Qadınları alqışlayaq!

Posted March 8th, 2011 at 4:22 pm (UTC-5)
Leave a comment

“Mən ən əvvəl qadınam”

Jaklin Kennedi Onasis, ABŞ-ın birinci xanımı

Bu gün 100 ildir ki, dünya qadınları 8 Mart gününü qeyd edir.  100 il uzun bir yoldur.   Bu yolda qadınlar təhsil almaq, səs vermək hüququ almağa nail olub, siyasətə qoşulmaq , bizneslə məşğul olmaq imkanı əldə edib.  Bu qadınlar alqışlara layiqdir.

Beynəlxalq Qadınlar günü münasibətilə sizi təbrik edirəm, əziz qadınlar!

Sizə ABŞ-ın ilk qadın dövlət katibi olmuş Madlen Olbraytla görüşüm haqda yazını təqdim edirəm.

Mən hər zaman ABŞ-ın keçmiş dövlət katibi Madlen Olbraytın eleqant üslubu və tutduğu yüksək vəzifəyə baxmayaraq, qadın kimi görünmək istəyini gizlətməməsinə pərəstiş etmişəm.  Amerikanın ilk qadın dövlət katibi olmuş Madlen Olbrayt ABŞ-n xarici siyasətində özünün bacarıqlı diplomatik qabiliyyətlərilə yanaşı, həm də taxdığı sancaqlar və onlardan diplomatik təmas vasitəsi kimi istifadə etdiyinə görə tanınır.  Əslən Çexiyadan olan Madlen Olbrayt bijuteriya sənayesinə dəstək vermək üçün müxtəlif bəzək əşyaları, o cümlədən, sancaqlar taxırdı.  Sonradan o, bəzək əşyalarından təkcə ziynət əşyası kimi deyil, həm də diplomatik danışıqlarda dünya liderlərinə mesaj göndərmək üçün istifadə etmişdi.  Ruslar hətta ABŞ dövlət katibinə “Madam Broşkina” təxəllüsü vermişdi. Madlen Olbraytın 200-dən çox müxtəlif broşkadan ibarət zəngin kolleksiyası onun klassik geyinməyi bacaran və eleqant bir xanım olduğunu bir daha sübut edir. 2009-cu ildə xanım Olbryatın “Sancaqlarımdan oxuyun” adlı kitabı işıq üzü gördü. Kitabda ABŞ-ın keçmiş dövlət katibi sancaq kolleksiyası və broşkalarından bəhs edir.

Mən kitabın prezentasiyasında iştirak edib Madlen Olbraytla görüşdüm. Xanım Olbraytla görüşün sonunda o mənim də kitabımı imzaladı və onunla ayaqüstü söhbət edə bildik.  Mənim Azərbaycandan olduğumu bildikdə, o, Bakıya səfərini xatırladı, xoş təəssüratları olduğunu dedi. Mən də ona üzərindəAzərbaycan və Amerika bayraqlarının olduğu bir sancaq bağışladım.  Xanım Olbrayt böyük məmmuniyyətlə kiçik suveniri qəbul etdi.  İndi Madlen Olbraytın kolleksiyasında üzərində Azərbaycan bayrağı olan yeni sancaq var.

Madlen Olbraytın kitabının prezentasiyası ilə bağlı məqaləni bu linkdə tapa bilərsiniz.

http://www.voanews.com/azerbaijani/news/a-56-2009-10-11-voa9-88671282.html?CFTOKEN=37703582&CFID=326715088&jsessionid=0030262fbd1fb4fdaa151561235e52216724

Nyu Yorkun “Soydaş” ansamblı Novruz bayramına hazırlaşır

Posted March 7th, 2011 at 6:29 pm (UTC-5)
Leave a comment

Nyu York yatmayan şəhər kimi tanınır. Küçələri həmişə səs-küylü, teatrlar və konsert salonları dolu…. Buradakı şənliklər də xüsusi bir atmosferdə keçir.  Nyu Yorkda yaşayan həmvətənlərimizə müəyyən mənada həsəd aparmaq olar. Amerikada ən yaxşı Novruz şənliyi konkursu hələ keçirilməyib, amma keçirilsə, Nyu York nominasiyada olacaq. Bakı restoranının ləzzətli təamları,“Soydaş” rəqs ansamblının ifasında rəqslər bütün tədbirlərə, xüsusilə də Novruz bayramına xüsusi rəng verir. Ansamblın bədii rəhbəri Telman Cəlilov “Yallı” və digər rəqslərin xoreoqrafiyası ilə həmvətənlərimizə çox yaxşı tanışdır. Telman müəllim bizə bildirdi ki,  “Soydaş” ansamblı Novruz bayramı üçün proqram üzərində işləyir. Şənlik Nyu Yorkda Bruklində keçiriləcək.

