ولي العهد السعودي: محمد بن سلمان هو المسؤول عن وفاة الأمير سعود الفيصل

Posted April 19th, 2011 at 8:30 pm (UTC-5)
Leave a comment

2015/07/12
http://i59.tinypic.com/s1hr0n.jpg

أفاد مصدر مقرب من صاحب السمو ولي العهد السعودي الأمير محمد بن نايف أن الأخير يواصل انتقاداته الشديدة اللهجة لولي ولي العهد الأمير محمد بن سلمان وذلك على خلفية مقتل الفريق ركن محمد بن أحمد الشعلان قائد القوات الجوية السعودية أضافة إلى اختفاء الممرض الخاص بوزير الخارجية السابق الأمير سعود الفيصل الذي توفي مؤخرا

وأكد هذا المصدر الذي طلب عدم الكشف عن اسمه أن صاحب السمو ولي العهد لا يتوقف عن توجيه الانتقادات اللاذعة للأمير محمد بن سلمان وقد حصلت مشادة كلامية حادة بينهما غداة وفاة الأمير سعود الفيصل

وتابع المصدر أن سمو الأمير محمد بن نايف يصرح دائما وفي كل اللقاءات بأن محمد بن سلمان يعمل على إبادة العائلة المالكة عن آخرها وأنه كان هو المسؤول عن إقالة الأمير سعود الفيصل بشكل صادم وغير لائق بينما الرجل كان قد أسدى خدمات جليلة مدة بقاءه في منصبه منذ اربعين عاما وكان يستحق التكريم وليس الإذلال معتبرا أن “محمد بن سلمان هو المسؤول الحقيقي عن وفاة الفيصل” حسب قوله

عێراق له‌ پاش هه‌شت ساڵی ئازادبوون

Posted April 11th, 2011 at 1:50 pm (UTC-5)
1 comment

هه‌ر پاش داڕمانی په‌یکه‌ره‌که‌ی سه‌دام حسێن دیکتاتۆری پێشوی عێراق له‌ ساڵی 2003 دا له‌ ئاکامی هێرشی هاوپه‌یمانانی به‌سه‌رکردایه‌تی وڵاته‌ یه‌کگرتووه‌کانی ئه‌مریکا، ده‌ستبه‌جێ تارماییه‌کانی ترس و تۆقاندن و سه‌رکوتکردن ده‌ستی به‌ ڕه‌وینه‌وه‌ کرد له‌ عێراقێکدا که‌ چه‌ندان ساڵ بوو ، نه‌ ڕێز بۆ پره‌نسیپه‌کانی مافه‌کانی مرۆڤ داده‌نرا و سیاسه‌تی پارتی پێشڕه‌و و سه‌رکرده‌ وڵاته‌که‌ی به‌ڕێوه‌ ده‌برد.  یه‌کێکیش له‌و میکانیزمانه‌ی به‌رده‌وام له‌ ماوه‌ی فه‌رمانڕه‌وایه‌تیه‌که‌ی سه‌دام حسێندا کاری پێده‌کرا بریتی بوو له‌( جێبه‌جێی بکه‌ ئه‌وجا بڕیار بده) بوو. به‌کارهێنانی ئه‌م جۆره‌ میکانیزمه‌ ته‌نها به‌ مه‌به‌ستی سه‌رکوتکردن و قڕوقه‌پ پێکردنی عێراقیه‌کان بوو له‌ هه‌موو ڕوانگه‌یه‌که‌وه‌.

له‌و هه‌ل و مه‌رجه‌ی ئه‌وسای عێراقدا، بوون به‌ ئۆپزسیۆن هه‌روا سانا نه‌بوو. یه‌کێک له‌ سیاسه‌ته‌ ترسناکه‌کانی تری  ڕژێمه‌که‌ی سه‌دام حسێن‌ بۆ درێژه‌ دان به‌ ته‌مه‌نی خۆی، سیاسه‌تی ڕه‌ش و سپی بوو ، به‌و مانایه‌ی” یان له‌گه‌ڵـمدایت یان ئه‌وه‌تا دوژمنمیت”. زانراویشه‌ ئه‌وی له‌گه‌ڵ سیاسه‌ته‌کانی ئه‌و ڕژێمه‌ی عێراقدا نه‌بووبێت یان کوژراوه‌ یانیش له‌ یه‌کێک له‌ زیندانه‌ نهێنی یان ئاشکراکاندا گیر کراوه‌ یانیش وڵاته‌که‌ی جێهێشتووه‌.

به‌هۆی سیاسه‌ته‌ شه‌ڕانگێزیه‌کانی سه‌دام حسێنه‌وه‌ له‌سه‌ر هه‌ردوو ئاستی ناوخۆ و ده‌ره‌وه‌ییش، (شه‌ڕی هه‌شت ساڵه‌ی عێراق –  ئێران وه‌ شه‌ڕی عێراق – کوێت)  له‌ ناوه‌وه‌ش (شه‌ڕی درێژ خایه‌ن له‌گه‌ڵ کورده‌کان له‌ باکور و شیعه‌کانیش له‌ باشور) عێراقی ده‌وڵه‌مه‌ند به‌ نه‌وت ، قه‌رزێکی زۆری به‌سه‌ردا که‌ڵه‌که‌ بوو.

