Amerikada ilk Azərbaycan teatrı-Azərbaycan Nyu-York Asossiasiyasının məsul katibi Münəvvər Vahabova ilə müsahibə

Posted December 31st, 2011 at 3:23 pm (UTC-5)
Leave a comment

ABŞ-da Azərbaycan Nyu-York Asossiasiyasının nəzdində ilk Azərbaycan teatrı yaradılıb. Dekabrın 4-də teatrın təqdimatı zamanı Mirzə Fətəli Axundzadənin “Müsyo Jordan və dərviş Məstəli şah” tamaşasının premyerası keçirilib.

Azərbaycan Nyu-York Assosiasiyasının məsul katibi və həftə sonu Azərbaycan dili məktəbinin müəllimi Münəvvər Vahabova Amerikanın səsinə müsahibədə deyib ki, Nyu-Yorkda Azərbaycan teatrının yaradılması icma üzvlərinin uzun zamandır gerçəkləşdirmək istədiyi arzu idi.

Teatrın ilk tamaşasının səhnələşdirilməsi üçün ANA cəmiyyəti Diasporla iş üzrə komitənin köməyi ilə Azərbaycanın Əməkdar Artisti, “Qızıl Dərviş” mükafatı laureatı, Hüseyn Ərəblinski adına Sumqayıt Dövlət Musiqili Dram Teatrının baş rejissoru Firudin Məhərrəmovu ABŞ-a dəvət etmişdir.

Tamaşanın bədii tərtibatı Nyu-Yorkda yaradılmış “Soydaş” rəqs ansamblının rəhbəri, Azərbaycan Respublikasının əməkdar artisti Telman Cəlilova məxsusdur. Münəvvər Vahabovanın sözlərinə görə, Amerikada ilk Azərbaycan teatrının yaradılması fikri ilə ilk dəfə Telman Cəlilov çıxış etmişdir.

Tamaşa Azərbaycan icması üzvlərindən ibarət həvəskar aktyorlar qrupunun 26 məşqindən sonra səhnəyə qoyulmuşdur. “Müsyo Jordan və dərviş Məstəli şah” tamaşasının Amerikanın digər şəhərlərində də göstərilməsi nəzərdə tutulub.

Münəvvər Vahabova ilə müsahibəni burada izləyin.

Vaşinqtonda “Azərbaycan: Narazılığın Artan Səsləri” mövzusunda forum keçirilib

Posted December 21st, 2011 at 1:29 pm (UTC-5)
Leave a comment

ABŞ-da fəaliyyət göstərən Azərbaycan diaspor təşkilatlarından biri olan AZAD (Azərbaycanlı Amerikalılar Demokratiya Uğrunda) dekabrın 21-də Vaşinqtonda “Azərbaycan: Narazılığın Artan Səsləri” mövzusunda forum keçirir. Tədbirdə tarixçi-alim Cəmil Həsənli və siyasi şərhçi Hikmət Hacızadə məruzə edib. Tədbir Azərbaycanda insan hüquqlarının vəziyyətini və cəmiyyətdə gənclər və ziyalıların fəallığı məsələlərini Amerikada yaşayan soydaşlarla müzakirə etmək məqsədilə keçirilib Tədbirə Vaşinqtonda siyasi ekspertlər və ABŞ-da yaşayan Azərbaycan icmasının üzvləri dəvət olunmuşalr.

Azərbaycanlı Amerikalılar Demokratiya Uğrunda AZAD təşkilatı Amerikada yaşayan hüquqşünas Elmar Şaxtaxtinski tərəfindən təsis edilmişdir. Təşkilat öz fəaliyyətini ABŞ-ın Azərbaycanda demokratiyanın inkişafına dəstəyinin müdafiə edilməsi və fundamental hüquqlar və azadlıqlara hörmət edilməsi, habelə regional sabitlik və iqtisadi inkişafın təmin olunması prinsiplərinə əsaslanan ABŞ-Azərbaycan münasibətlərinə dəstək istiqamətində qurur.

Təşkilatın veb səhifəsi ilə tanış olmaq üçün bu linkə keçin.

ABŞ-dakı Azərbaycan diaspor təşkilatları Nümayəndələr Palatasında Türkiyəyə dair qərara etiraz bildirir

Posted December 16th, 2011 at 4:03 pm (UTC-5)
Leave a comment

Amerikadakı Azərbaycan diaspor təşkilatları icma üzvlərinə göndərilən məktublarda Konqresin Nümayəndələr Palatasının ümumi iclasında Türkiyədə xristianların irsinin qorunması və kilsələrin qaytarılmasına çağıran layihənin qəbul edilməsilə bağlı mövqelərini bildirib.

