Karimovlar xonadonidan kelgusida nimalarni kutish mumkin?

Posted December 11th, 2013 at 5:04 am (UTC+0)
Leave a comment

http://gdb.voanews.com/7BD18F01-28E5-414B-8759-E832B703C63D_w640_r1_s.jpg

Nihoyasiga yetayotgan yilning muhim voqeasi, shubhasiz, bosimga uchrab, mol-mulki va maqomidan ajragan Gulnora Karimovaning hukumatdagi ziddiyatlarga doir ayrim ma`lumotlarni jamoatchilikka oshkor etgani bo`ldi.

Mojaro hali tugamadi, Gulnora Karimova qismatining yangi yilda kutilayotgan ehtimoliy xotimasi “Twitter” doirasidagi oshkoraliklarni bir qadar kengroq maydonga ko`chirishi ham mumkin.

Har holda, Turkiyaning “Hurriyat” nashriga berilgan intervyu so`nggi oylar davomida Gulnora mahkum vaziyatga doir birinchi chiqish desa bo`ladi. Bu kabi chiqishlarni davom ettirish uchun Gulnora Karimovada hozir sabablar ham, ehtiyoj ham yetarli.

2013-yil hukumatdagi ayrim ziddiyatlarni ochiqlantirdi. Bu ziddiyatlarga turtki beruvchi omillar aslida yakunlanayotgan yildagiga nisabatan yaqinlashayotgan 2014-yilda ko`proq.

Islom Karimovning parlament vakolatini kengaytirishga qaratilgan kechagi bayonoti kelasi dekabrda kutilayotgan Oliy Majlis saylovlari arafasida bildirilmoqda.

Konstitutsiya kuni munosabati bilan qilingan nutqida Islom Karimov siyosiy partiya yetakchilarini prezidentlik maqsadini ko`zlashga chaqirdi. Karimovning bu chaqirig`i yaqin 10 yil qudratda qolishiga doir ishorati bilan kuzatilganini ham e`tibordan soqit qilib bo`lmaydi.

Ammo, o`n yildan so`ng 83 yoshli Islom Karimovni forumlar saroyida o`tirib parlamentdagi islohotlarga doir hisobot qabul qilayotganini tasavur qilish qiyin. Buni prezidentning o`zi ham yaxshi tushunadi.

Bugun siyosiy vorislik masalasi muhokamada ekan, bu avvalo hukumat ichkarisida tug`ulgan ehtiyoj bilan bog`liq. Bu ehtiyojni esa Karimovning o`z ham rad etolmaydi.

2014-yil bu savollarga aniqlik kritadi, garchand bu aniqlik mamlakatdagi tuzumda hech narsa o`zgarmasligidan dalolat bersa-da, uning ahamiyati hozirda siyosiy vorislik masalasida hukm surayotgan mavhumlikka chek qo`yilishidan iborat bo`ladi.

Bu mavhumlikning yo`qolishi mamlakatdagi vaziyatga real ko`z bilan qarash uchun kerak. Hukumat  vaziyatni real baholashdan manfaatdor emas.  Mavhumlik pardasi favqulodda kutilayotgan o`zgarishlarga bo`lgan samarasiz  va so`ngsiz umidlarni saqlash uchun ham muhum.

Yallig`langan umidlar davri qanchalik ko`p davom etsa,  reallik ham bizdan shuncha ko`p uzoqlashib boradi.

Malik Mansur

Leave a Reply

Your email address will not be published. Required fields are marked *

Muallif haqida:

Malik Mansur Toshkent Davlat Universitetini (hozirda O'zbekiston Milliy Universiteti) bitirgan. Professional jurnalist. Bu sohada 1990-yilardan beri ishlab keladi. O'zbekistonda qator nashrlarda faoliyat yuritgan. "Amerika Ovozi" bilan 2002-yildan buyon hamkorlik qilib keladi. Vatandagi siyosat, iqtisod va ijtimoiy hayotni yoritadi. Malik Mansur tanqidiy maqolalari uchun 2010-yilda davlat organlariga tuhmat qilganlik, haqoratlaganlik va jamoat xavfsizligiga tahdid solganlik aybi bilan Toshkentda sudga tortilgan. Jurnalist va uning reportajlarini efirga uzatgan "Amerika Ovozi" bu ayblovlarni asossiz deb hisoblab, sud ishini so'z va matbuot erkinligini cheklash uchun qilingan qadam deb atagan. Bafurja ma’lumotlar...

Ushbu blog haqida:

O'zbekiston va butun Markaziy Osiyodagi bugungi ahvol, siyosat, iqtisod, jamiyat... Yurtdoshlar nima fikrda? Ularni qanday masalalar qiynamoqda? Marhamat, shu sahifada munozara yuriting. Bu blog siz uchun ochiq. Vatandagi bugungi manzara sizga qanday ko'rinayotganini izohlab berishingiz mumkin.