به‌شی شێری بودجه‌ی وڵاته‌که‌ ته‌رخان کرابوو بۆ پیشه‌سازی له‌شکری ، نه‌ک بۆ ئاوه‌دانکردنه‌وه‌ی وڵا‌ته‌که‌ و هه‌نگاو نانی به‌و شێوه‌یه‌ی پێویست بوو تا بتوانێت له‌گه‌ڵ ڕه‌وتی پێشکه‌وتنه‌کانی جیهاندا بڕوات. به‌رنامه‌ی سه‌ره‌کی له‌و پیشه‌سازیه‌ له‌شکریه‌ی عێراقی سه‌دام حسێندا دروستکردنی چه‌کی کۆمه‌ڵ کوژی بوو (چه‌کی کیمیای و بایۆلۆژی) وه‌ ئه‌م چه‌کانه‌ی دژی کورده‌کان و شیعه‌کان به‌کار هێناوه‌ و هه‌روه‌هاش وه‌ک ده‌گوترێت له‌ شه‌ڕه‌کانی ئێران و کوێتیشدا به‌کارهێنراون‌.

زۆرێک له‌ لایه‌نه‌کانی ئۆپزسیۆنی عێراقی له‌ ئێران بوون یانیش دۆستایه‌تیه‌کی زۆریان هه‌بووه‌ له‌گه‌ڵ ئێرانیه‌کاندا له‌سه‌ر ئه‌و بنچینه‌یه‌ی دوژمنی دوژمنم دۆستمه‌.

ڕوخانی ڕژێمه‌که‌ی سه‌دام حسێن خه‌ونی زۆربه‌ی عێراقیه‌کان بوو، به‌ تایبه‌تی کورده‌کان و شیعه‌کان،  به‌ڵام پێده‌چێت بۆ زۆرێک له‌ عه‌ره‌به‌ سوننه‌کان ئه‌و خه‌ونه‌ گه‌وره‌یه‌ نه‌بووبێت، که‌ له‌و ڕێیه‌وه‌ بتوانن بیر له‌ ئاینده‌یه‌کی باشتری وڵاته‌که‌یان بکه‌نه‌وه.

عه‌ره‌به‌ سوننه‌کان له‌گه‌ڵ ئه‌وه‌شدا که‌مایه‌تین له‌ عێراقدا به‌ڵام له‌ سه‌ره‌تای دامه‌زراندنی حکومه‌تی عێراقه‌وه‌ له‌ سه‌ره‌تای ساڵانی بیسته‌کانی سه‌ده‌ی ڕابردووه‌وه‌ ‌، ده‌سه‌ڵاتیان له‌ ده‌ستدا بووه‌ و هه‌ر ئه‌وان له‌ کۆشکه‌کانی سه‌روه‌ختی پادشایه‌تی و کۆماریی عێراقدا بوون.

ڕوخاندنی ڕژێمه‌ تاک ده‌سه‌ڵاته‌که‌ی پارتی به‌عسی عه‌ره‌بی سۆشیالیستی ، له‌ ساڵی 2003 دا سه‌ره‌تایه‌ک بوو بۆ عێراقیه‌کان تا ده‌ستبکه‌ن به‌ ڕه‌خساندنی زه‌مینه‌یه‌کی نوێ له‌ وڵاته‌که‌یاندا بۆ هێنانه‌ ئارای ژینگه‌یه‌کی دیموکراسیانه‌ که‌ ئه‌زموونێکی نوێ بوو بۆیان.

ئه‌م سیسته‌مه‌ نوێیه‌ی دیموکراسی له‌ عێراقدا وه‌ک زۆرێک له‌ چاودێرانی سیاسی جه‌ختیان لێده‌کرده‌وه‌ له‌ به‌رژه‌وه‌ندی زۆرێک له‌ وڵاتانی ڕۆژهه‌ڵاتی ناوه‌ڕاستدا نه‌بووه‌ ، له‌وانه‌ کۆماری ئیسلامی ئێران.

ئێران ، وڵاته‌ دۆسته‌که‌ی ئۆپزسیۆنی عێراقی به‌تایبه‌تی لایه‌نه‌ شیعه‌کان ، له‌ ساڵی 2003 ه‌وه‌ وه‌ک گه‌وره‌ به‌رپرسانی عێراقی و هاوپه‌یمانانیش باسیان ده‌کرد و باسیشی ده‌که‌ن به‌رده‌وامه‌ له‌ ده‌ستێوه‌ردانی کاروباری ناوخۆی عێراقدا.