Amerika-Azərbaycan Cəmiyyəti, Amerika-Azərbaycan Şurası və Pax Turcica institutu ABŞ-dakı türk təşkilatlarına qoşularaq, Nümayəndələr Palatasının 306 saylı qətnaməsini pisləyib. Onların icma üzvlərinə göndərdiyi müraciətdə deyilir ki, sənəd Birləşmiş Ştatlar və iqtisadiyyatı durmadan inkişaf edən regional lider və NATO üzrə etibarlı tərəfdaş olan Türkiyə arasında münasibətlərə zərər vura bilər.

ABŞ azərbaycanlılarının şəbəkəsi USAN-ın icma üzvlərinə ünvanladığı müraciətdə isə Nümayəndələr Palatasında kaliforniyalı konqresmenlər Hovard Berman və Edvard Roysun sponsorluq etdiyi sənəddə Türkiyənin xristian məbədləri dağıtmaqda yanlış olaraq ittiham edildiyi bildirilir. USAN Azərbaycan icmasının üzvlərini Amerikadakı türk icmaları ilə həmrəylik göstərərək, Konqres üzvlərinə qətnamənin qəbul edilməsilə bağlı narazılıqlarını ifadə etməyə çağırır.

Xatırladırıq ki, ABŞ Konqresinin Nümayəndələr Palatası ümumi iclasında Türkiyədə xristianların irsinin qorunması və kilsələrin qaytarılmasına çağıran layihəni səsverməyə qoyaraq onu təsdiq edib.

Layihəni Konqresə təqdim edən Kaliforniya ştatından respublikaçı qanunverici Ed Roys və Kaliforniya ştatından Demokrat qanunverici Hovard Berman sənədin lehinə, KonqresdəTürkiyə üzrə İşçi qrupun həmsədri Ed Vitfild isə onun əleyhinə səs verib. 435 qanunvericinin təmsil olunduğu Nümayəndələr Palatasında səsvermədə yalnız üç konqres üzvü iştirak edib.

Konqresmenlər Hovard Berman və Ed Roys Türkiyədə din azadlıqlarının pozulduğunu, KonqresdəTürkiyə üzrə İşçi qrupun həmsədri Ed Vitfild isə Türkiyədə bu sahədə inkişaf olduğunu bildirib.

Səsvermədən öncə ABŞ-da fəaliyyət göstərən Azərbaycan diaspor təşkilatları türk diaspor təşkilatarına qoşularaq sənədin Nümayəndələr Palatasında səsverməyə çıxarılmasına qarşı kampaniya keçirib.

Türkiyə Xarici İşlər Nazirliyi Nümayəndələr Palatasında səsvermə ilə bağlı bəyanat verərək, sənədin cəmi üç qanunvericinin səsi ilə qəbul edilməsinin məsələyə marağın nə dərəcədə az olduğunu göstərdiyini bildirib.

Amerika azərbaycanlıları Senatı səfir Brayzanı vəzifəsinə yenidən təsdiq etməyə çağırır

Posted December 6th, 2011 at 4:41 pm (UTC-5)
Leave a comment

ABŞ azərbaycanlıları Birləşmiş Ştatların Azərbaycandakı səfiri Metyu Brayzanın öz vəzifəsinə yenidən təsdiq edilməsi üçün məktub kampaniyası keçirir. ABŞ-da azərbaycanlıların şəbəkəsi olan USAN, Amerika-Azərbaycan Şurası, Pax Turcica təşkilatları erməni lobbisinin səfir Brayzanın təsdiq edilməsinə mane olmaq üçün kampaniya apardığını bildirərək, azərbaycanlıları lobbinin fəaliyyətlərinin qarşısını almaq məqsədilə Amerika qanunvericilərinə məktub gönrdərməyə çağırıb.

Diaspor üzvlərinə müraciət məktublarında bildirilir ki, erməni lobbisi səfir Brayzanın 2012-ci ildə yanvar ayında ABŞ-a qaytarılmasına çalışır. “Bu, təkcə artıq bir ildir Azərbaycanda səfirin işinin dayanması demək deyil, həm də erməni lobbisinin ABŞ-ın Azərbaycandakı səfirinin müəyyən edilməsi məsələsinə veto qoymaq hüququ olmasını nümayiş etdirmək istəyindən irəli gəlir”-deyə məktubda qeyd edilir.

Müraciətdə deyilir ki, erməni lobbisinin səyləri nəticəsində ABŞ-ın Ermənistandakı səfiri öz vəzifəsinə yenidən təyin olunmayıb. “İndi bu səylər ABŞ-ın Azərbaycandakı səfirinin təyin edilməsi məsələsinə yönəldilib”-deyə məktublarda qeyd edilir.

ABŞ prezidenti Barak Obama Metyu Brayzanın Birləşmiş Ştatların Azərbaycandakı səfiri vəzifəsində qalması ilə bağlı müraciəti Senata göndərib. Cənab Brayzanın namizədliyi ilə bağlı səsvermə Senatın Xarici Əlaqələr komitəsində keçirilməlidir.

