Antaliyada Türkiyə kinematoqrafçılarının ən mühüm tədbiri olan “Altın Portakal” kino-festivalında əslən azərbaycanlı aktrisa Nəzrin Cavadzadə ən yaxşı qadın rolunun ifaçısı kateqoriyasında yüksək mükafata layiq görülüb.
Gənc aktrisa rejissor Kutluğ Atamanın ssenaristi və prodüseri olduğu “Quzu” filmində yaratdığı Mədinə obrazına görö Türkiyə kino sənətinin ən yüksək mükafatını alıb.
Nəzrin Cavadzadə 1982-ci ildə Bakıda anadan olub. 11 yaşında olarkən valiydenləri ilə birlikdə İstanbula köçən Nəzrin Cavadzadə o zamandan Türkiyədə yaşayır. Həkim ailəsində böyüməsinə baxmayaraq, o, uşaqlıqdan sənətə böyük həvəs göstərib. Nəzrin Cavadzadə İstanbulda Marmara universitetinin kino və televiziya fakültəsini bitirdikdən sonra Türkiyədə bir sıra kino və televiziya fimlərinə çəkilib.
“Dilbərin səkkiz günü” kino-filmində ifasına görə o, Türkiyədə keçirilmiş müxtəlif kino-festivallarda ən yaxşı qadının rolunun ifaçısı kateqoriyasında ən yüksək mükafata layiq görülüb.
Aktrisanın “Acı” kino-filmi, “Gözəl günlər görəcəyik” və “Yanğın var” filmləri, eləcə də “Al yazmalım” tele serialında ifa etdiyi rollar tamaşaçı auditoriyasının və kino tənqidçilərinin böyük rəğbətini qazanıb.
Dilşad Əliyarlı jurnalist və yazardır. 16 ildir Amerikanın Səsində çalışır. Azərbaycan xidmətində televiziya proqramlarının yaradıcılarından biri olan Dilşad Əliyarlı Amerikadan Azərbaycan dilində yayımlanan ilk televiziya proqramları olan "Newsflash" xəbər bülleteni və "Amerika icmalı" tele-jurnalının ilk aparıcısıdır.