Muzqaymoq biznesi

Posted December 5th, 2014 at 10:54 pm (UTC+4)
Leave a comment

Enn Rayan quyoshli Kaliforniyaning Santa-Monika shahrida muzqaymoq sotadi.

“Men organik muzqaymoq sendvichlari tayyorlab sotaman. Muzqaymoqqa bolaligimdan mehr qo’yganman. Shirinliklarni yaxshi ko’raman. Plyajda turli-tumanlari bo’lardi”.

Kollejda Enn moliyani o’rgandi va bir necha yil mijozlarga ovqat tashidi. Tadbirkor bo’lishni orzu qilardim, deydi u.

“Ko’ngilochar biznes, moliya va sarmoya bilan ham shug’ullandim, ammo o’zimning ishim bo’lishini xohlardim. Odamlarning ko’nglini ko’taruvchi biznes bo’lsin, derdim. Muzqaymoq ishlab chiqarish xayolga keldi”.

Shunday qilib “Beachy Cream” muzqaymoq do’koni paydo bo’ldi. Enn muzqaymoqni o’z oshxonasida tayyorlay boshladi.

“Avvaliga buvimning reseptlaridan foydalandim. Zanjabil kabi ziravorlardan qo’shdim, tanishlarimning reseptlarini ishga soldim”.

Enn tayyorlagan muzqaymoqning mazasi o’zgacha, boshqa hech qayerda uchratmaysiz.

“Ishimning qiziq tomoni shuki, unga ijodiy yondashish kerak. Har xil ta’mli muzqaymoq va pechenyelar o’ylab topib, ulardan sendvichlar tayyorlayman”.

Enn har bir muzqaymoq turiga nom bergan.

“Aksariyat muzqaymoqlardan farqli o’laroq biz sun’iy ta’m yoki rang qo’shmaymiz. Muzqaymoqlarimiz tabiiy bo’lib, unda yorqin ranglarni ko’rmaysiz”.

Enn bundan faxrlanadi.

“Men sog’liqqa zarari yetmaydigan, mazali mahsulot o’ylab topdim. Uni egan odamning chehrasi ochiladi. Shuning o’zi menga huzur bag’ishlaydi”.

Do’kon xizmatchilarining kiyimlari ham juda chiroyli.

“Muzqaymoq tashiydigan juda ham eski aravamiz bor. Plyaj yoki tadbirlarga mahsulotni ana o’shanda olib chiqamiz”.

Enn mahalliy restoran va do’konlarni ham o’z mahsulotlari bilan ta’minlab turadi.

““Beach Cream” do’konlarini mamlakat bo’ylab, hatto dunyo bo’ylab ochsam deyman”.

Enn bu biznesni ikki yil oldin ochgan. Unga bu ishda farzandlari – qizi va o’g’li yordam beradi.

“Farzandlar bilan bir ish qilish orzudir, oilaviy biznes. Doim muloqotdamiz, birgamiz”.

Leave a Reply

Your email address will not be published. Required fields are marked *

MUALLIF HAQIDA

Odil Ruzaliev “Amerika Ovozi”da 2005-yildan beri ishlaydi. Diktor va prodyuser. AQShning Tafts Universitetida (Tufts University) xalqaro aloqalar sohasida magistrlik darajasini olgan. Ungacha O'zbekiston TV 1-kanalida ingliz tilida FCN (First Channel News) yangiliklar ko'rsatuvining muallif-boshlovchisi bo’lgan. O'zbek, ingliz va rus tillarida chop etilgan qator maqolalar muallifi.