Xatırladırıq ki, ABŞ prezidenti Barak Obama Konqres tətildə olduğu zaman ona dövlət başçısı kimi verilmiş xüsusi səlahiyyətlərdən istifadə edərək, 2010-cu ildə dekabrın 29-da Metyu Brayzanı ABŞ-ın Azərbaycandakı səfiri vəzifəsinə təyin etmişdi. Prezidentin sərəncamı bir il müddətinə qüvvədə qalır. Cənab Brayzanın nominasiyası Senatın Xarici Əlaqələr Komitəsinin üzvü, Kaliforniya senatoru Barbara Bokser tərəfindən saxlandığı üçün komitə onu vəzifəyə təsdiq edə bilməmişdi. Xarici Əlaqələr Komitəsinin nüfuzlu respublikaçı üzvü, senator Riçard Luqar cənab Brayzanın ABŞ-ın Azərbaycandakı səfiri vəzifəsinə layiqli namizəd olduğunu bildirmişdi.
Prezident Obama Metyu Brayzanın ABŞ-ın Azərbaycandakı səfiri vəzifəsinə nominasiyasını 2010-cu ildə mayın 25-də irəli sürmüşdü.
Amerikada Erməni Milli Komitəsi yaydığı press-relizdə cənab Brayzanın nominasiyasına etiraz edərək, onu Dağlıq Qarabağ münaqişəsinin nizamlanması məsələsində mövqeyinin Azərbaycanın xeyrinə olmaqda, habelə ermənilərin iddia etdiyi soyqırım məsələsinə qeyri-obyektiv münasibət göstərməkdə ittiham etmişdir. Metyu Brayza Konrqesə keçirilən dinləmələr zamanı bu iddiaların əsassız olduğunu bildirmişdi.

ABŞ-ın bir sıra siyasətçiləri Mtyu Brayzanın nominasiyasına dəstək bildirərək, onun regionu yaxşı tanıyan çox az peşəkar diplomatlardan biri olduğunu qeyd ediblər.

Şükranlıq günü yazısı ilə bağlı suallara cavablar

Posted November 25th, 2011 at 3:09 pm (UTC-5)
Leave a comment

Şükranlıq günü yazısına çoxlu suallar və şərhlər vermisiniz və ən başlıcası da bəyənmisiniz. Çox sağ olun. Təşəkkür etmək üçün mənə daha bir gözəl imkan verdiniz!

Şükranlıq gününün nə bayramı olduğunu soruşanlar üçün.

Hər il Amerikada noyabr ayının sonuncu cümə axşamı Şükranlıq günü qeyd edilir. Tarixə görə, 1621-ci ildə İngiltərədən köçmüş və Amerikada hazırda Massaçusets ştatının ərazisində birinci çətin ilə tab gətirə bilmiş təxminən 50 adam yerli hindlilərlə məhsul yığımını bayram edib. Gəlmələr və yerlilər birlikdə yemək yeyib, çörək kəsiblər və şükran ediblər.

Zaman keçdikcə Şükranlıq günü amerikalılar üçün daha geniş məna kəsb etməyə başlayıb. Şükranlıq gününün əsas rəmzi olan məhsul və dostluğu qeyd etməklə yanaşı, amerikalılar azadlıqlar, dəyərlər və imkanları da bu gün xüsusi qeyd edir.

ABŞ-ın ilk prezidenti olmuş Corc Vaşinqton 1789-cu ildə Şükranlıq gününü milli bayram elan etmişdir. 1863-cü ildən etibarən Şükranlıq günü ABŞ-da ölkə miqyasında qeyd edilir.

Şükranlıq günü bayram süfrəsini hindtoyuğu, şirin kartof, qabaq, qarğıdalı çörəyi və quşüzümü sousu bəzəyir.

Hindtoyuğu ingilis dilində niyə “turkey” adlanır? Həqiqətən də çox maraqlıdır.

Avropalılar yeni qitəyə, Amerikaya gələndə burada gördükləri quşu səhvən onlara məlum “quineafowl“(firəng toyuğu) adlı quşa oxşatmışlar. Firəngtoyuğu Türkiyədən Şərqi Avropaya gətirildiyi üçün türk toyuğu da adlandırılır. Avropalılar Amerikadakı quşa ingilis dilində “turkey fowl” deyil, qısadılmış şəkildə “turkey” deməyə başlamışlar.

Şükranlıq günü

Posted November 24th, 2011 at 4:11 pm (UTC-5)
Leave a comment

Uşaqlıqda hindtoyuğunu sevmirdim. Düzü başa düşmürdüm ki, əgər quşdursa nə üçün uçmur, üstəlik də bütün günü deyinir, təkəbbürlü-təkəbbürlü həyətdə gəzir. Hər dəfə kəndə bibimgilə gedəndə ətrafında cücələrlə gəzən toyuqlara baxırdım və fikriləşirdim ki, uça bilməməsi bir tərəfə, heç balalarını başəna da yığmaq istəmir.

