Jurnalist işgəncələrə məruz qaldığını bildirir, Baş Prokurorluq təkzib edir (baxış bucağı)

Posted April 25th, 2012 at 9:03 pm (UTC+5)
Leave a comment

Sərhədsiz reportyorlar” təşkilatı “Xəyal TV”nin baş redaktoru Zaur Quliyevə qarşı qeyri-insani davranışdan şoka düşüb. 1 mart Quba hadisələrindən sonra həbs olunmuş redaktor Baş Mütəşəkkil Cinayətkarlıqla Mübarizə İdarəsində zorakılığa məruz qalıb. Quba rayon İcra Hakimiyyətinin başçısı Rauf Həbibovun qalmaqallı çıxışı ilə bağlı videoçarx YouTube saytında yerləşdirildikdən sonra iğtişaşlar başlayıb. Hakimiyyət “Xəyal TV-nin əməkdaşlarını iğtişaşların təşkili məqsədilə yerli bələdiyyə rəhbərinin sifarişi ilə bu videoçarxın hazırlanmasında ittiham edib. “Zaur Quliyevə fiziki və psixoloji təzyiqlərə dərhal son qoyulmalıdır. Biz jurnalistin həbsdə saxlanması üçün normal şəraitin yaradılmasını tələb edirik və məhkəmə orqanlarını onun şikayətlərinə operativ reaksiya verməyə çağırırıq”, – deyə təşkilatın bəyanatında deyilir.

Həbsdə olan Zaur Quliyev dünən “İnsan Hüquqları Uğrunda” İctimai Birliyinə işgəncəyə məruz qalması ilə bağlı yazılı bəyanat göndərib.

Jurnalist bildirir ki, martın 22-dən Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində dəfələrlə işgəncələrə məruz qalıb. Onun əlləri arxasında bağlı şəkildə bir neçə saat dindirilib. 1 mart Quba iğtişaşlarının təşkilində günahı öz üzərinə götürməsi tələbi ilə təzyiqlər göstərilib.

Zaur Quliyev yazır ki, hüquq mühafizə orqanlarının yüksək vəzifəli nümayəndələri onu vaxtaşırı dindirib və cinayətkarlarla bir yerdə dəhşətli şəraitdə saxlanıb. Ona bildirilib ki, bunu etiraf edib-etməməsindən asılı olmayaraq mühakimə olunacaq.

Cənab Quliyev mədə xorasından əziyyət çəkməsinə baxmayaraq, tibbi yardımdan məhrum edilib və dərman verilməyib. Bu səbəbdən mədəsində qanaxma dayanmır. “Azərbaycan Eurovision müsabiqəsi ərəfəsində öz imicini yaxşılaşdırmağa çalışsa da jurnalistlərin hüquqları əvvəlkitək pozulur. Ölkə mətbuat azadlığı indeksi üzrə 179 ölkənin siyahısında 162-ci yerdədir”, – deyə bəyanatda vurğulanır.

Öz növbəsində, bu gün Azərbaycanın Baş Prokurorluğu və Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi

Quba hadisləri

jurnalistin işgəncələrə məruz qalması barədə bəyanatını təkzib edib.

Baş Prokurorluğun mətbuat xidməti bildirir ki, son günlər bəzi KİV-lərdə “Xəyal” müstəqil teleradio şirkətinin baş redaktoru Zaur Quliyevə ibtidai araşdırma zamanı işgəncələr verilməsi barədə əsassız və həqiqətə uyğun olmayan məlumatlar dərc edilir.

“Həmin informasiyalar hadisələrin əsl mahiyyətini təhrif etmək, ictimaiyyətin fikrini  yayındırmaq və istintaqın normal gedişinə mane olmaq məqsədi güddüyündən tərəfimizdən qəti şəkildə təkzib olunur”.

Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin rəisi Mirqafar Seyidov isə “Media forum” saytına bildirib ki,  “Xəyal” televiziyasının baş redaktoru Zaur Quliyev bu ilin martında Quba rayonunda baş vermiş hadisələrə görə həbs edilib və martın 14-dən aprelin 4-dək Baş Mütəşəkkil Cinayətkarlıqla Mübarizə İdarəsinin müvəqqəti saxlanma təcridxanasında saxlanılıb. “Zaur Quliyevin dediklərinin hamısı əsassız sözlərdir, böhtandır. O, boş-boş danışır. Ona heç bir işgəncə verilməyib. O, nə döyülüb, nə söyülüb, nə də təhqir olunub. Tam qətiyyətlə deyirəm ki, belə bir hal olmayıb və ola da bilməz”.