وه‌نه‌بێت هه‌ر ته‌نها کۆماری ئیسلامی ده‌ستی له‌ ناو ڕووداوه‌کانی عێراقدا هه‌بێت ، زۆرێک له‌ وڵاتانی تری دراوسێی عێراق ، هه‌ر یه‌ک و به‌پێی به‌رژه‌وه‌ندی خۆی ئه‌جه‌ندای تایبه‌تی هه‌یه‌ و کاریشی بۆ کردووه‌، له‌وانه‌ تورکیا و شانشینی عه‌ره‌بستانی سعودیه‌ و سوریا.

عیراق به‌ شه‌ڕێکی خوێناوی ناوخۆییدا ڕۆیشت ، شیعه‌کان و سوننه‌کانی وڵاته‌که‌ یه‌ک ئه‌وی تری گوناهبار ده‌کرد به‌وه‌ی له‌پشت ئه‌و شه‌ڕه‌وه‌ن که‌ هه‌زاران که‌سی تیادا کوژران.

متمانه‌ به‌ یه‌ک نه‌کردنی لایه‌نه‌ عێراقیه‌کان یه‌کێکه‌ له‌ گرفته‌ سه‌ره‌کیه‌کانی عێراقی به‌شه‌ڕ وێرانبوو.

له‌پاش هه‌ڵبژاردنه‌که‌ی مانگی 3 ی ساڵی 2010 ، ناکۆکیه‌ سیاسیه‌کان گه‌یشته‌ ئه‌و ئاسته‌ی پێکهێنانی حکومه‌ت بۆ نزیکه‌ی نۆ مانگ دوا بکه‌وێت و لایه‌نه‌کان به‌ گه‌وره‌ و بچوکیانه‌وه‌ بکه‌ونه‌ سه‌ردان کردنی وڵاتانی ناوچه‌که‌ به‌ گشتی و وڵاتانی دراوسێش به‌ تایبه‌تی بۆ چاره‌سه‌رکردنی ئه‌و قه‌یرانه‌ سیاسیه‌ی عێراقی نوێی گرتۆته‌وه‌.

ئه‌و جۆره‌ هه‌نگاوانه‌ش ده‌رفه‌ته‌کانی بۆ ده‌ستێوه‌ردانی ده‌ره‌کی له‌ عێراقدا زیاد کردو هۆکارێکیش بوو بۆ هه‌روادێ و زیادبوونی گومانه‌کانی عێراقیه‌کان له‌وه‌ی وابه‌سته‌ بوون به‌ وڵاتێکه‌وه‌ که‌ ناوی عێراقه‌ له‌لایه‌ن ڕێبه‌رانی عێراقیه‌وه‌ مه‌سه‌له‌یه‌ک نییه‌ گرنگی پێبدرێت. عێراقیه‌کان ده‌ڵێن چاره‌سه‌رکردنی کێشه‌کان ده‌بێت له‌ به‌غداد بێت نه‌ک له‌ پایته‌خته‌کانی تر.

له‌ ساڵی 2003 وه‌ هه‌موو هه‌نگاوێکی سیاسی عێراق به‌ گونجاندن و ڕێکه‌وتنی سیاسیانه‌ بووه‌ ، واته‌ ئه‌وه‌ی پێی ده‌ڵێن ته‌وافوق.

پێکهێنانی حکومه‌ته‌کانیش به‌مه‌ی ئێستاشه‌وه‌ هه‌ر له‌سه‌ر بنچینه‌ی هاوبه‌شیکردن بووه‌. عێراقیه‌کان نه‌یانتوانیوه‌ حکومه‌تێک پێکبێنن له‌ سه‌ر بنچینه‌ی زۆرترایه‌تی ، هه‌رچه‌نده‌ له‌ ئێستادا لێره‌ و له‌وێی به‌غدادا ئه‌ جۆره‌ بیرکردنه‌وه‌یه‌ قسه‌ی له‌سه‌ر ده‌کرێت و بۆته‌ بابه‌تێک بۆ گفت و گۆ ، به‌ڵام تا چه‌ندێک ئه‌و بیرۆکه‌یه‌ سه‌رده‌گرێت ، هێشتا دیار نییه‌.

عێراق که‌ وڵاتێکی فره‌ نه‌ژاد و فره‌ ئایین و ئاینزایه‌ ، پێویستی به‌ ڕێکخستنێکی بابه‌تیانه‌ هه‌یه‌ تا بتوانرێت هاوسه‌نگیه‌کی به‌رچاو له‌ هاوکێشه‌کانی به‌ڕێوه‌بردنی عێراقدا بێنه‌ ئاراوه‌ و له‌وێشه‌وه‌ نه‌خشه‌سازی بۆ ئاینده‌ی وڵاته‌که‌ بکرێت

.