Bunu deməyə səbəb də tapırdım. Hər il hindtoyuğu cücə çıxaranda mənim əziz bibim bütün işlərdən ayrılıb onlara qulluq edirdi. Mən bibimlə söhbət etmək, onunla bağda-bostanda olmaq arzusunda olduğum zaman o, gecə-gündüz hindtoyuğunun cücələrini bəsləyirdi.

Toyuqların gözəl sarı cücələləri anaları ilə birlikdə həyətdə-bacada gəzəndə, hindtoyuğunun boynu uzun çirkin cücələri onlar üçün düzəldilmiş böyük bir qutuda güclü işıq şüaları altında sevgi və diqqəti bibimim o qayğıkeş əllərindən alırdı. Ana hindtoyuğu isə yenə də hamını burunlaya-burunlaya həyətdə gəzişirdi.

Bütün bunlardan özümə bir nəticə çıxarmışdım:”Mən bu təkəbbürlü, acıqlı quşu yemək şərəfindən məhrum etməliyəm”. Beləliklə də uşaqlıqda heç vaxt hindtoyuğu yemirdim.

Mən o zaman bilmirdim ki, bir vaxt bu sevmədiyim quş mənim həyatımda başqa bir məna daşıyacaq, şükranlıq hissini təkcə yaşadığım deyil, ifadə etdiyim gündə hindtoyuğu mənim evimin ən şərəfli qonağı, süfrəmin yaraşığı olacaq.

Hər il Amerikada milyonlarla insan kimi mən də Şükranlıq gününü bütün atributları ilə qeyd edirəm; süfrədə hindtoyuğu, quşüzümü sousu, qabaq püresi, meyvə və tərəvəzlə. Hindtoyuğu Şükranlıq gününün simvoludur. 400 il əvvəl yerli hindlilər Avropadan gəlmələri bəlkə də hindtoyuğu deyil, çox güman ki, qaz, ya da ördək ətinə qonaq ediblər. Amma bu önəmli deyil.

Şükranlıq günü ailə üzvləri, əziz və yaxın insanlar bir yerə toplaşır, birlikdə şam edir. Mənim də dostlarım və mənə özünü yaxın bilən insanlar bu gün bizim evə toplaşır. Bu anlar bizi bir-birimizə daha da yaxınlaşdırır, süfrə arxasında əslində, yeməyi deyil, şükran olduğumuz anları bölüşürük.

Mən hesab edirəm ki, şükran olmağı bacaran insanlar xoşbəxtdir. İlin bu bir gününü isə yaxın insanlarla şükran olmağın mutluluğunu birlikdə yaşaya bilirsən. Və bir zamanlar sevmədiyim o hindtoyuğu bu anların indi həm şahidi, həm də səbəbkarıdır.

Hollivudda Azərbaycan kinosu gecəsi VİDEO

Posted November 23rd, 2011 at 1:26 pm (UTC-5)
Leave a comment

Los-Anjelesdə Hollivudda ilk dəfə olaraq Azərbaycan kinosu gecəsi keçirilib.

Amerikalı tamaşaçılar ABŞ-ın AGS və Azərbaycanın GA studiyaları tərəfindən istehsal edilmiş “Azərbaycan haqqında” adlı sənədli film və rejissor Samir Kərimoğlunun “Niyyət” kino-filmi ilə tanış olmaq imkanı əldə ediblər.

Tədbir Azərbaycanın müstəqilliyinin bərpasının 20-ci ildönümü münasibətilə Azərbaycan Respublikasının Los-Anjelesdəki konsulluğu və Amerika Azərbaycan Şurası tərəfindən təşkil edilib.

Hollivudda ilk Azərbaycan kinosu gecəsi “Şərq Qərbə qovuşur” adı altında keçirilib.

Kristian Lobutin:”Bakının özünün bir musiqisi var.” Qurban Səid haqda kitab oxuyandan sonra Azərbaycana səfər edən məşhur Fransa dizayneri təəssüratları haqda danışır

Posted November 14th, 2011 at 4:27 pm (UTC-5)
Leave a comment

Dünyada Azərbaycanı asanlıqla xəritədə göstərə bilən çox az tanınmış moda dizaynerinə rast gəlmək olar, özü də bunun əsas səbəbini çox güman ki, neft və qazla zəngin ölkədə yeni bazar tapmaq istəyi ilə izah etmək mümkündür. Lakin tam yəqinliklə deyə bilərəm ki, bir dünya şöhrətli dizayner Azərbaycanı başqa səbəbə görə tanımaq istəyib. Fransa ayaqqabı dizayneri Kristian Lobutin Şərq və Qərbin qovuşduğu bir ölkəni görmək, onun mədəniyyəti ilə tanış olmaq məqsədilə Azərbaycana səfər edib. Bu tanışlığın başlanğıcını isə 20-ci əsrin əvvəllərində sirri hələ də dünyaya tam bəlli olmayan Qurban Səid təxəllüslü yazıçının “Əli və Nino” romanı qoymuşdur.

