Արդյո՞ք Օբամա II-ը կցածրացնի Կրեմլի հետ ունեցած հարաբերությունները

Posted March 17th, 2013 at 04:49 (UTC+3)
Leave a comment

Գեղեցկուհի Վերան պոկ չի գալիս ԱՄՆ-ի դեսպան Մայքլ ՄըքՖոլից: (Ինչու՞: Չէ՞ որ կողքին կանգնած է գեղեցիկ կարմիր փողկապ կապած մի տղամարդ:) Չնայած Կրեմլի նվնվոցների, կամ, ավելի շուտ՝ դրանց պատճառով, Միացյալ Նահանգների դեսպանն աստղի կարգավիճակ է ստացել Մոսկվայում: Լուսանկար՝ Joseph Kruzich

Տեսարաններ Նյու Յորքում, Վաշինգտոնում և Մոսկվայում ԱՄՆ-Ռուսաստան հարաբերությունները երեք շաբաթ դիտարկելուց հետո.

 Քեյթը, իմ վաղեմի դասարանցին, գտել է ինձ՝ հարցնելու համար, արդյոք իր որդեգրած 17-ամյա ռուս դստեր համար ապահով կլինի այս ամառ Ռուսաստան ճանապարհորդություն կատարել,

 Ռուսլանը, 22-ամյա որդեգրած, ծագմամբ կես ռուս, կես չեչեն երիտասարդն ուշադիր լսում է իմ բացատրությունն այն մասին, թե ինչու Ռուսաստանի իշխանությունները պատմում են զարհուրելի պատմություններ՝ ամերիկացիների կողմից երեխաների որդեգրումներն արգելելն արդարացնելու համար: Կողքին՝ Նոր Անգլիայում ապրող իր տատիկի և պապիկի տան սեղանին դրված են ապխտած մսեղենը, տարատեսակ տաք ուտեստներն ու խմորեղենը:

 Մոսկվայում այս ձմեռ հակաամերիկյան պաշտոնական տրամադրությունները համապատասխանում են Սպասո Հաուզից դուրս ցրտաշունչ ձմռան: Սպասո Հաուզի ներսում ես խնդրում եմ, գրեթե քարշ տալով տանում ԱՄՆ-ի դեսպան Մայքլ ՄըքՖոլին «Ամերիկայի Ձայն»-ի հետ հարցազրույցի: Բազում մարդիկ ցանկանում են ձեռքով բարևել: Ռուսաստանցի հյուրերը դժվարացնում են ֆոտոլրագրողների գործը՝ զբաղեցնելով ամենահարմար տեղերը:

Մարդկանց անձնական մակարդակի շփման վրա հարաբերությունները գնալով լավանում են: Դրա մասին վկայում է Նյու Յորքից Մոսկվա կատարվող չվերթը, որտեղ չկա դատարկ տեղ:

Պաշտոնական մակարդակի վրա հարաբերությունները վատ են:
Հաղթահարելով իմ ներքին լավատեսությունը՝ չեմ տեսնում որևէ պատճառ գալիք ապագայում դրանց բարելավման համար:

Անցյալ տարվա հակաամերիկյան տրամադրվածության «անմիտ սեզոնը» վերածվել է անմիտ ժամանակաշրջանի:

Օբամայի վարչակազմի պաշտոնյաները համոզված են, որ դրա պատճառը ոչ թե իրադարձություններն են, այլ նախագահ Պուտինի ներքին քաղաքական ռազմավարությունը: Կրեմլը, նրանց համաձայն, օգտագործելով պետության կողմից վերահսկվող հեռուստատեսությունը, ստեղծում է օտարերկրյա «թշնամու» պատկերը՝ պետության ներսում օժանդակության անկումը հետադարձելու նպատակով:

Ռուսաստանի պետական հզոր լրատվամիջոցները կարող են վերաձևավորել հասարակական կարծիքը:

Հասարակական կարծիքի հետազոտության համառուսական կենտրոնի՝ ՎՑԻՕՄ-ի կողմից 2010 թվականին հասարակական կարծիքի անցկացված հարցման ընթացքում ռուսաստանցիների 38 տոկոսը դեմ են արտահայտվել երեխաներին օտարերկրացիների կողմից որդեգրելուն: Պետության կողմից վերահսկվող հետազոտական այս կազմակերպության կողմից ընթացիկ տարվա հունվարի 18-ին անցկացված հետազոտության մասնակիցների 78 տոկոսն արտահայտվել էր ամերիկացիների կողմից որդեգրումների դեմ:

