Bu yaxınlarda Sloveniyanın Novi Qoritsa şəhəri yaxınlığında Sovet İttifaqı qəhrəmanı Mehdi Hüseynzadənin xatirə muzeyinin açılışı olacaq. Azərbaycan Milli Məclisinin üzvü, yazıçı-publisist Rəfayel Hüseynov muzeyin yaradılması və ekspozisiyanın hazırlanması məqsədilə Sloveniyaya səfərdən qayıdıb. O deyir ki, partizan hərəkatında Mixaylo kimi tanınan Mehdi Hüseynzadənin adı müharibə qəhrəmanlarının şərəfinə ucaldılmış bir neçə abidədə geyd edilib. Yerli əhali vaxtilə partizan hərəkatının üzvü olmuş Mixaylonu xatırlayır, onu xoş sözlərlə yad edir.

Rəfayel Hüseynov İtaliya, Almaniya və Sloveniyada Mehdi Hüseynzadənin kəşfiyyatçı və döyüşçü kimi fəaliyyət göstərdiyi dövrə aid müxtəlif arxiv sənədlərinin mövcud olduğunu bildirir. O, Azərbaycanda Mehdi Hüseynzadənin arxivinin yaradılması ilə məşğul olarkən onun indiyə qədər işıq üzü görməyən şerləri və rəsm əsərlərini tapdığını deyir.

Muzeyin Azərbaycan prezidenti İlham Əliyevin iyunun 10-u Sloveniyaya səfəri zamanı açılacağı gözlənilir.