Chelsea Ta Kori Andre Villas-Boas

Posted March 4th, 2012 at 4:23 pm (UTC+0)
2 comments

Andre Villas-Boas

Andre Villas-Boas


Ina cire hula ta ma Mohammed Dan Indiya, domin tun ranar da na fara rubutu a wannan dandalin, yayi mini hasashen cewa Chelsea zata kori Andre Villas-Boas.
Yau ina tashi ke nan sai na yi ta ganin sakonnin cewa a karshenta dai Roman Abramovich ya kori Villas-Boas, kuma ya maye gurbinsa da mataimakin manaja Roberto Di matteo, tsohon dan wasan ita Chelsea din, wanda zai jagoranci kungiyar har zuwa karshen shekara.
Tun lokacin da Abramovich dan kasar Rasha ya sayi Chelsea a shekarar 2003, kungiyar ta lashe Premier sau 3, ta lashe kofin FA (kalubalenka na Ingila) sau 3, ta kuma lashe lig-lig na Turai sau biyu.
Amma ba ta taba lashe kofin Zakarun Kulob-Kulob na Turai ba, kofin da aka ce shi mai kulob din ya fi kwadayin lashewa a kan komai.
Babban abinda ya kara fusata Ambramovich shi ne cewa yanzu Chelsea ta koma ta 5 a teburin Premier bayanda ta West Bromwich Albion ta doke ta jiya asabar, kuma a karon farko tun 1979.
Wannan shi ne karo na 8 cikin shekaru 9 da kulob din Chelsea zata shiga cikin kasuwar neman manaja.

Robin van Persie Ya Harbe ‘Yan Liverpool

Posted March 3rd, 2012 at 4:12 pm (UTC+0)
3 comments

Kyaftin na Arsenal Robin Van Persie, a hagu, yana murnar kwallon da ya jefa a ragar 'yan Liverpool tare da abokin wasansa Theo Walcott, a dama. Kwallon da ya jefa ana dab da tashi shi ya tsame wa 'yan Arsenal kitse a wuta a wannan karon batta ta yau asabar da suka yi a Anfield.

Kyaftin na Arsenal Robin Van Persie, a hagu, yana murnar kwallon da ya jefa a ragar 'yan Liverpool tare da abokin wasansa Theo Walcott, a dama. Kwallon da ya jefa ana dab da tashi shi ya tsame wa 'yan Arsenal kitse a wuta a wannan karon batta ta yau asabar da suka yi a Anfield.


‘Yan Liverpool sai dai kuyi hakuri yau kam, amma a gaskiya kyaftin na ‘yan Arsenal, Robin van Persie, ya burge yau, domin ya tsame musu kitse a wuta a karawar da suka yi a gidan ‘yan Liverpool din.
Da farko, Laurent Koscielny yayi kuskuren jefa kwallo a ragarsu a bayan da mai tsaron gida na Arsenal ya burge ta hanyar tsare bugun fenariti na Dirk Kuyt.
Robin van Persie ya ramo wannan kwallon guda.
Ana dab da tashi kuma, sai kyaftin din dan asalin kasar Netherlands ya jefa kwallo na biyu, ya ba kungiyarsa nasara da ci 2-1.
Wannan nasara tana nufin cewa a yanzu Arsenal tana bayan Tottenham Hotspur da maki hudu ne kawai a matsayi na 4 (Hotspur tana matsayi na uku a Premier).
Gobe lahadi, Tottenham kuma zata kara da kungiyar dake gabanta a rukunin na Premier, Manchester United.

Real Madrid ko FC Barcelona?

Posted March 1st, 2012 at 8:00 pm (UTC+0)
25 comments

Cesc Fabregas na kungiyar Barcelona FC yana rubuta hatiminsa "Signature" ma wani dan kallo, amma kuma a jikin rigar Mesut Ozil na abokiyar adawarsu kungiyar Real Madrid ranar talata 28 Fabrairu 2012. Wai ba ya kishin kulob dinsa ne?
Maki 10 cur kungiyar Real Madrid ta ba FC Barcelona a wasannin lig-lig na Primera Division a kasar Spain. Za ka yi zaton cewa ‘yan wasan Barcelona su na cike da haushin Real Madrid, amma a ranar talatar nan an ga Fabregas yana rubutu a jikin rigar dan wasan Real Madrid!
Abin kamar almara. Wasu ‘yan kallo a Malaga a kasar Spain suka tare ‘yan wasan kasar su na neman su buga musu hatimi (signature) domin su ajiye saboda tarihi. ‘Yan wasan Spain su na can ne domin buga wasan sada zumunci da ‘yan Venezuela.
Daga cikin ‘yan wasan har da Cesc Fabregas, dan wasan tsakiya na Barcelona, wanda wani dan kallo ya mika masa rigar dan wasan Real Madrid Mesut Ozil, amma maimakon yace ya mika wani abu ya sanya masa hannu a kai, sai kawai ya buga hatimin nasa a jikin rigar dan Real Madrid, kamar su ba kishiyoyi ba.
Watakila kunya yake ji, ko kuma ba ya son bata ma wannan yaro rai, amma ai kowa ya san cewa Barcelona tana cikin jinin Fabregas. Ko kuma dai bai karanta abinda ke jikin rigar ba ce, wallahu ya alamun.
Wani mai sharhi, Brooks Peck ma cewa yayi watakila bai karanta jikin rigar ya gani ba, domin kuwa da yana karance-karance da yawa, to da ba abinda zai taba kai shi birnin London a kasar Ingila.
Hmmm, wa ya sani!!

