Astrit Lulushi, Zëri i Amerikës
Një studim i ri thotë se qëndresa ndaj sëmundjes së demencës mund të jetë gjenetike.
Studim i publikuar në revistën Neurology tregon se disa familje mund të kenë në organizëm një mjet mbrojtës nga demenca, dhe se niveli i lartë i një proteine të quajtur CRP ose C-reaktive, mund të jetë burimi i kësaj mbrojtjeje..
Shkencëtarët shqyrtuan 277 veteranë – 75 vjeç e më të moshuar – pa shenja të demencës. Ata matën nivelin e proteinës C-R-P dhe gjithashtu intervistuan më shumë se 1 mijë e 300 të afërm të tyre – dhe zbuluan se vetëm 40 për qind e tyre vuanin nga demenca.
Pastaj, shkencëtarët e përsëritën studimin – këtë herë duke shqyrtuar 51 persona 85 vjeç e sipër që nuk kishin asnjë shenjë të demencës. Përsëri ata matën nivelin e proteinës C-R-P dhe anketuan të afërmit e tyre.
Në të dy studimet doli se personat me nivel të lartë proteine CRP kishin mesatarisht 30 për qind më pak të ngjarë të kishin një të afërm me demencë.
Nisur nga kjo, autorët e studimit thonë se njerëzit e moshuar që kanë nivel të lartë të proteinës CRP dhe pa shenja të demencës, duhet të jenë rezistentë ndaj kësaj sëmundjeje, ashtu si edhe të afërmit e tyre.
Ekspertë të tjerë thonë se rezultatet janë me të vërtetë premtues, por duhen mbështetur nga më shumë prova.