“Soydaş” ansamblının ifasında rəqslərə bu linklərdə baxın

Dünya qadınlarına Hillari Klintondan 8 Mart təbriki

Posted March 7th, 2011 at 5:16 pm (UTC-5)
Leave a comment

ABŞ Dövlət katibi Hillari Klinton 8 Mart Beynəlxalq Qadınlar günü münasibətilə dünya qadınlarına video mesaj göndərib.

Mesajda deyilir: “Martın 8-i Beynəlxalq Qadınlar gününün 100 illiyi qeyd edilir. Çoxlarının bildiyi kimi, bu tarix mənim üçün xüsusi əhəmiyyət daşıyır. 1995-ci ildə Pekində insan hüquqlarının qadın hüquqları və  qadın hüquqlarının da insan hüquqları olduğuna dair mesajıma müsbət reaksiya verildi. Lakin 16 il keçdikdən sonra qadınlar hələ də yoxsulluq, müharibə, xəstəliklər və aclıq kimi problemlərin ağırlığını çəkir. Direktorlar şuralarının iclasları, hökumət yığıncaqları, sülh danışıqları və dünyada mühüm qərarların verildiyi başqa yerlərə gələndə çox vaxt burada qadınları görmək olmur.

Tamamilə aydındır ki, əldə etdiklərimiz nailiyyətlər və irəliyə getmək impulsunu saxlamaq üçün hələ də çox iş görülməlidir.

Birləşmiş Ştatlar qadınların bizim xarici siyasətimizdə əhəmiyyətini artırmağa davam edir. Bu, təkcə düzgün iş deyil. Bu həm də ağıllı işdir. Qadınlar və qızlar iqtisadiyyatımızı inkşaf etdirir. Onlar sülh yaradır və inkişaf gətirir. Onlara investisiya etmək qlobal tərəqqi, siyasi sabitlik və dünyada hamı üçün daha artıq inkişafa investisiya etmək deməkdir.

Gəlin bu günü qadın və qızların təhsil, səhiyyə, iş tapmaq və kredit almaq imkanlarına malik olduğunu təmin və onların zorakılıq olmadan yaşamaq hüququnu müdafiə edərək qeyd edək.”

Video mesaja aşağıdakı linkdə baxa bilərsiniz.

http://www.state.gov/secretary/rm/2011/03/157647.htm

Amerikada yaşayan azərbaycanlı xanımlar uşaqlara Novruz adətlərini öyrətmək üçün tədbir keçirir

Posted March 3rd, 2011 at 9:04 pm (UTC-5)
Leave a comment

ABŞ-da yaşayan həmvətənlərimiz Novruz şənliklərinə hazırlaşır. Novruz təqviminə hər gün yeni tədbir əlavə olunur.

Paytaxt Vaşinqton, Virciniya və Merilend ştatlarında yaşayan qadınların təşkilatı AWA martın 13-də uşaqlar üçün Novruz şənliyi təşkil edir. Xanımlarımız balacalar üçün xonçalar hazırlayacaq, uşaqlara Novruz ənənəsi haqda məlumat verəcək.  AWA qrupunun üzvü Rəna Məmmədli bizə bildirdi ki, uşaqların Novruzun adətlərini bilməsi üçün onlara səməni qoymaq və yumurta boyamaq öyrədiləcək. “Balacalar rəngli boyalarla baharı təsvir edən rəsmlər çəkəcək, Azərbaycan rəqslərini ifa edəcəklər, təbii ki yumurta da döyüşdürəcəklər. Novruz adətlərinin yaşaması və onlara əməl olunması uzaq Amerikada uşaqlarımız üçün bir məktəbdir.” –deyə Rəna Məmmədli bildirdi.

Tədbir Virciniyada, Aleksandriya şəhərində keçiriləcək.