مه‌رجی گه‌ڕانه‌وه‌ی متمانه‌ی نێوان پێکهاته‌کانی عێراق و دابه‌شکردنی یه‌کسانانه‌ی داهاته‌کانی عێراق له‌سه‌ر بنچینه‌ی ڕێژه‌یه‌کی دروستی دانیشتوان و به‌شداریه‌کی ڕاسته‌قینه‌ی پێکهاته‌کان له‌ نێوه‌نده‌کانی بڕیارداندا و ده‌ستبه‌ردار بوون له‌ دیارده‌ی گه‌ڕانه‌وه‌ بۆ پایته‌خته‌کانی تر ، ئه‌مانه‌ وه‌ک چاودێران جه‌ختی لێده‌که‌نه‌وه‌، ده‌روازه‌یه‌ بۆ نه‌هێشتنی یان هه‌ر هیچ نه‌بێت که‌م کردنه‌وه‌ی ئه‌و بۆشاییه‌ی که‌وتۆته‌ نێوان خه‌ڵک و ده‌سه‌ڵات له‌ عێراقدا و سه‌ره‌تای ڕێگه‌یه‌کیش ده‌بێت وه‌ک ده‌گوترێت بۆ ساڕێژ کردنی ئه‌و زامانه‌ی هه‌ر یه‌که‌یان ڕه‌گ و ڕیشه‌ی مێژوویی خۆی هه‌یه‌ له‌ عێراقدا.

هه‌تا ئێستاشی له‌گه‌ڵدا بێت سه‌قامگیری سیاسی له‌ عێراقدا نه‌هاتۆته‌ ئاراوه‌ و زۆرێک له‌ ڕێبه‌رانی عێراقیش هێنده‌ی ئه‌وه‌ی کار له‌سه‌ر به‌رژه‌وه‌ندی تاک لایه‌نه‌یان ده‌که‌ن و گوێ به‌ ڕێنوماییه‌کانی وڵاتانی تر ده‌ده‌ن ،  هێنده‌ نه‌ کار له‌سه‌ر عێراقی بوونی خۆیان و نه‌ کاریش له‌سه‌ر به‌رژه‌وه‌ندی عێراق ده‌که‌ن.

هه‌شت ساڵ پاش ده‌ستپێکردنی مێژوویه‌کی نوێ له‌ عێراقدا ، هێشتاش کورده‌کان کێشه‌ی هه‌ڵپه‌سێردراویان له‌گه‌ڵ به‌غدادا ماوه‌ ، وه‌ک یه‌کلایی کردنه‌وه‌ی چاره‌نوسی ناوچه‌ جێناکۆکه‌کان ، بودجه‌ ، کێشه‌ی سووته‌مه‌نی و ووزه‌ ، هێزی پێشمه‌رگه‌ی کوردستان ….هتد.  شیعه‌کان ئه‌و متمانه‌یه‌ به‌ عه‌ره‌به‌ سوننه‌کان ناکه‌ن تا پۆسته‌ هه‌ستیار و سه‌ره‌کیه‌کانی وڵاته‌که‌یان له‌ده‌ستدا بێت و سوننه‌کانیش ناخوازن شیعه‌کان خاوه‌نی یه‌که‌م و دوا بڕیار بن له‌ عێراقدا، ئه‌م ئاڵۆزیانه‌ش هاوکاته‌ له‌گه‌ڵ ئه‌وه‌ی یه‌ک به‌ یه‌کی پێکهاته‌کان به‌ چاوی پڕ گومانه‌وه‌ له‌ به‌رامبه‌ره‌که‌ی ده‌ڕوانێت.

که‌واته‌ جێی خۆیه‌تی بپرسین ، هه‌شت ساڵ پاش ئازادکردنی عێراق ، ئاینده‌ی ئه‌م وڵاته‌ به‌ره‌و کوێ؟؟؟

بۆ زانیاری زیاتر له‌سه‌ر ناکۆکیه‌ سیاسیه‌کانی عێراق ده‌توانییت کلیکی ئه‌م دوو لینکه‌ی لای خواره‌وه‌ بکه‌یت ، یه‌که‌میان دکتۆر سامان فه‌وزی و دووه‌میشیان حه‌سه‌ن جیهاد ، ئه‌نادامانی په‌رله‌مانی عێراق له‌سه‌ر ئه‌م بابه‌ته‌ ده‌دوێن

http://www.voanews.com/kurdish/news/dr_saman_fawzi_apr09-119530619.html

http://www.voanews.com/kurdish/news/hasan_jihad_apr10-119566299.html

 

ئایا درووسته‌ کێشه‌کانی هه‌رێمی کوردستانی عێراق ببرێنه‌ په‌رله‌مانی عێراقه‌وه؟

Posted March 18th, 2011 at 6:56 pm (UTC-5)
2 comments

هاوکاتی به‌رده‌وامی خۆپیشاندانه‌کان و ئه‌وه‌ی به‌ پشێوی سیاسی له‌ هه‌رێمی کوردستانی عێراقدا ناودێر ده‌کرێت ، پێده‌چێت هه‌نگاوی خۆی نابێت بۆ ناو په‌رله‌مانی عێراقیشدا.

