Ijtimoiy tarmoqlar prezident eshigini qoqmoqda

Posted July 17th, 2013 at 7:29 pm (UTC+0)
Leave a comment

Hukumat internet jilovini mustahkamlash  yo’lida izlanish olib borishda davom etmoqda. Zotan, chorasizlikka tushgan o`zbeklar uchun adolatga umidning so`nggi chorasi internet bo’lib qolayotgan edi.

Xalq orasidagi rang-barang qarashlar internetdagi turli saylarda, ijtimoiy tarmoqlarda ko’rinish bermoqda. Shunday saytlardan biri – “YouTube”.

Muammoni “Youtube” orqali yoyinlash, albatta, uning hal qilinishini bildirmaydi, biroq ko`pchilik e`tiboriga tushgan lavha so`nggi qarorni beruvchi  hukmdor – prezident Islom Karimovga yetib borsa ajab emas, degan umidlar ham yo’q emas.

Farg`onalik rassomlarning “Youtube” orqali O`zbekiston prezidentiga murojaati o`z natijasini bergandek.  Badiiy akademiya binosining bir tadbirkor tomonidan noqonuniy olib qo’yilishiga qarshi viloyat rassomlari o’z noroziliklarini g’ayrioddiy usulda izhor etishdi. Prezidentga atalgan murojaatlarini “Youtube” saytiga joylashga qaror qilishdi:

Qaror natijasini bergandik. Rassomlar uyi ijodkorlar ixtiyorida qoladigan bo’ldi.

Uzoq davom etib kelayotgan bu mashmashaning  rassomlar foydasiga hal qilinishi shaxsan prezident ishorasining aralashishi orqali ro’y berdi deb bo’lmasa-da, birinchi raqamli shaxsning qizi Gulnora Karimovaning unga bosh qo’shgani aytilmoqda. “Ozodlik” xabariga ko`ra, rassomlar Gulnora Karimovadan minnatdor.

Biz sabrli xalqmiz, shunday ekan, muammolar, ”Youtube”ga yuklangungacha,  bir qator ma’muriy pag`onalarni bosib o`tishiga shubha yo`q.

Uyi buzilgan, 40 yillik zahmati evaziga ko`kartirgan daraxtlari ayovsiz  kesib tashlangan termizlik onaxon ham  O`zbekiston prezidentiga internet orqali murojaat qilishdan boshqa chorasi qolmaganini aytadi:

Shaxsan men, bu murojaat prezidentga yetib borganiga shubha qilmayman.  Keyinchalik  onaxonga, aniqro`gi, uning oila a’zolariga nisbatan boshlangan tazyiqlar shundan darak bermoqda.

Xabarlarga ko`ra, onoxonning Termiz Unversitetida o`qituvchilik qilayotgan qizi qattiq  bosimga uchragan, biznes qilayotgan o`g`illarining faoliyati to`xtatib qo`yilgan. Albatta, hokimiyat shu bilan norozilikning  ovozini o`chirishni maqsad qilgan edi, ammo ular adashdi.  “Youtube”da Termizdagi vayronagarchiliklar sharhlangan yangi lavhalar paydo bo`ldi:

30-40 yil mobaynida parvarishlangan mevazor bog`ning bir kunda payxon qilinishi onoxonning sabr kosasini to`ldirgan, buni  lavhadan sezish qiyin emas.  Termiz iqlimida darxt ko`kartirishning o`zi bo’lmaydi. Shunday ekan, cho`llashayotgan shaharda har biri ro`yxatda turishi lozim bo`lgan daraxtlarlarning nega kesilayotganini tushunolmay qiynalasan. Obodonlashtirish bizda faqat yashillikni yo`qotish evaziga amalga oshayotgandek.

Bu manzarani ko`rib,  o`z-o`zidan Turkiyadagi namoyishlar, Taksim bo`gidagi daraxtlar himoyasiga chiqqan minglab turklar xayolga keladi. Ammo O`zbekiston Turkiya emas. Termizdagi hodisa boshqalari oldida hech narsa emas. Biz butun mamlakat bo`ylab yuz yillik chinorlar qirg`in qilinishini ham jimgina kuzatdik. Poytaxtnining ko`rki bo`lgan azim chinorlar o`rnini saraton issig`iga dosh berolmasdan qovjirab qolayotgan archalar egalladi. Tabiatni qirg`inlash hisobiga amalga oshgan bu obodonchilikdan bugun ko`pchilik pushaymon.

Agrar unversitetidagi qabul jarayoniga oid ayrim voqelarning ijtimoiy tarmoqqa ko`chgani ham ko`pchilik e`tiborini tortdi. Yoshlarning tarmoqdagi bir qadar faolligi, muammo yoritilganda barataraf etilishiga ishonchlari yuqori ekani umidli ko`rinadi.  BBC O’zbek xizmati muammoni  qizg`in muhokama qilinganini takidlaydi.

Hukumat internet kengligini jilovlashni qanchalik kuchaytirmasin, imkoniyat bor, hozircha bu imkoniyatga faqat sabr kosasi to`lganlargina murojaat qilinayotgani kuzatiladi.

Ammo bugun bir narsa aniq. Muammoning  ko`tarilishida, uning jamiyatga, hokimiyatga taqdim etilishida internetdagi ijtimoiy munosabatlarning muhim o’ringa ega ekani anglashib borilmoqda. Umidimiz shundan.

Malik Mansur, Germaniya

Leave a Reply

Your email address will not be published. Required fields are marked *

Muallif haqida:

Malik Mansur Toshkent Davlat Universitetini (hozirda O'zbekiston Milliy Universiteti) bitirgan. Professional jurnalist. Bu sohada 1990-yilardan beri ishlab keladi. O'zbekistonda qator nashrlarda faoliyat yuritgan. "Amerika Ovozi" bilan 2002-yildan buyon hamkorlik qilib keladi. Vatandagi siyosat, iqtisod va ijtimoiy hayotni yoritadi. Malik Mansur tanqidiy maqolalari uchun 2010-yilda davlat organlariga tuhmat qilganlik, haqoratlaganlik va jamoat xavfsizligiga tahdid solganlik aybi bilan Toshkentda sudga tortilgan. Jurnalist va uning reportajlarini efirga uzatgan "Amerika Ovozi" bu ayblovlarni asossiz deb hisoblab, sud ishini so'z va matbuot erkinligini cheklash uchun qilingan qadam deb atagan. Bafurja ma’lumotlar...

Ushbu blog haqida:

O'zbekiston va butun Markaziy Osiyodagi bugungi ahvol, siyosat, iqtisod, jamiyat... Yurtdoshlar nima fikrda? Ularni qanday masalalar qiynamoqda? Marhamat, shu sahifada munozara yuriting. Bu blog siz uchun ochiq. Vatandagi bugungi manzara sizga qanday ko'rinayotganini izohlab berishingiz mumkin.