Təşkilat haqda informasiyanı aşağıdakı linkdə tapa bilərsiniz.

http://www.azwomenofamerica.org/

ABŞ-ın türk və Azərbaycan icmaları prezident Obamanı Novruz mesajında türk xalqlarını da qeyd etməyə çağırır

Posted March 2nd, 2011 at 8:40 pm (UTC-5)
Leave a comment

Amerikanın türk icması Novruz bayramı kampaniyası çərçivəsində ABŞ prezidenti Barak Obamaya məktub ünvanlayıb. Dördüncü ildir keçirilən bu kampaniyanın məqsədi prezident Obamanın Novruz mesajında türk xalqlarını da qeyd etməsinə nail olmaqdır. 

Məktubda deyilir ki, İran, İraq, Əfqanıstan, Pakistan, Azərbaycan, Türkiyə və Mərkəzi Asiyadan gəlmiş mühacirlər zəngin mədəni irslərinin qorunub saxlanması və adət-ənənələrin gələcək nəslə ötürülməsi məqsədilə hər il Novruz bayramını qeyd edir.

Lakin son illər Novruz bayramı yalnız İran və fars dilli ölkələrin xalqlarına aid edilib. Bununla belə,  Qafqazdan tutmuş Mərkəzi Asiyaya qədər böyük bir regionda yaşayan türk xalqları Novruz bayramını  və tarixi bir neçə min il əvvələ gedib çıxan yazın gəlişi gününü geniş şəkildə qeyd edir. Novruz Azərbaycan, Qazaxıstan, Qırğızıstan, Özbəkistan və Türkmənistanda rəsmi bayram, Türkiyədə isə ictimaiyyətin qeyd etdiyi bayram günüdür.

Amerika Türkləri və Amerika Azərbaycanlılarının şəbəkələri prezident Obamanı Novruz bayramı münasibətilə ABŞ prezidentinin hər il verdiyi mesajında Azərbaycan və azərbaycanlı amerikalılar, Türkiyə və türk amerikalılar, habelə bütün türk xalqlarını təmsil edən amerikalıları da qeyd etməyə çağırır.

Prezident Barak Obamanın 2006-2010-cu illərdə Novruz bayramı münasibətilə verdiyi mesajlarında türk xalqları qeyd edilməyib.

Prezident Obamanın 2010-cu il martın 20-i Novruz mesajı ilə aşağıdakı linkdə tanış ola bilərsiniz. 

http://www.whitehouse.gov/the-press-office/remarks-president-obama-marking-nowruz

Amerika Azərbaycanlıları ABŞ hökumətinin 2012-ci ildə Dağlıq Qarabağa birbaşa maliyyə yardımı ayırmaması üçün kampaniya aparır

Posted March 1st, 2011 at 5:22 pm (UTC-5)
Leave a comment

Amerikada yaşayan azərbaycanlılar artıq dördüncü ildir intensiv şəkildə Konqresə məktub ünvanlama kampaniyası aparır. Hər ilin əvvəli həmvətənlərimiz 20 Yanvar, Xocalı və Sumqayıt hadisələrinin ildönümü ərəfəsində Amerika qanunvericiləri ilə yanaşı, media və ictimaiyyət nümayəndələrinə məktublar göndərir. İcma üzvlərimiz yerli və federal qanunvericilərdən cavablar alır.

Bu günlər Amerikada yaşayan azərbaycanlıların şəbəkəsi USAN  Konqresə ABŞ-ın 2012-ci il üçün xarici yardımları ilə əlaqədar məktublar göndərərək, daha bir kampaniya aparır. 1998-ci ildə Konqres rəsmi Bakının etirazlarına baxmayaraq, Azərbaycanın ermənilər tərəfindən işğal edilmiş Dağlıq Qarabağ regionuna birbaşa maliyyə yardımı göndərməyə başlayıb. Azərbaycanın ərazi bütövlüyünü dəstəkləyərək, dünyada başqa heç bir dövlət Dağlıq Qarabağa maliyyə yardımı ayırmır.  Amerikalı azərbaycanlılar Ermənistanın Azərbaycan ərazilərini işğal altında saxlamasına kömək edən bu birbaşa maliyyə yardımına qəti etirazını bildirir. Həmvətənlərimiz öz etirazlarını Konqresin Nümayəndələr Palatasının Xarici Əlaqələr Komitəsi qarşısında çıxış edəcək Dövlət katibi  Hillari Klintona çatdırmaq üçün ona məktub göndərib. Məktubda xanım Klintona ABŞ-ın regionda mühüm müttəfiqi olan Azərbaycanın etirazına baxmayaraq, hazırkı iqtisadi durumda Dağlıq Qarabağda hərbi rejimə maliyyə yardmının qarşısını necə almaq olar kimi sual verilir.

