Fabrice Muamba ya bayyana cewa bai ji zafin komai ba a lokacin da zuciyarsa ta tsaya ta daina bugawa lokacin da yake wasa ma kungiyarsa ta Bolton Wanderers a watan da ya shige.
An sallami Muamba daga asibiti tun ranar litinin da ta shige, kuma ya fara kokarin murmurewa a bayan da zuciyarsa ta daina bugawa har na tsawon minti 78 lokacin da suke gwabzawa da kungiyar Tottenham.
Muamba ya fadawa jaridar “The Sun on Sunday” cewa, “ban ji zafin komai ba, ban kama kirji na ba, haka kuma ban ji kirjin nawa ya daure kamar yadda muka saba gani a cikin fim idan mutum ya samu ciwon tsayuwar zuciya ba. Na ji jiri, amma ba irin jirin da ak saba ji ba, sai na ji kamar ina gudu a cikin jikin wani mutum dabam. Daga nan sai na fara ganin abubuwa su na zamowa bibbiyu, kamar dai a mafarki. Na hangi ‘yan wasan (Tottenham) Spurs su na gudu a can nesa, sai na ga Scott Parker ya zamo mutum biyu, haka ma Luka Modrics.”
“Abu na karshe da na ji, shi ne mai tsaron bayanmu Dedryck Boyata yana ta yi mini ihun cewa in yi sauri in koma baya in taimakawa masu tsaron baya. Bai san abinda ke faruwa da ni a lokacin ba, kamar yadda ni ma ban sani ba. Haka kawai sai na ji ina yin kasa zan fadi, sai na ji kara har sau biyu a lokacin da kai na ya fadi ya bugi kasa, daga nan sai duhu kawai, ban sake jin komai ba…”
Muamba ya shafe fiye da makonni 4 a asibiti, amma har aka sallame shi ba a san abinda ya sa zuciyarsa ta daina bugawa ba.
A yanzu an sallame shi a bayan da akab sanya masa wata karamar na’urar da zata maido da bugawar zuciyarsa idan har ta sake tsayawa nan gaba.
“Ido na biyu a lokacin da aka dasa mini wannan na’ura,” in ji Muamba mai shekaru 24 da haihuwa. Na’urar ba zata bukaci sauyin batur ba sai bayan shekaru 10.
“Abin da ya faru gare ni, wata mu’ujiza ce. Koda na rayu, ana tsammanin kwakwalwa ta zata samu illa. Ina fata zan samu sukunin sake buga kwallo a nan gaba. Amma abinda ya fi duka wadannan shi ne na rayu, kuma in ci gaba da nuna kauna da soyayya ga iyali na. babu shakka, na yi babbar sa’a.” In ji Fabrice Muamba

Ba kasafai ake samun abu guda dake hada kan ‘yan wasan Tamaula na Turai baki daya ba, im ban da irin wannan tsautsayi da ya abka kan Fabrice Muamba na kungiyar Bolton Wanderers, mai wasa a Premier League na Ingila.
Mahaifin Muamba da wasu ‘yan’uwansa sun bayar da sanarwa su na godewa ‘yan kallo, da ‘yan wasan Tamaula da ma’aikatan asibiti a saboda tallafi da goyon bayan da suka nuna musu. Muamba ya fadi kasa haka kwatsam kafin a tafi hutun rabin lokaci a yayin da Bolton ta ke buga wasan kwata fainal na kofin kalubalenka da Tottenham ranar asabar da ta shige.
Har yanzu tsohon dan wasan kungiyar kwallon kafar Ingila ta ‘yan kasa da shekara 21 yana cikin matsanancin hali a Asibitin Kirji na London. An ce sai da ma’aikatan jinya suka shafe mintoci 78 su na aiki a kansa da injin sake tayar da zuciya kafin zuciyar tasa ta sake bugawa da kanta. An ce yayi magana da likitoci ranar litinin.
Mahaifinsa, Marcel Muamba, yace Muamba yana murmurewa duk ad cewa har yanzu yana cikin matsanancin hali, kuma ya roki jama’a da su ci gaba da yi masa addu’a.
A duk fadin nahiyar Turai, ‘yan wasan Tamaula sun sanya rigunan nuna jimami ga Muamba wadanda a jiki aka rubuta “Allah Kawo Sauki Fabrice” ko kuma “Get Well Soon fabrice” a turance.

Kungiyar kwallon kafa ta Barcelona tana cikin wadanda suka ware lokaci musamman domin jimamin wannan abu da ya samu Muamba. Shi ma shugaban hukumar kwallon kafa ta duniya, FIFA, Sepp Blatter, yayi magana da shugaban kungiyar Bolton, ya kuma nemi da a rika sanar da shi halin da Muamba yake ciki.
Kungiyar Bolton ta ce irin sakonnin fatar alherin da ta rika samu, ta ke kuma kan samu daga magoya bayan kungiyoyi dabam-dabam a fadin duniya, abin ya shige misali.