Մոսկվացի մի ընտանիք բողոքում է ամերիկացիների կողմից որդեգրումների արգելքի դեմ: Լուսանկար՝ «Ամերիկայի Ձայն», Ջեյմս Բրուք

Կա սակայն մեկ այլ, իրականությանն ավելի մոտ Ռուսաստան: Գրեթե 1 միլիոն ռուսաստանցի ամեն օր սնվում է «McDonald’s» ռեստորաններում: Սուրբ Ծննդյան անցյալ տոներին նվերների 10 տոկոսը պատվիրվել է արտասահմանից: Անցյալ տարի Ռուսաստանի մեծահասակների 15 տոկոսն իրենց հանգիստն անցկացրել են նախկին Խորհրդային Միության երկրների տարածքից դուրս: Եվ, ինչն ավելի «վտանգավոր» է, ռուսաստանցիների 50 տոկոսն այժմ օգտվում են Ինտերնետից:

Ամերիկացիների համար որդեգրումների արգելքը վճռորոշ հարց էր: Դրանով Կրեմլի քմահաճույքներին ծանոթացան ամերիկացի հասարակությունն ու Միացյալ Նահանգների Կոնգրեսը: Ամերիկացի պաշտոնյաներից մեկն այսպես է նկարագրել Վաշինգտոնում տիրող տրամադվածությունը՝ «Զզվելի է»:

Ռուսաստանի որոշ պաշտոնյաներ չեն հասկացել այս ուղերձը: Օտարերկրյա թղթակիցների համար կազմակերպված ամենամյա ընդունելության ժամանակ Ռուսաստանի դիվանագետները համոզվածություն են հայտնել, որ նախագահ Օբաման կընդունի Ռուսաստանում նախագահ Պուտինի հետ հանդիպման հրավերը:

Ամերիկյան աղբյուրները սակայն պնդում են, որ նման այց դժվար թե կայանա: Ամերիկայի նախագահը կայցելի Ռուսաստանում սեպտեմբերին կայանալիք «Մեծ Քսանյակ»-ի հանդիպումը: Եվ դա կարող է Ռուսաստան կատարված նրա վերջին այցը լինել: Կսկսվի նախագահական նրա ժամկետի 1000-օրանոց ժամանակի հետհաշվարկը: Ամերիկայի նախագահն իր ժամանակը հակված կլինի նվիրելուն այն խնդիրների լուծման, որտեղ ինքը կկարողանա մեծ փոփոխություններ կատարել և բարի համբավ թողնել:

Սանկտ Պետերբուրգից այցելող ուսանողուհի Կատյան՝ կանգնած Մանհեթենի կինոթատրոններից մեկի մոտ, որտեղ դիտել է «Աննա Կարենինա»-ի բրիտանական տարբերակը: Նա միացել է ռուսաստանցիների այն հոսքին, որոնք այցելել էին Նյու Յորք՝ ամանորյա արձակուրդն ԱՄՆ-ում անցկացնելու նպատակով: Լուսանկար՝ «Ամերիկայի Ձայն», Ջեյմս Բրուք

Վաշինգտոնը, խոշոր ճգնաժամի ծավալումը խոչընդոտելու նպատակով, ամենայն հավանականությամբ կնվազեցնի հարաբերությունների մակարդակը: Առանց բարձրաստիճան շահերի, ըստ ամերիկացի պաշտոնյաներից մեկի, հարաբերությունները կարող են վերածվել «Վաշինգտոնը կուղարկի միջին մակարդակի պաշտոնյա Մոսկվա, որպեսզի վերջինս ստանա հերթական «ոչ»-ը ու հետ գա»-ի:

Երկրները բարեկամներ չունեն: Միջազգային հարաբերությունների հիմնական մասի հիմքում ընկած չէ բարի կամքը: Երկրների առաջնորդների միջև սակայն քաղաքավարի հարաբերությունները վնասակար չեն լինում:

Ամերիկացի պաշտոնյաները նշում են, որ Ռուսաստանի վարչապետի պաշտոնը զբաղեցնելու ժամանակ Վլադիմիր Պուտինը երբեք չի այցելել Միացյալ Նահանգներ: Ռուսաստանի նախագահի դերում անցյալ տարվա մայիսին Կրեմլ վերադառնալուց հետո Պուտինը հանդիպել է Օբամայի հետ «Քեմփ Դեյվիդ»-ում «Մեծ ութնյակի» գագաթաժողովի ժամանակ, ուշացած է ներկայացել Օբամայի հետ երկկողմանի հանդիպմանը Մեքսիկայում անցկացված «Մեծ քսանյակի» գագաթաժողովի ընթացքում, որից հետո նախագահել է անցյալ տարվա սեպտեմբերին Վլադիվոստոկ քաղաքում անցկացված Ասիա-խաղաղօվկիանոսյան գագաթաժողովը, որին ԱՄՆ-ի նախագահը, ընտրարշավ անցկացնելու պատճառով, չէր կարողացել ներկա գտնվել:

Դրանից հետո, հոկտեմբերին, Ռուսաստանից վտարվել են ամերիկյան մի շարք ծրագրեր:

Վերջին շաբաթներին հակաամերիկյան տրամադրությունները հասել են այն աստիճանի, որ Ռուսաստանի տարբեր մակարդակի պաշտոնյաներ մեղադրել են ռուսաստանցի երեխաներին որդեգրած ծնողներին պեդոֆիլներ, մարդու օրգանների վաճառքով զբաղվող հանցագործներ, տանը սպասավորներ պահելու մեջ հետաքրքրված կամ Ռուսաստանի վրա 50 հազար որդեգրածներից բաղկացած զոմբիների ստորաբաժանման հարձակում նախապատրաստող լինելու մեջ:

Այժմ Դուման ուսումնասիրում է Ռուսաստանի պաշտոնյաներին օտարերկրացիների հետ ամուսնանալու, պետության կողմից վերահսկվող հեռուստաալիքներով Ռուսաստանը քննադատող օտարերկրացիների ելույթը արգելելու, ինչպես նաև պետական ծառայողների կողմից անգլերեն բառերի օգտագործման դեպքում նրանց նկատմամբ տուգանքներ սահմանելու օրինագծեր:

Սակայն Ռուսաստանի համար հետընթաց կլինի այն հանգամանքը, որի դեպքում ամերիկացիները կսկսեն լուրջ վերաբերվել Ռուսաստանի կառավարության հռետորաբանությանը և, համարելով այն «խելագառ», լուրջ չընդունել այս երկիրը:

Մոտ երկու տասնամյակ առաջ Բրազիլիայի ֆինանսների նախարարն ասել էր, թե մի քանի հազար տոկոսի հասնող գնաճի տարեկան ցուցանիշներից հետո Բրազիլիայի համար ամենամեծ վտանգը դարձել էր «irrelevancia»-ն՝ «ոչ պատշաճ լինելը»: Այս նախարարը, որի անունը Ֆերնանդո Էնրիկե Կարդոզո է, վերջ տվեց Բրազիլիայում տիրող գերգնաճին, որից հետո զբաղեցրել էր նաև երկրի նախագահի պաշտոնը:

Բրազիլիան այսօր շատ հեռու է ոչ պատշաճ լինելուց:

Սակայն այսօր մղձավանջային երազի նման կարելի է լսել Օբամայի վարչակազմում Ռուսաստանի գծով փորձագետների արտահայտությունները, որոնք ասում են. «Մեզ պետք չեն նրանք: Մեզ պետք չեն ռուսները»:

Leave a Reply

Your email address will not be published. Required fields are marked *

Ջեյմս Բրուքը «Ամերիկայի Ձայն»-ի Մոկսվայի գրասենյակի ղեղավարն է: Գրասենյակը լուսաբանում է Ռուսաստանում և նախկին ԽՍՀՄ-ում տեղի ունեցող իրադարձությունները: «New York Times» օրաթերթում աշխատելու ժամանակ նա եղել է թերթի օտարերկրյա պետություններում թղթակիցներից մեկը՝ լուսաբանելով Աֆրիկայում, Կանադայում, Ճապոնիայում և Կորեայում տեղի ունեցող իրադարձությունները: Բրուքն ուսումնասիրել է ռուսաց լեզուն Բրեժնևի կառավարման ժամանակ, որպես թղթակից այցելել է Մոսկվա Գորբաչովի կառավարման վերջին ամիսների ընթացքում, ապա կրկին այցելել Ռուսաստան՝ Ելցինի օրոք և Պուտինի կառավարման սկզբի տարիներին: Նա բնակություն է հաստատել Մոսկվայում 2006 թվականին՝ սկսելով իր աշխատանքը «Bloomberg» գործակալությունում: «Ամերիկայի Ձայն»-ի Մոսկվայի գրասենյակին Բրուքսը սկսել է 2010 թվականին: Ջիմի հրապարակած նյութերին կարող եք հետևել «Twitter» կայքում՝ հետևյալ հասցեով. @VOA_Moscow.

Կարդացեք Ջեջմս Բրուքի բլոգը անգլերեն կամ ռուսերեն

Categories