Bakıda böyüyüb boya-başa çatan çox adam kimi məndə də bu kitaba xüsusi münasibət olmaqla yanaşı, kitabın müəəlifi və onun yarandığı dövr haqda az-çox məlumatı olan insanlara da böyük maraq var. Buna görə də Qurban Səidin mənim cənab Lobutinlə Virciniyada Amerikanın ən prestijli univermaqlarından birində görüşümün səbəbkarı olduğunu desəm yanılmaram. Onun amerikalı jurnalist Tom Raysın yazdığı “Orientalist” kitabını oxuyandan sonra Azərbaycana səfər etdiyi haqda məlumata rast gəlmişdim. Lakin səfərin məqsədi, nə zaman baş tutduğu və Lobutinin şəxsi təəssüratları haqda bir məlumat yox idi. Onun özünün veb səhifəsində də bu haqda məlumat tapa bilməmişdim.

Kristian Lobutin yüksək moda dünyasında ən tanınmış ayaqqabı dizaynerlərindən biridir, müəyyən mənada ayaqqabı kralıdır. Onun hazırladığı ayaqqabıların qırmızı altlığı Amerikada patentləşdirilib. Lobutinin ayaqqabıları üç il bir-birinin ardınca lüks kateqoriyasına daxil olan malların siyahısında birinci yerdə göstərilib. Ən prestijli ayaqqabıların yaradıcısı öz ilhamını Parisdə gecə klublarında rəqs edən qızlardan alıb. Usta Lobutin ayaqqabılara öz imzasını qoyur. Onunla görüşə gedəndə bütün yaş kateqoriyalarına mənsub qadınların uzun növbə yaradaraq, Lobutinin ayaqqabılarıın altlığına imza atmasını gözlədiyinin şahidi oldum. Lakin müsahibədən sonra bu şıq ayaqqabıların arxasında maraqlı bir insanın, sənət aşiqinin, yüksək ruha və geniş təxəyyülə malik bir insanın durduğunu gördüm.

Mətbuatla görüş üçün otağanda özümü təqdim edərək, azərbaycanlı olduğumu söylədim. “Çox gözəl, bilirsinizmi, mən Azərbaycana səfər etmişdim”-deyə cavab eşitdim. “Bəli, bilirəm, ona görə də buradayam. Azərbaycan haqda danışacayıq” , dedim və söhbətə başladıq.

Dilşad Əliyarlı: Müasir zəmanədə insanlar o qədər çox kitab oxumurlar. “Orientalist” kitabı sizdə hansı təəssürat yaratdı?

Kristian Lobutin: Çox maraqlı kitabdır, yaxşı bir kitabdır. Bu kitab mənim Azərbaycana, Bakıya səfər etməyimə səbəb oldu.

Dilşad Əliyarlı: Bəli, bilirəm. Kitab haqda məlumatınız haradan idi?

Kristian Lobutin: Mən kitabları sevirəm. Kitabın gözəl bir cildi var. Kitabın üz qabığında əynində pencək və başında fes papaq Qurban Səidin oturduğu yerdə şəkli göstərilir. Cildə baxıb öz-özümə şəklin cəlbedici olduğunu düşündüm. Sonra kitabın arxasında annotasiyasını oxudum və Qurban Səid, eyni zamanda Leo Nissenbaum adını daşıyan bir yazıçı olduğunu öyrəndim. Bir də dünyanın bu hissəsinə, Qafqaza xüsusi rəğbət bəsləyirəm. Bu yerlərdə gözəl parçalar var, Qafqaz ərazisində çox gözəl əşyalar tapmaq olar. “Əla” -deyə düşündüm və kitabı aldım. Onu oxuyandan sonra isə özümü tamamilə başqa bir aləmdə hiss etdim.

Dilşad Əliyarlı: Bakıdan başqa haralarda oldunuz?

Kristian Lobutin: Mən Livana səfər etmişəm, Suriyada olmuşam. İstanbula getmişdim, oradan da Gürcüstana getmək istəyirdim. Lakin müharibə başladığı üçün oraya gedə bilmədim və bütün qalan vaxtı Suriyada qaldım.

Dilşad Əliyarlı: Bakıda qaldığınız müddətdə diqqətinizi çəkən nə oldu?

