmə qarşı mübarizə sahəsində effektli işin müvəffəqiyyətini önə çəkib.

Nazir müavini Ermənistan-Azərbaycan münaqişəsinin nizamlanmasında Amerikanın səylərini artırmasını istəyir. “Biz, Amerikanın Ermənistanla Azərbaycan arasında uzunmüddətli münaqişənin nizamlanmasında daha fəal rolunu görmək istəyirik. Biz, ABŞ-ın bizim regionda etnik siyasətin əsiri olmadan öz milli maraqlarını güdməsini istəyirik. Söhbət təcavüz və işğaldan gedəndə Amerikanın əşyaları öz adı ilə çağırmasını istəyirik. Yalnız, ABŞ-ın təməli olan əsl dəyər və prinsiplərə sadiqlik Amerikaya Qafqazda uzunmüddətli, möhkəm və uğurlu dayaq nöqtəsi təmin edəcək”.

Cənab Paşayevin fikrincə, ötən 20 ildə iki ölkə qarşılıqlı anlaşma və etimad istiqamətində uğurlu addımlar atıb. “Ancaq, biz bu sahədə çox işlər görməliyik. Biz, tərəfdaşlığın üfüqlərini genişləndirməli və xalqlarımızın bir araya gətirilməsinin yeni yaradıcı yollarını axtarıb tapmalıyıq. Bu istiqamətdə insanlar arasında əlaqələr vacibdir. Şadam ki, bu gün bir qrup Konqresmen bu auditoriyaya qoşulub”.

Nazir müavini ikitərəfli əlaqələrin gələcəyinə böyük nikbinliklə baxdığını önə çəkib. “Xalqlarımız azadlıq, sülh və tolerantlıq kimi eyni dəyərləri, eyni strateji məqsədləri və qarşılıqlı hörmət hissini bölüşür. Biz bir-birimizə kömək etməyi davam etdirməli və daha geniş sülh və tərəqqi üçün səylərimizi birləşdirməliyik. Biz birgə çox şeyə nail ola bilərik”, – deyə o qeyd edib.

Leave a Reply

Your email address will not be published. Required fields are marked *

Tapdıq Fərhadoğlu

Tapdıq Fərhadoğlu - 1990-cı ildən mətbuat səhifələrində yazıram.

Azərbaycanın ilk müstəqil qəzetinin yazarlarından olmuşam. Daxili və xarici siyasət, qaynar hadisələr, Ermənistan-Azərbaycan münaqişəsi ilə bağlı çoxsaylı reportajlar və yazıların müəllifiyəm. 10 ildən çoxdur ki, Amerikanın Səsi radiosunun Azərbaycanda müxbiriyəm.

Videolarınızı bizə göndərin!

Azblog-dan ən son blog yazıları

Azərbaycanın İlk Blog Şəbəkəsi
<div style="background-color: none transparent;"></div>