Mirqafar Seyidovun sözlərinə görə, Baş Mütəşəkkil Cinayətkarlıqla Mübarizə İdarəsində saxlanma şəraiti bütün standartlara cavab verir: “Şərait çox gözəldir. Ondan əvvəl burada yüzlərlə insan saxlanılıb. Niyə onlar indiyədək saxlanma şəraitindən giley etməyiblər? İdarəmizdə bütün məsələlər yüksək səviyyədədir, hazırda da əlavə təmir işləri gedir. Beynəlxalq təşkilatlar, yerli hüquq müdafiəçiləri idarədə saxlanma şəraiti ilə bağlı indiyədək bizə hər hansı irad bildirməyiblər, nəyisə dəyişmək haqda təklif verməyiblər”.

Xatırladaq ki, martın 1-də Qubada bir neçə min yerli sakin İcra Hakimiyyətinin başçısına etiraz olaraq mitinq keçirib. Dinc mitinq sonradan qarşıdurmaya keçib. Etirazçılar İcra Hakimiyyəti binasının şüşələrini sındırıb, icra başçısının villasını yandırıb. Rayona daxili qoşunlar və polis qüvvələri yeridilib. Adamlar yalnız icra başçısı vəzifədən azad edildikdən sonra sakitləşib.
Faktla bağlı cinayət işi qaldırılıb. Baş Prokurorluq və daxili İşlər Nazirliyinin birgə məlumatına görə, cinayət işi üzrə barələrində təkzibedilməz sübutlar toplanmış 30 nəfər təqsirləndirilən şəxs qismində cəlb edilməklə, onlardan 12-si barəsində həbs, 18-i barəsində isə başqa yerə getməmək haqqında iltizam qətimkan tədbirləri seçilib.

Barələrində həbs qəti imkan tədbiri seçilənlərdən iki nəfəri yerli “Xəyal” televiziyasının baş redaktoru Zaur Quliyev və icraçı direktor Vüqar Qonaqovdur.

Məlumatda deyilir ki, hadisələrin baş vermə səbəblərinin müəyyən edilməsi

Vəkil Elçin Sadıqov

istiqamətində aparılan istintaq araşdırmaları göstərib ki, Quba şəhər bələdiyyəsinin və rayon bələdiyyələr şurasının sədri Elxan Əliyev 2011-ci il noyabrın 22-də keçirilən müşavirədə videoçəkiliş aparan “Xəyal” müstəqil teleradio şirkətinin icraçı direktoru Vüqar Qonaqovdan icra hakimiyyətinin başçısı Rauf Həbibovun çıxışının qısaldılmış variantını hazırlamağı xahiş edib. Vüqar Qonaqovun tapşırığı ilə şirkətin baş redaktoru Zaur Quliyev və montajçısı İslam Aslanov tərəfindən icra başçısının rayonun bəzi sakinlərinin qanunsuz hərəkətləri barədə söylədiyi fikirlərin ardıcıllığı pozulmaqla, ayrı-ayrı sözləri vətəndaşlarda hiddət doğuran məzmunda birləşdirilməklə süjet hazırlanıb. Həmin videomaterial 2011-ci il dekabrın 18-də kompakt diskdə Vüqar Qonaqova təqdim olunub və o, diski Elxan Əliyevə verib.

Bu səbəbdən  Quba şəhər bələdiyyəsinin və rayon bələdiyyələr şurasının sədri Elxan Əliyev, “Xəyal” müstəqil teleradio şirkətinin icraçı direktoru Zaur Quliyev və baş redaktoru Vüqar Qonaqov Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə) və 309-cu (vəzifə səlahiyyətlərini aşma) maddələri ilə təqsirləndirilən şəxs qismində cəlb edilərək barələrində həbs qətimkan tədbiri seçilib.