Kaico, Rwanda Ta Gagari ‘Yan Super Eagles

Posted February 29th, 2012 at 5:46 pm (UTC+0)
4 comments

Magoya bayan Super Eagles na Najeriya a Abuja, lokacin da Super Eagles ta kara da Ethiopia, lahadi 27 Maris, 2011

Magoya bayan Super Eagles na Najeriya a Abuja, lokacin da Super Eagles ta kara da Ethiopia, lahadi 27 Maris, 2011


Anya kuwa abinda ya faru game da gasar cin kofin kasashen Afirka ta Cup of Nations da aka kammala kwanakin baya, ba zai sake faruwa ga Najeriya ba a gasa ta gaba a 2013 ba?
Duk da cewa an buga wannan wasa ne a Kigali, babban birnin Rwanda, zaton kowa ne cewa Najeriya zata yi kaca-kaca da ‘yan wasan Rwanda wadanda ake kira WASP. Amma abin sam bai yiwu ba.
Wannan kuma shi ne karon farko da Stephen Keshi yake jagorancin kungiyar ta Super Eagles zuwa wata gasa ta zahiri.
Wai shin menene ra’ayinku a game da wannan abin kaico? A rubuta mana ra’ayi a kasa.

Manchester City ko Manchester United?

Posted February 24th, 2012 at 9:22 pm (UTC+0)
5 comments

David Silva na Manchester City (dama) yana kokarin kwace kwallo daga kafar Wayne Rooney na Manchester United a karawar da suka yi na gasar cin Kofin FA a filin wasan Etihad dake birnin Manchester, Ingila, ran Lahadi 8 Janairu 2012.

David Silva na Manchester City (dama) yana kokarin kwace kwallo daga kafar Wayne Rooney na Manchester United a karawar da suka yi na gasar cin Kofin FA a filin wasan Etihad dake birnin Manchester, Ingila, ran Lahadi 8 Janairu 2012.


Maki biyu kadai ya raba tsakanin kungiyoyin kwallon kafa guda biyu dake sama a wasannin Premier League na Ingila, makwabtan juna kuma ‘yan gari guda Manchester City da Manchester United. Ga shi an riga an buga kimanin kashi biyu cikin uku na wasannin.
A zane a takarda, sai mutum ya ga kamar Manchester United ba zata iya share maki biyu da ‘yan City suka ba ta rata da su ba. Misali, idan aka dubi wasanni shida dake tafe na kungiyoyin biyu, United zata kara da kungiyoyi biyu dake cikin guda 10 na saman wannan rukunin Premier, watau Norwich City da Tottenham, yayin da City zata kara da guda ce kawai watau Chelsea. Amma ba ta nan take ba.
An san Man U da bayarda mamaki a wasu lokutan. Kuma ga shi City tana fama da matsalar Carlos Tevez, koda yake Roberto Mancini ya furta cewa shi ba ya da matsala da dan wasan gaban, kuma zai iya komowa cikin mako biyu ko uku.
Af, ga shi kuma dukkansu biyu zasu sake haduwa a gasar cin kofin kasashen Turai ta Europa League, wasan da manyan kungiyoyi irinsu a can baya suke rainawa.
Hausawa suka ce ba a san maci tuwo ba sai miya ta kare.
A wanne kuke: Manchester City ko Manchester United?

Me Naira Miliyan 62 Zai Yi Maka?