Kristian Lobutin: Mənə görə ölkənin də, şəhərin də çox gözəl cəhətləri var. Mənə özünün musiqisi olan bir yer kimi göründü. Mən dərhal burada musiqiyə böyük zövqün olduğunu hiss etdim. Şəhərdə ürəyə yatan bir gözəllik və yenə də musiqi var. Mənə elə gəlirdi ki, opera səhnəsindəyəm. Bu ölkənin bir musiqisi var. Burada onun ruhunu hiss edirsiniz, Azərbaycanın çox romantik bir ruhu var. Çox gözəl bir ölkədir, insanları gözəldir. Müsəlman ölkəsidir, özü də gözəl bir ölkədir.

Dilşad Əliyarlı: Azərbaycanda butik açmaq planlarınız varmı?

Kristian Lobutin: Bunu etmək istərdim. Mənim Rusiyada partnyorum azərbaycanlıdır. Amma hələ bir az tezdir. Mən hesab edirəm ki, hələ tezdir. Çünki qəribə də görünsə, istehsaldan əldə etdiyim gəlir o qədər böyük deyil. Buna görə də hələ bütün diqqətimi işə yönəltmişəm və istədiyim yerlərdə butik aça bilmirəm. Mən butik açanda gərək onun işi ilə özüm şəxsən məşğul olam. Amma belə bir fikrim var və mən 2012-ci il haqda fikirləşirəm.

Dilşad Əliyarlı: Keçmiş Sovet İttifaqının hansı şəhərlərində butikləriniz var?

Kristian Lobutin: Moksvada iki butikim var.

Dilşad Əliyarlı: Kitabların sizin həyatınıza və üslubunuza necə təsir göstərdiyi maraqlıdır. “Orientalist” kitabını nəzərdə tuturam. Dünya ilə bir bağlılıq hiss edirsinizmi?

Kristian Lobutin: Mən tamamilə özümü bu dünyaya bağlı hiss edirəm. Bu mənim işim və ruhən azad olmağım üçün çox vacibdir. Mən heç kəs haqda mühakimə yürütmürəm. Mən heç vaxt nə bir ölkə, nə də mənim təsəvvürüm olmayan, görmədiyim, ya da başa düşmədiyim bir reallıq haqda mühakimə yürütmürəm. Mən insanların başa düşmədikləri məsələlərə görə öz üzərinə nə qədər böyük məsuliyyət götürdüyünü heç cür anlamıram. İnsan səyahət etməlidir, hamıya tanış olmayan bir reallığı başa düşməyə çalışmalıdır. Çünki reallıqlar çoxdur və yalnız bir şey doğru ola bilməz. Ona görə də mən hesab edirəm ki, insan səyahət etməlidir, bu, onun açıq fikirli olması üçün vacibdir.

Dilşad Əliyarlı: Sizin fikrinizcə, 21-ci əsrdə moda nə dərəcədə fərqlidir? Siz bu dəyişikliyi necə hiss edirsiniz? Dizayner kimi bu sizin üçün nə deməkdir?

Kristian Lobutin: Moda bu gün bis sıra səbəblərə görə fərqlidir. Daha çox azadlıq var, insanlar özlərini daha azad hiss edirlər. Lakin başqa səbəblər də var. Müasir zəmanədə çöldə temperatur fərqlidir. Mən xüsusi olaraq ayaqqabılardan danışıram. Əvvəllər qışda uzunboğaz, yayda isə açıq ayaqqabı geyinirdilər Lakin indi siz qışda da açıq ayaqqabı geyə bilərsiniz, çünki bir isti yerdən o biri isti yerə gedirsiniz. Bütün bunlara görə moda da dəyişib. Mən tvid kostyumları çox sevirəm. Amma İngiltərədə soyuq qəsrdən başqa tvid kostyumu harada geyinəcəksiniz. İstidən bişərsiniz. İnsanların həyatı əslində modanın özündən daha çox dəyişib. Moda insanların həyatında nə baş verirsə onu əks etdirir. Beləliklə, müasir həyat özü modanı dəyişdirib.

Dilşad Əliyarlı: Sizə ilham verən nədir.

Kristian Lobutin: Hər bir şey. Gözləriniz və beyniniz baş verən hər şeyi görür və qavrayır. Gözlərim həmişə açıqdır və belə olduqda bu dizaynda da özünü göstərir.

Mən bu an ətrafa baxıram. Hər yer ayaqqabılarla doludur, hündür daban, qırmızı altlıqlı “Lobutinlər” (moda dünyasında onun ayaqqabılarını bəzən belə adlandırırlar). “Valehedici!”-deyə ağlımdan keçir və növbəti sualım artıq hazırdır.

Dilşad Əliyarlı: Hazırladığınız ayaqqabıların bu fövəlqadə xüsusiyyəti nədən ibarətdir.

