
‘Yan wasan kungiyar kwallon kafa ta Chelsea su na murnar lashe kofin zakarun kulob-kulob na Turai lokacin da suka koma gida Ingila, 20 Mayu 2012.
Kungiyar kwallon kafa ta Chelsea ta Ingila ta sake cin moriyar lashe kofin zakarun kolob-kulob na Turaoi da ta yi kwanakin baya. A wannan karon, Gamayyar Kungiyoyin Kwallon Kafar Kasashen Turai, ta zabi Chelsea a zaman Kulob Din Turai Ta Wannan Shekara.
Roberto Di Matteo ya jagoranci ‘yan wasan nasa zuwa ga nasara kan Bayern Munich ta Jamus, kuma a filin wasan ‘yan Bayern, a wasan karshe na cin kofin zakarun kulob-kulob na Turai.
Wannan sabon kambi da suka samu, ya kara jaddada irin yabon da suka sha a bayan da suka lashe kofin Zakarun Kulob-Kulob na Turai na farko a tarihin Chelsea.
Jiya litinin aka mikawa Chelsea wannan sabon Kambi na Kulob Din Turai Ta Shekara a wajen babban taron bayar da lambobin yabo na Gamayyar Kungiyoyin Kwallon Kafar Turai a Geneva a kasar Switzerland.
A wasannin lig-lig na Premier a Ingila, ‘yan wasan na Di matteo ba su taka rawar kirki ba domin su ne suka zo na 6 a bara.
Amma, Gamayyar ta fada cikin wata sanarwa cewa ta yi la’akari da “irin gagarumar nasarar da Chelsea ta samu a shekarar kwallo ta 2011-2012 a cikin gida da kuma a nahiyar ta Turai.”
Chelsea tana cikin Gamayyar Kungiyoyin Kwallon Kafar Turai (European Club Association) ko ECA a takaice, wadda ta maye gurbin wasu kungiyoyin hadakar kkwallon kafar Turai G14 da European Club Forum wadanda aka rushe su a 2008.
Wannan sabuwar lambar yabo, wani labarin en mai kyau ga Chelsea wadda a bana ta fara wasannin lig-lig na Premier da nasarori zalla.
One response to “Chelsea Ta Zamo Kulob Din Turai Ta Wannan Shekara”
Ina, ai sa’a ce kawai. Ayiwa kwallo Fyenti ai sai Christiano. Up Real-Mdrid…