Posted February 22nd, 2012 at 6:31 pm (UTC+0)
10 comments

Thiery Henry


Zai iya gina maka tankin kifi, idan kai ne Thiery Henry.
Idan da ni ne nake da wannan kudi haka, to da abinda zan fara yi shi ne in yi ritaya daga aikin jarida, in fara noma ko in kafa wata masana’anta inda mutane masu yawa za su samu aikin yi.
Amma wannan ba shi ne tunanin shahararren dan kwallon nan na Faransa, Thiery Henry ba, domin ya ware wannan kudi ne za a gina masa tankin ajiye kifi na kallo a cikin gidansa.
Jaridar “The Daily Mail” ce ta ke cewa Henry zai gina sabon gida, mai hawa 4, kuma daya daga cikin sabbin abubuwan da za a yi masa, shi ne wani tankin gilashi na ajiye kifi, mai tsawon kafa arba’in daga kasa zuwa sama, kuma mai fadin kafa 15.
Watau tankin kifin zai taso tun daga hawan farko har zuwa hawa na hudu a wannan gida.
Kudinsa, Dala dubu 400, ko Naira Miliyan 62!! Cafdi
A bayan Naira Miliyan 62 na gina wannan tanki, Henry zai rika kashe sama da Naira miliyan 3 a kowace shekara wajen kula da wannan tankin kifi da kuma kifaye guda 300 da tankin zai iya dauka. Hmmm
Kudi na gwamna masu gida rana.
Idan da kai ne, me za ka yi da wannan kudi Naira miliyan 62?

Zakarun Kulob-Kulob Na Turai

Posted February 21st, 2012 at 4:09 pm (UTC+0)
13 comments

Yaya Toure

Yaya Toure

Yau da gobe sai Allah in ji Hausawa.
A yau talata, Chelsea da Napoli, sai kuma Real Madrid da CSKA Moscow.
Gobe laraba, Inter Milan da Marseille sai kuma Bayern Munich da Basel.
Ga abinda na ji wasu kwararru su na fada:
Napoli zata ci wasan yau talata da yake a gidanta ake yi, amma Chelsea zata ci zagaye na biyu kuma ita zata haye zuwa gaba.
Real Madrid zata lashe wasanta na yau duk da cewa a Moscow ake wasan a gidan ‘yan CSKA, kuma zata wuce zuwa gaba.
Inter Milan zata kashi gobe laraba a hannun ‘yan Marseille, kuma ba zata kai labari ba, ‘yan Marseille su zasu zarce.
Bayern Munich zata doke Basel na Switzerland a yau da kuma zagaye na gaba, ta wuce zuwa ga wasanni na gaba.
Ni dai a taya ni duba hanya, wai makaho na son yin tsegumi. Na dai san tun da aka fara gasar zakarun kolb-kulob na Turai na bana, kwallaye biyu kawai aka jefa a ragar ‘yan Real Madrid a lokacin da ake rukuni-rukuni.
Babu wanda aka fi neman kassarawa a fili lokacin wasannin kamar Franck Ribery na Bayern Munich wanda aka yi ma (foul) har sau 23.
Daga cikin kungiyoyi 16 da suka rage, Chelsea ce kawai ba ta aikata laifi da yawa ba a zagayen rukuni-rukuni na gasar, inda aka hura mata wusur na laifi (foul) sau 61 kawai.
Ba a san maci tuwo ba sai miya ta kare. Akwai wanda zai yi mini karin haske kan wannan gasar?

Maraba Da Zuwa Dandalin Tamaula

Posted February 20th, 2012 at 4:07 pm (UTC+0)
29 comments

Didier drogba ke kokarin shan kwallo

Ba tare da dogon sutrutu ba, kuma ba tare da na cika ku da surkulle ba, ina son in yi muku marhabin zuwa ga wannan sabon dandalin, inda ni da ku za mu rika musanyar miyau kan tamaula.
Tamaula kama daga kan kananan kulob-kulob namu a gida Najeriya, har zuwa Premier League na Najeriya zuwa ga kungiyar kwallon kafa ta kasa da na kasashen Afirka.
Kai har da kulob-kulob na Turai, don kwanakin baya na ga wani aboki na yana zumudi sosai kan wata kungiyar da yake goyon baya a Ingila (ba zan fadi sunanta domin kada in fusata ‘yan saho nata dake karanta wannan).
Idan akwai wani labari da dumi-duminsa na kwallon kafa, daga ko ina ne a duniya, za ku iya shigowa cikin zauren nan, ku sheke ayarku (idan dai ba kungiya ta ce ta sha kashi ba).
Amma ban da zare idanu. Ban da kuma ashar, Mu tattauna cikin tsanaki, wanda bai ji dadin sakamakon kwallon ranar ba, to sai yayi ma kansa kiyamullaili, ya sha Panadol Night ya je yayi barci, watakila kafin gari ya waye zai mance, ya komo mu ci gaba da muhawara.
Maraba, daga Ibrahim Alfa Ahmed.

About

Shafin Tamaular Duniya

Dandalin wadanda ke sha’awa, kuma suka san abinda zasu iya fada kan kwallon kafa. Yaro ba ya wargi!!

Categories

Calendar

March 2024
M T W T F S S
« Feb    
 123
45678910
11121314151617
18192021222324
25262728293031