Kristian Lobutin: Bilirsiniz, bir işə ürəyinizi və canınızı qoyanda buna dəyər. Qadınlar məndə onlara hörmət hissini, onları sevdiyimi görürlər. Mənim işim ayaqqabı dizayn etmək deyil, bu, qadınları təntənə etməkdir. Əgər qadının gözəl görünməsi və dizaynın gözəl görünməsi arasında seçim varsa, mən həmişə qadının tərəfindəyəm. Yəni mən əgər münasib deyilsə, dizayndan imtina edə bilərəm. Mənə elə gəlir ki, insanlar bunu görür.
Dilşad Əliyarlı: Siz əvvəlcə özünəməxsusuluğu və eleqantlığı ilə seçilən fransız qadınları üçün ayaqqabı dizayn etməyə başlamısınız. Sonradan ayaqqabılarınız digər qadınlar arasında da populyarlıq qazanıb. Sizə ilham verən qadınlar kimlər olub.
Kristian Lobutin: Təbii ki, fikrimdə tək bir adam olmayıb. Mən Fransada anadan olmuşam. Parisdə anadan olub, boya-başa çatmışam. Parisdə çox qadınlar görmüşəm və onların mənə təsiri olub.

Dilşad Əliyarlı: Tam mənada razı qalmaq üçün daha nəsə etmək istədiyinizi düşünürsünüzmü.

Kristian Lobutin: Əgər nail olmaq istədiyiniz nəyisə artıq əldə etdiyinizi düşünürsünüzsə, bu, son deməkdir. Mən bundan kədərlənərdim. Mən hələ heç bir şeyə nail olmadığımı düşünmək istərdim. Mən qarşımda görülməli işlərin olduğunu bilmək istəyirəm, arxamda qalanları yox. Gördüyüm işdən razıyam, amma işə davam etmək məni sevindirir.

Dilşad Əliyarlı: Sizcə gələcəyin qadınları necə görünəcək. Sizin ayaqqabılarınızı hansı qadınlar geyinəcək.

Kristian Lobutin: Deyə bilmərəm. Bu onların individual cəhətlərindən asılı olacaq.

Dilşad Əliyarlı: Sizi həyatda xoşbəxt edən nədir?

Kristian Lobutin: Azad olmaq. Müstəqil olmaq. Gəlin belə deyək, ruhumun azad olması.

Söhbəti burada bitirdik və mən cənab Lobutinin mənə ürək genişliyi ilə bu qədər vaxt ayırdığına təəccübləndim. Müsahibədən sonra hətta şəkil çəkdirdik və mən ona “Əli və Nino” kitabının nüsxəsini təqdim etdim. O, kitabı dərhal alıb ucadan dedi: “Əli və Nino. Kitabı oxuyacam. Çox maraqlı olacaq.”

Müsahibə ingilis dilində “Visions of Azerbaijan” jurnalında dərd edilib. Burada oxuya bilərsiniz.

Torontoda Azərbaycanın müstəqilliyinin 20 illiyi münasibətilə konfrans keçirilib (Fotolar)

Posted November 7th, 2011 at 2:43 pm (UTC-5)
Leave a comment

ABŞ-da və Kanadada fəaliyyət göstərən Şimali Amerika Azərbaycanlı Gənclər şəbəkəsi AYNA və Toronto universitetinin Azərbaycanlı Gənclər Assosiasiyası noyabrın 4-də Toronto şəhərində Azərbaycanın müstəqilliyinin 20-ci ildönümünə həsr olunmuş “Azərbaycan:20 il sonra” mövsuzunda elmi konfrans təşkil edib. Azərbaycan-Amerika Şurasının dəstəyi ilə keçirilən konfransda Ontario Qanunvericilik Assambleyasının üzvləri Monte Kvinter və Reza Moridi, habelə Toronto universitetinin dosenti Metyu Layt məruzə ilə çıxış ediblər.

Konfransın açılışında nitq söyləyən Toronto universitetinin Azərbaycanlı Gənclər Assosiasiyasının prezidenti İsgəndər Qədirzadə Azərbaycanın 1991-ci ildə SSRİ-nin dağılmasından sonra müstəqilliyinin bərpası tarixi haqda toplaşanlara məlumat verib.

Ontario Qanunvericilik Assambleyasının üzvləri Reza Moridi və Monte Kvinter Azərbaycana səfərləri zamanı aldıqları təəssüratlarla bölüşüblər. Ontario Ticarət və İnvestisiya məsləhət Şurasının sədri kimi Azərbaycana səfər edən Monte Kvinter Azərbaycanı keçmiş Sovet İttifaqının digər respublikaları müqayisə etmiş və Azərbaycanın əldə etdiyi nailiyyətləri qeyd etmişdir. Doktor Reza Moridi çıxışında Azərbaycanda 1918-cu ildə müsəlman dünyasında ilk demokratik respublikanın yarandığını xatırlatmış və Azərbaycanın son 20 ildə əldə etdiyi inkişafları göstərmişdir. O, Azərbaycana ikinci səfəri zamanı ölkədə daha güclü siyasi və iqtisadi təsisatların yarandığının şahidi olduğunu bildirmişdir.