Hər üç şəxs martın 14-16-dan aprelin 4-dək DİN Baş Cinayətkarlıqla Mübarizə İdarəsinin saxlama kamerasında saxlanıb.

Vəkil Elçin Sadıqov martın 29-da Amerikanın Səsi radiosuna bildirib ki, “Xəyal” televiziyasının baş redaktoru Zaur Quliyev Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin müvəqqəti saxlama kamerasında saxlanması ciddi qanun pozuntusudur. “Təqsirləndirilən şəxs 72 saatdan artıq saxlama kamerasında saxlanıla bilməz”.
Vəkil həmçinin hüquqlarını müdafiə etdiyi Z.Quliyevlə görüşə buraxılmadığını da deyib. “Vəkilin müdafiə etdiyi şəxslə görüşə buraxılmaması da ciddi hüquq pozuntusudur”.

Onun sözlərinə görə, Baş Mütəşəkkil Cinayətkarlıqla Mübarizə İdarəsinin müvəqqəti saxlama kamerası zirzəmidə yerləşir. Bu kameralarda havasızlıqdır, tualet, su kranı yoxdur. Hamam isə ümumiyyətlə yoxdur. “Təsəvvür edin ki, təqsirləndirilən şəxs hər dəfə əlini yumaq, tualetə getmək üçün polisdən xahiş etməlidir ki, kameranın qapısının kilidini açsın”, – deyə o qeyd edib.

Vəkil Kamandar Nəsibov aprelin 9-da Amerikanın Səsi radiosuna bildirib ki, istintaq orqanı Elxan Əliyevin müdafiə hüququnu dəfələrlə pozub.

Onun sözlərinə görə, E.Əliyev aprelin 4-dək qanunsuz olaraq Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin saxlanma kamerasında saxlanılıb. Aprelin 4-də Penitensiar Xidmətin Kürdəxanıdakı istintaq təcridxanasına köçürülüb. “Mənimlə martın 17-də müqavilə bağlanıb. Həmin gün istintaq qrupunun rəhbəri və üzvləri mənimlə telefonla danışmaqdan imtina edib, müqaviləmi qəbul etməyiblər. Müqaviləm olduğu halda martın 17-də iştirakım olmadan ona qarşı ittiham elan edilib. Yalnız martın 28-də müdafiə etdiyim şəxslə görüş üçün məktub veriblər. Həmin gün də üç saat gözləməyimə baxmayaraq, görüşə buraxmayıblar. Baş Mütəşəkkil Cinayətkarlıqla Mübarizə İdarəsinin saxlama kamerasına məni martın 29-da buraxıblar”, – o bildirib.
Vəkil  deyib ki, müdafiə etdiyi şəxslə görüşə buraxılmadığı müddətdə istintaq orqanı Baş Mütəşəkkil Cinayətkarlıqla Mübarizə İdarəsində E.Əliyevi bir neçə dəfə dindirib və ondan hədə-qorxu ilə ifadə alıb. “Həmin müddətdə hətta hüquq mühafizə orqanlarının yüksək vəzifəli şəxsləri onunla görüşüb, hədə-qorxu gəliblər”, – Kamandar Nəsibov qeyd edib.
O, müdafiə hüququnun pozulması, E.Əliyevin qanunsuz olaraq Baş Mütəşəkkil Cinayətkarlıqla Mübarizə İdarəsində saxlanması barədə məhkəmələrə 4 şikayət ərizəsi verib.

Leave a Reply

Your email address will not be published. Required fields are marked *

Tapdıq Fərhadoğlu

Tapdıq Fərhadoğlu - 1990-cı ildən mətbuat səhifələrində yazıram.

Azərbaycanın ilk müstəqil qəzetinin yazarlarından olmuşam. Daxili və xarici siyasət, qaynar hadisələr, Ermənistan-Azərbaycan münaqişəsi ilə bağlı çoxsaylı reportajlar və yazıların müəllifiyəm. 10 ildən çoxdur ki, Amerikanın Səsi radiosunun Azərbaycanda müxbiriyəm.

Videolarınızı bizə göndərin!

Azblog-dan ən son blog yazıları

Azərbaycanın İlk Blog Şəbəkəsi
<div style="background-color: none transparent;"></div>