ئه‌م جۆره‌ په‌ره‌سه‌ندنه‌ی کێشه‌کان نیگه‌رانیه‌کی زۆری دروستکردوه‌ ، له‌و ڕوانگه‌یه‌وه‌ی ناکۆکیه‌ سیاسیه‌کان ببنه‌ ته‌گه‌ره‌ و گرفت له‌به‌رده‌م ئه‌و داوایانه‌ی کورده‌کانی عێراقدا که‌ هه‌یانه‌ بۆ ئاینده‌ی هه‌رێمه‌که‌یان.

په‌رله‌مانتارانی کورد له‌ به‌غدا وه‌ها باسی ده‌که‌ن هه‌ریه‌ک له‌و داوایانه‌ ڕه‌گ و ڕیشه‌ی مێژوویی خۆیان هه‌یه‌ و جێبه‌جێکردنی هه‌ر یه‌ک له‌و داوایانه‌ ده‌بێته‌ کۆڵه‌که‌ بۆ ئاینده‌ی هه‌رێمه‌که‌.

پێشتر ئه‌و کاته‌ی فراکسیۆنی گۆڕان کشانه‌وه‌ی خۆی له‌ هاوبه‌ندی فراکسیۆنه‌ کوردستانیه‌کان ڕاگه‌یاند ، ده‌سبه‌جێ ئه‌وه‌ ڕاگه‌یه‌ندرا ، ئه‌و جیابوونه‌وه‌یه‌ هیچ گرفتێک بۆ گوتاری کوردی له‌ په‌رله‌مانی عێراقدا دروست ناکات ، به‌ڵام ئێستا وه‌ک ده‌گوترێت باره‌که‌ به‌ ئاقارێکی تردا ده‌ڕوات و پێده‌چێت کاریگه‌ریش بکاته‌ سه‌ر ئه‌و به‌رنوسی یاسایانه‌ی ده‌رهه‌ق به‌ مافه‌کانی کورد له‌ په‌رله‌ماندا ده‌خرێنه‌ ڕوو.  ئه‌م جۆره لێکدانه‌وه‌یه‌ش پاش قووڵ بوونه‌وه‌ی ناکۆکیه‌کانی نێوان فراکسیۆنی گۆڕان و هاوپه‌یمانی کوردستان دێت له‌ په‌رله‌مانی عێراقدا.

هه‌ندێک له‌ ئه‌ندامانی فراکسیۆنی کوردستانی ده‌ڵێن ئه‌وه‌ی له‌ ناو په‌رله‌مانی عێراقدا ڕووده‌دات ، بێ له‌ کێشه‌ی لابه‌لا هیچ شتێکی تر نین و له‌ هه‌ندێک ووتار و ووتاردان زیاتر تێپه‌ڕ ناکات ، به‌ڵام هه‌نێکی تریش ده‌ڵێن ئه‌و جۆره‌ ناکۆکیانه‌ له‌ جیابوونه‌وه‌ی گۆڕان له‌ هاوبه‌ندی فراکسیۆنه‌ کوردیه‌کانه‌وه‌ ده‌ست پێده‌کات و له‌وێشه‌وه‌ گۆڕان ده‌ستی کردووه‌ به‌ هه‌وڵدان بۆ ناشرینکردنی ئه‌زموونی هه‌رێمی کوردستان له‌ په‌رله‌ماندا.

له‌ هه‌مان ده‌مدا  نوێنه‌رانی بزوتنه‌وه‌ی گۆڕان له‌ په‌رله‌مانی عێراق ده‌ڵێن ، هه‌ر له‌ سه‌ره‌تاوه‌ گۆڕان داوایکردووه‌ به‌غدا شوێنی چاره‌سه‌رکردنی کێشه‌ نه‌ته‌وه‌ییه‌کان بێت ، به‌ڵام به‌ده‌نگه‌وه‌ نه‌چونی ئه‌و کێشانه‌ له‌لایه‌ن ده‌سه‌ڵاتدارانی هه‌رێمه‌که‌وه‌ و نه‌گه‌یشتنه‌ هیچ ئه‌نجامێک له‌گه‌ڵیاندا وایکردووه‌ ، له‌ به‌غداش بێنه‌ ده‌نگ و به‌شوێن چاره‌سه‌ردا بگه‌ڕێن.

تۆ ئه‌م مه‌سه‌له‌یه‌ چۆن ده‌بینیت؟ بۆ زانیاری زیاتر ده‌توانیت سه‌ردانی ئه‌م لینکه‌ بکه‌یت که‌ تایبه‌ته‌ به‌ به‌رنامه‌ی ئه‌م هه‌فته‌یه‌ی پانۆراما و هه‌ر یه‌کێ له‌ به‌شدار بووان ڕوانینی خۆیان له‌سه‌ر هه‌مان مه‌سه‌له‌ ده‌ده‌ن. نوێنه‌رانی پارتی و یه‌کێتی و گۆڕان و یه‌کگرتووی ئیسلامی له‌م به‌رنامه‌یه‌دا ڕایان وه‌رگیراوه‌.

http://www.voanews.com/kurdish/news/panorama_march18-118245819.html

ڕاو بۆچونی خۆت یاداشت بکه‌.

