Azərbaycan təyyarəsinin qəzası və Əfqanıstanda təhlükəsizlik bəyanatları

Posted July 13th, 2011 at 5:57 pm (UTC+4)
Leave a comment

İyulun 6-da Azərbaycanın BK-76 yük təyyarəsi Əfqanıstanın Bəhram hava limanı yaxınlığında qeyri-müəyyən şəraitdə qəzaya uğrayıb. Təyyarənin 9  nəfər heyət üzvündən hələ də xəbər yoxdur. Çünki, nə Azərbaycan, nə Əfqanıstan hökuməti, nə də Əfqanıstandakı beynəlxalq koalisiya qüvvələri təyyarənin düşdüyü Pərvənd qəzasının Siyah Gərd əyalətinin Aksan kəndi yaxınlığında dağlıq əraziyə çata bilmir. Doğrudur təyyarə 3800 metr yüksəkliyi olan sıldırım qayalıqlarla əhatə olunmuş dağ zirvəsinə düşüb. Amma, məsələni çətinləşdirən bu deyil, təhlükəsizlik məsələləridir.

Əfqanıstanın xəritəsi

Siyah Gərd əyaləti Kabulun 25 kilometrliyində yerləşir və bu ərazidə aktiv döyüşlər gedir. Beynəlxalq hərbi qüvvələrə məxsus hərbi vertolyotlar iki dəfə təyyarənin düşdüyü əraziyə uçuş həyata keçirib və hər iki dəfə atəşə tutulub. İndi Azərbaycan və Əfqanıstan hökumətinin qəzanın səbəblərini tədqiq edəcək birgə komissiyası Taliblərlə danışıqlara cəhd edir. Amma, bu da alınmır. Hətta, Azərbaycan tərəfi “bütün vasitələrdən istifadə edib” təyyarə heyətinin cəsədlərini götürməyə hazır olduğunu da bəyan edib.

 

Azərbaycan Hava Yolları Şirkətinin vitse-prezidenti İlham Əmirov qəzadan sonra Əfqanıstana uçan bütün təyyarə reyslərinin dayandırıldığını bildirib. Azərbaycan yük təyyarələri Əfqanıstanın Kabul, Bəhram və Məzari Şərif hava limanlarına son on ildə yüzlərlə uşular həyata keçirib. Koalisiya qüvvələrinin və yerli şirkətlərin sifarişi ilə yüz tonlarla yük daşıyıb. NATO ölkələri, o cümlədən Amerika rəsmiləri Azərbaycana bu işinə görə dəfələrlə təşəkkür bildirib. Amerika Dövlət katibinin hərbi-siyasi məsələlər üzrə köməkçisinin Bakıya səfəri zamanı isə Azərbaycanın yüklərin daşınmasında rolunun daha da artırılması vurğulanmışdı.

Azərbaycanın yük təyyarəsinin, yerli rəsmilərin dediyi kimi “çox yəqin ki, vurulması”   Əfqanıstanda hərbi-siyasi vəziyyətin daha qorxulu və çətin olduğunun bir daha nümayişidir. Belə görünür ki, Əfqanıstanda  çoxsaylı dövlətlərin  beynəlxalq koalisiya qüvvələri paytaxt Kabulun 25 kilometrlik ətrafına belə nəzarət edə bilmir. Koalisiya qüvvələrinin təyyarənin heyət üzvlərinin cəsədini götürə bilməməsi isə Əfqanıstandakı hərbi-siyasi qüvvələrin həm quruda, həm də hava məkanında təhlükəsizliyə nəzarət edə bilmədiyini göstərir.

Digər tərəfdən, NATO və koalisiya qüvvələrinin rəsmiləri Əfqanıstandan yaxın illərdə hərbi nəzarətin yerli hərbiçilərə veriləcəyini bəyan edir. Əgər, müasir silahlara, hərbi texnika və texnologiyalara malik koalisiya qüvvələri 9 nəfər heyət üzvünün cəsədini təhlükəsizlik baxımından çətin olan paytaxt Kabulun 25 kilometrliyindən götürə bilmirsə, Əfqan ordusunun tezliklə təhlükəsizliyə nəzarət edəcəyinə inanmaq çətindir. Elə bu günlərdə, prezident Karzainin qardaşının öz evində qətlə yetirilməsi də buna bir sübutdur.

 

Leave a Reply

Your email address will not be published. Required fields are marked *

Tapdıq Fərhadoğlu

Tapdıq Fərhadoğlu - 1990-cı ildən mətbuat səhifələrində yazıram.

Azərbaycanın ilk müstəqil qəzetinin yazarlarından olmuşam. Daxili və xarici siyasət, qaynar hadisələr, Ermənistan-Azərbaycan münaqişəsi ilə bağlı çoxsaylı reportajlar və yazıların müəllifiyəm. 10 ildən çoxdur ki, Amerikanın Səsi radiosunun Azərbaycanda müxbiriyəm.

Videolarınızı bizə göndərin!

Azblog-dan ən son blog yazıları

Azərbaycanın İlk Blog Şəbəkəsi
<div style="background-color: none transparent;"></div>