ABŞ-da yaşayan azərbaycanlıların şəbəkəsi USAN  Dövlət katibi Klintonla yanaşı, Konqresin Nümayəndələr Palatasının Xarici Əlaqələr Komitəsinin bütün üzvlərinə və onların Senatdakı həmkarlarına da məktub göndərib.

“Qaçqın: Anar Usubovun həyat tarixi” Amerikada

Posted February 28th, 2011 at 8:13 pm (UTC-5)
Leave a comment

Fevral ayının son həftəsi Amerika Birləşmiş Ştatlarında yaşayan həmvətənlərimiz Xocalı faciəsinin 19-cu ildönümünü qeyd edirdi. Bu münasibətlə paytaxt Vaşinqton və Los-Anceles şəhərlərində türk jurnalisti Cem Oğuzun “Qaçqın:Anar Usubovun həyat tarixi” adlı sənədli filminin premyerası keçirildi.

Sənədli film1992-ci il fevralın 26-da Xocalıda faciəli hadisələr baş verən zaman 8 yaşı olan Anar Usubovun taleyindən bəhs edir.  Anar ailəsi və Xocalının başqa sakinləri ilə birlikdə Xocalıdan çıxa bilib.  Lakin 19 il keçəndən sonra nə onun özü, nə də ailəsi o hadisələri unuda bilmir.

Xocalı, Ağdam, Naftalan, Bakı…….Xocalı qaçqını Anar Usubovun sonu olmayan yolundakı dayanacaqlar….. Bu yolun sonu haradadır?  Bir gün o və onun ailə üzvləri doğma torpağa qayıda biləcəkmi?  Bu suallara hələlik nə Anar özü, nə də filmin yaradıcısı Cem Oğuz cavab verə bilmir.  Lakin Cem Oğuz ümid edir ki, bu uzun yolun sonunda bir işıq olacaq.

Cem Oğuz deyir ki, bu filmlə Xocalı faciəsi haqda dünya ölkələrində insanları məlumatlandırmaq  istəyib.

“Qaçqın” Azərbaycan və ingilis dillərində çəkilib. Cem Oğuz sənədli filmi beynəlxalq müsabiqələrə təqdim etməyi planlaşdırır.

Filmdən bir hissəni bu linkdə izləyə bilərsiniz

Refugee: The Life Story of Anar Usubov

Dilşad Əliyarlı

Dilşad Əliyarlı jurnalist və yazardır. 15 ildir Amerikanın Səsində çalışır. Bu illər ərzində radio və televiziya proqramları üçün müxtəlif mövzularda reportajlar hazırlayıb, ABŞ və Azərbaycanın yüksək səviyyəli rəsmiləri ilə müsahibələr aparıb. Dilşad Əliyarlı Amerikanın Səsinin Azərbaycan dilində ilk televiziya proqramı olan "Newsflash" xəbər bülleteninin, sonra isə "Amerika İcmalı" tele-jurnalınının ilk aparıcısı olub.

Azərbaycan xidməti ilə yanaşı, Amerikanın Səsinin rus xidmətində də radio proqramlarının aparıcısı kimi çalışıb. Amerikanın Səsindən öncə BBC radiosunun Azərbaycan xidmətinin Bosniyada müxbiri olub. Bakı Dövlət universitetinin Şərqşünaslıq fakültəsinin ərəb dili şöbəsini bitirib. Ərəb dilinin tədrisini Tunis paytaxtında Burqiba adına dillər institutunda davam etdirib.

Videolarınızı bizə göndərin!

Bizi Facebook-da izləyin

AzeriDiaspor bloqunun Facebook səhifəsinə üzv olmaq üçün buraya tıklayın

Azblog-dan ən son blog yazıları

Azərbaycanın İlk Blog Şəbəkəsi
<div style="background-color: none transparent;"></div>