کۆماری ئیسلامی ئێران و شه‌پۆلی ناڕه‌زاییه‌کانی ڕۆژهه‌ڵاتی ناوه‌ڕاست

Posted March 18th, 2011 at 6:52 pm (UTC-5)
Leave a comment

هه‌ر له‌ سه‌ره‌تای سه‌رهه‌ڵدانی خۆپیشاندانه‌کانی ناڕه‌زایی ده‌ربڕین له‌ ژماره‌یه‌ک وڵاتی ڕۆژهه‌ڵاتی ناوه‌ڕستدا ، گه‌وره‌ کاربه‌ده‌ستانی ئێران نه‌ک هه‌ر ده‌یانگووت به‌ڵکو جه‌ختیان له‌وه‌ ده‌کرده‌وه‌ که‌ ڕووداوه‌کان درێژه‌ی شۆڕشه‌ ئیسلامیه‌که‌‌ی ساڵی 1979 ی ئێرانه.

هاوکات ده‌شگوترێت ئه‌وه‌ی له‌ خاوه‌رمیانه‌دا ڕووده‌دات به‌شێکه‌ له‌ به‌رنامه‌و پلانی وڵاته‌ یه‌کگرتوه‌کانی ئه‌مریکا له‌و ستراتیژیه‌ته‌ی هه‌یه‌تی بۆ ڕۆژهه‌ڵاتی ناوه‌ڕاستی گه‌وره .

هه‌ر بۆ ئه‌و مه‌به‌سته‌ له‌ مێزگردێکدا ، جه‌لیل ئازادیخا ، ئه‌ندامی سه‌رکردایه‌تی کۆمه‌ڵه‌ی زه‌حمه‌تکێشان و هه‌روه‌هاش سه‌فه‌ر ئه‌زیزی ، مامۆستای زانسته‌ سیاسیه‌کان له‌ زانکۆی هارنینگ له‌ دانیمارک وه‌ڵامی ژماره‌یه‌ک پرسیار له‌سه‌ر ئه‌م مه‌سه‌له‌یه‌ ده‌ده‌نه‌وه‌.

بۆ گوێبیستی مێزگرده‌که‌ تکایه‌ کلیکی ئه‌م لینکه‌ی لای خواره‌وه‌ بکه‌.

http://www.voanews.com/kurdish/news/roundtable_feb19-118294024.html

ئایا ئێران ده‌توانێت له‌ڕێی هاوپه‌یمانه‌کانیه‌وه‌ له‌ ناوچه‌که‌دا ئه‌و ڕۆڵه‌ کاریگه‌ره‌ بگێڕێت که‌ ده‌یخوازێت وگۆڕانکاریه‌کان به‌ که‌رخه‌ی خۆیدا به‌رێت؟

ئه‌گه‌ر ئێران شۆڕشه‌که‌ی خۆی به‌ سه‌ره‌تایه‌ک بۆ دیموکراسی داده‌نێت ، ئه‌و هه‌موو ناڕه‌زایی و گازه‌ندانه‌ی گه‌لانی ئێران چین؟

ئایا له‌م هه‌ل و مه‌رجه‌ نوێیه‌ی له‌  ڕۆژهه‌ڵاتی ناوه‌ڕاستدا هاتۆته‌ ئاراوه‌،‌ ئایین ده‌توانێت ڕۆڵێکی به‌رچاوی هه‌بێت له‌ ئاڕاسته‌ کردنی داواکانی خه‌ڵکدا؟

ئازیزانم با دوا پرسیاریشم ئه‌وه‌ بێت ئایا له‌ناو کۆمه‌ڵگاکانی ڕۆژهه‌ڵاتی ناوه‌ڕاستدا ئه‌و جۆره‌ تێگه‌یشتنه‌ له‌ دیموکراسی هه‌یه‌ که‌ بتوانێت زه‌مینه‌یه‌ک بۆ دامه‌زراوه‌ دیموکراسیه‌کان بڕه‌خسێنێت و له‌وێشه‌وه‌ سیسته‌می دیموکراسی له‌ ناو ئه‌و کۆمه‌ڵگایانه‌دا سه‌ر هه‌ڵبدات؟

چاوه‌ڕوانی تێبینی و سه‌رنجه‌کانتانم.

خۆپیشاندانه‌کانی هه‌رێمی کوردستانی عێراق

Posted March 14th, 2011 at 8:09 pm (UTC-5)
3 comments

له‌وه‌تای ڕاپه‌ڕینه‌که‌ی به‌هاری ساڵی 1991 وه‌ له‌کوردستانی عێراقدا ، ‌کورده‌کان هه‌رێمی خودموختاری خۆیان به‌ڕیوه‌ ده‌به‌ن.