Azərbaycan-Amerika Şurasının Amerikanın səsinə verdiyi məlumata əsasən, tədbirin sual-cavab hissəsində doktor Moridi Kanada və Azərbayan arasında daha güclü siyasi və mədəni əlaqələrin yaranmasına ehtiyacın olduğunu vurğulayıb.

Toronto universitetinin dosenti Metyu Layt Rusiyada Azərbaycan diasporu haqda məlumat vermiş, Rusiya və Kanadada Azərbaycan diasporlarını müqayisə etmiş və azərbaycanlılar üçün Kanadada imkanların olduğunu qeyd etmişdir.

Tədbir iştirakçıları Kanada və Azərbaycan gənclərinin iki ölkə arasında əlaqələrin yaradılması və inkişaf etdirilməsində mühüm rol oynaya biləcəyini xüsusi qeyd ediblər.

Toronto universitetində keçirilən tədbirdə tələbələr, Azərbaycan və türk icmalarının üzvləri, Kanadanın Türk Assosiasiyaları federasiyasının nümayəndələri iştirak ediblər.

ABŞ-dakı Azərbaycan diaspor təşkilatları Elin Süleymanovun səfir təyin edilməsini alqışlayır

Posted November 1st, 2011 at 3:45 pm (UTC-5)
Leave a comment

Birləşmiş Ştatlarda fəaliyyət göstərən Azərbaycan diaspor təşkilatları Elin Süleymanovun Azərbaycanın Amerika Birləşmiş Ştalarında Fövqəladə və Səlahiyyətli səfiri vəzifəsinə təyin edilməsini böyük razılıq hissi ilə qarşılayıb.

ABŞ və Kanadada fəaliyyət göstərən Amerika-Azərbaycan Şurasının açıqlamasında Elin Süleymanovun Azərbaycan Respiblikasının Los Ancelesdə baş konsulu kimi çalışdığı müddətdə ABŞ-Azərbaycan münasibətlərinin inkişafı istiqamətində xidmətləri göstərilir. “Azərbaycanın ABŞ-ın 13 ştatında təmsilçisi kimi Elin Süleymanov ABŞ və Azərbaycan arasında siyasi, iqtisadi və mədəni sahələrdə əlaqələrin inkişaf etdirilməsi istiqamətində və Amerikanın qərb ştatlarında Azərbaycan haqda biliklərin artırılmasında fəaliyyət göstərmişdir”-deyə açıqlamada qeyd edilir.

Amerikadakı digər Azərbaycan və türk diaspor təşkilatları da Elin Süleymanovun Azərbaycan Respublikasının ABŞ-dakı səfiri təyin edilməsi münasibətilə təbriklərini bildirir, onun yüksək peşəkar keyfiyyətlərə malik professional diplomat olduğunu qeyd edir.

Elin Süleymanov oktyabrın 26-da Azərbaycan prezidenti İlham Əliyevin sərəncamı ilə Azərbaycanın Birləşmiş Ştatlarda Fövqəladə və Səlahiyyətli səfiri təyin edilmişdir. Cənab Süleymanov Toledo universitetini və Taft universitetində Fletçer Diplomatiya məktəbini bitirib. O, 2006-cı ildən Azərbaycan Respublikasının Los Ancelesdə baş konsulu olmuşdur.

Dilşad Əliyarlı

Dilşad Əliyarlı jurnalist və yazardır. 15 ildir Amerikanın Səsində çalışır. Bu illər ərzində radio və televiziya proqramları üçün müxtəlif mövzularda reportajlar hazırlayıb, ABŞ və Azərbaycanın yüksək səviyyəli rəsmiləri ilə müsahibələr aparıb. Dilşad Əliyarlı Amerikanın Səsinin Azərbaycan dilində ilk televiziya proqramı olan "Newsflash" xəbər bülleteninin, sonra isə "Amerika İcmalı" tele-jurnalınının ilk aparıcısı olub.

Azərbaycan xidməti ilə yanaşı, Amerikanın Səsinin rus xidmətində də radio proqramlarının aparıcısı kimi çalışıb. Amerikanın Səsindən öncə BBC radiosunun Azərbaycan xidmətinin Bosniyada müxbiri olub. Bakı Dövlət universitetinin Şərqşünaslıq fakültəsinin ərəb dili şöbəsini bitirib. Ərəb dilinin tədrisini Tunis paytaxtında Burqiba adına dillər institutunda davam etdirib.

Videolarınızı bizə göndərin!

Bizi Facebook-da izləyin

AzeriDiaspor bloqunun Facebook səhifəsinə üzv olmaq üçün buraya tıklayın

Azblog-dan ən son blog yazıları

Azərbaycanın İlk Blog Şəbəkəsi
<div style="background-color: none transparent;"></div>