له‌ ساڵی 1992 دا هه‌ڵبژاردان کرا و حکومه‌تێکی نیوه‌ به‌ نیوه‌ پێکهێنرا له‌ نێوان پارتی دیموکراتی کوردستانی عێراق و یه‌کێتی نیشتیمانی کوردستاندا و پاش نزیکه‌ی دوو ساڵ شه‌ڕی ناوخۆ ڕوویدا.

ئه‌م شه‌ڕه‌ چه‌ند ساڵێکی خایاند ، تا ئه‌وه‌بوو له‌ وڵاته‌ یه‌کگرتووه‌کانی ئه‌مریکا هه‌ردوو لایه‌نی سه‌ره‌کی شه‌ڕه‌که‌ ڕێکه‌وتنێکیان مۆرکرد و شه‌ڕ کۆتایی هات  ، به‌ڵام تا ساڵی 2003 و ڕوخاندنی ڕژێمه‌که‌ی سه‌دام حسێن به‌ده‌ستی هێزه‌کانی هاوپه‌یمانانی به‌ سه‌رکردایه‌تی ئه‌مریکا ، دوو حکومه‌ت له‌ هه‌رێمه‌که‌دا هه‌بوون، یه‌کێکیان بۆ به‌ڕێوه‌بردنی ناوچه‌کانی ژێر ده‌سه‌ڵاتی یه‌کێتی و ئه‌وی تریشیان بۆ به‌ڕێوه‌بردنی ناوچه‌کانی ژێر کۆنترۆڵی پارتی بوو.

کابینه‌ی پێنجه‌م ده‌ست به‌کار بوو، که‌ به‌ کابینه‌ی یه‌کگرتنه‌وه‌ی ئه‌و دوو حکومه‌ته‌ ناودێر ده‌کرا و به‌ دواشیدا پاش هه‌ڵبژاردنه‌ گشتیه‌که‌ی 25 ی 7ی ساڵی 2009 کابینه‌ی شه‌شه‌م پێکهات ، به‌ڵام وه‌ک زۆرێک له‌ چاودێرانی کاروباری سیاسی هه‌رێمه‌که‌ باسی ده‌که‌ن ئێستاشی له‌گه‌ڵدا بێت دیارده‌ی دوو حکومه‌تی هه‌ر ماوه‌.

له‌ ناوه‌ڕاستی مانگی دوودا ، ئاستی ناڕه‌زاییه‌کانی خه‌ڵک له‌ هه‌رێمه‌که‌دا گه‌یشته‌ ئه‌وه‌ی له‌سه‌ر شه‌قامه‌کان ده‌ری ببڕن و هه‌ر له‌وده‌مه‌شه‌وه‌ له‌ شاری سلێمانی کوردستانی عێراق خۆپیشاندانه‌کان به‌رده‌وامن و مه‌یدانی به‌رده‌رکی سه‌را بۆته‌ بنکه‌ی خۆپیشانده‌ران.

به‌گژدا چونه‌وه‌ی گه‌نده‌ڵی ، دادگایی کردنی ئه‌وانه‌ی ته‌قه‌یان له‌ خۆپیشانده‌ران کرد ، ڕیفۆرمی سیسته‌می سیاسی هه‌رێمه‌که‌ ، ڕوونی و ئاشکرایی له‌ بڕیاره‌ سیاسیه‌کان ، ئاکتیڤ  کردنی په‌رله‌مانی هه‌رێم ، ڕه‌خساندنی ده‌رفه‌ته‌کانی کارکردن ، باشکردنی گوزه‌رانی خه‌ڵک ،دابینکردنی خزمه‌تگوزاریه‌ بنچینه‌ییه‌کان بۆ هاووڵاتیان و چه‌ندان مه‌سه‌له‌ی تریش داوای خۆپیشانده‌رانه‌ له‌ هه‌رێمه‌که‌دا.

له‌م نێوه‌نده‌دا وه‌ک ده‌گوترێت داوای لایه‌نی سیاسیش هه‌ن تێکه‌ڵ به‌ داواکانی خه‌ڵک کراون.

ڕۆشنبیر و ڕوناکبیره‌ دیاره‌کان له‌ هه‌رێمی کوردستانی عێراق له‌ پاڵ خۆپیشانده‌راندان و جه‌خت له‌ داواکانیان ده‌که‌نه‌وه‌.

له‌ به‌رامبه‌ریشدا ده‌سه‌ڵات له‌ هه‌رێمه‌که‌دا پێشنیازی چاکسازی و هه‌ڵبژاردنی پێشوه‌ختی کردووه‌ وه‌ک ڕێگه‌یه‌ک بۆ چاره‌سه‌رکردنی ڕه‌وشی هه‌رێمه‌که‌.

لێره‌دا ژماره‌یه‌ک پرسیار هه‌ن له‌وانه‌ ،

یه‌که‌م: ئایا هه‌ڵبژاردنی پێشوه‌خت یارمه‌تیده‌ر ده‌بێت بۆ چاره‌سه‌رکردنی ڕه‌وشی سیاسی گشتی هه‌رێمه‌که؟

دووه‌م: ئایا ڕێبه‌رایه‌تیکردنی ئه‌و شه‌پۆلی ناڕه‌زاییانه‌ پێویستی به‌وه‌ هه‌یه‌ لایه‌نێکی سیاسی ببێته‌ پێشه‌نگ تیایدا یان هه‌ر خه‌ڵک خۆیان ڕێبه‌رایه‌تی بکه‌ن چاتره‌؟

سێهه‌م: ئایا ئه‌م خۆپیشاندانی ناڕه‌زایی ده‌ربڕینه‌ی هه‌رێمی کوردستانی عێراق به‌شێکه‌ له‌و باهۆزی دیموکراسیه‌ی ناوچه‌ی ڕۆژهه‌ڵاتی ناوه‌ڕستی گرتۆته‌وه‌؟

چواره‌م: پێشبینیه‌کانت چین و ڕووداوه‌کانی هه‌رێمه‌که‌ به‌ چ ئاقارێکدا ده‌ڕوات؟

چاوه‌ڕوانی وه‌ڵام و تێبینی و ڕاو بۆچونه‌کانتانم.

بۆ یه‌کتر ناسین:

ساڵی 1961 له‌ شارۆچکه‌ی هه‌ڵه‌بجه‌ی کوردستانی عێراق له‌دایک بووم ، ئه‌و کاته‌ باوکم له‌و شاره‌دا فه‌رمانبه‌ر بوو.
هه‌ر به‌هۆی کارکردنی باوکمه‌وه‌ پۆلی یه‌که‌می سه‌ره‌تاییم له‌ شاری شه‌قڵاوه‌ ی پارێزگای هه‌ولێر ته‌واو کردووه‌ ، پۆلی دووش له‌ هه‌ڵه‌بجه‌ و دواتر له‌ خوێندنگاکانی بێکه‌س و گۆران له‌ شاری سلێمانی قۆناغی سه‌ره‌تاییم ته‌واو کرد.
قۆناغی ئاماده‌ییم له‌ هه‌ردوو ئامادیی سه‌ڵاحه‌دین له‌ شاری سلێمانی و دواناوه‌ندی ڕانیه له‌ شاهری ڕانیه‌ی بناری کێوه‌ڕه‌ش‌ خوێندووه.

دوا قۆنا‌غی خوێندنیشم له‌ به‌غدا ، له‌ په‌یمانگه‌ی به‌ڕێوه‌بردنی ڕه‌سافه‌ ته‌واو کرد.
له‌ سه‌ره‌تای ساڵانی هه‌شتاکانی سه‌ده‌ی ڕابردووه‌وه‌ ، سه‌ر و سه‌ودام له‌گه‌ڵ نوسیندا په‌یداکرد و ئێستاشی له‌گه‌ڵدا بێت شیعر به‌شێکی دانه‌بڕاوه‌ لێم.
خوێندنه‌وه‌ی شیعره‌کانی مه‌حوی لای من تام چێژێکی سۆفیانه‌م ده‌داتێ ، که‌ ڕێک و ڕه‌وان ده‌مکاته‌ ده‌روێشێکی حاڵ گرتوی ناو ئه‌م خانه‌قا پاکیزه‌ییه‌ی شیعر.
له‌ سه‌ره‌تاکانی ساڵانی نه‌وه‌ته‌کانه‌وه‌ ده‌ستم کردووه‌ به‌ کاری ڕۆژنامه‌ گه‌ری و له‌ ژماره‌یه‌ک گۆڤار و ڕۆژنامه‌ و ڕادیۆ و ته‌له‌فزیۆنی هه‌رێمی کوردستانی عێراقدا کارم کردووه‌.
له‌ ساڵی 1996 دا هه‌وارم گواسته‌وه‌ بۆ وڵاته‌ یه‌کگرتووه‌کانی ئه‌مریکا و لێره‌ش له‌ مانگی 12ی ساڵی 1999 وه‌ کارمه‌ندم له‌ به‌شی کوردی ده‌نگی ئه‌مریکا.

مه‌به‌ست له‌م بلۆگه:

ڕووداوه‌کان له‌ جیهانی ئه‌مڕۆماندا زۆرن ، هه‌ریه‌که‌شیان به‌ جیا هه‌ڵگری تایبه‌تمه‌ندێتی خۆیانن‌ و لێکدانه‌وه‌ی جیاواز هه‌ڵده‌گرن ، له‌م ڕوانگه‌یه‌شه‌وه‌ هه‌ر یه‌کێ له‌و ڕووداوانه‌ ده‌بنه‌ بابه‌تێک بۆ گفت و گۆکردن و دیالۆگێکی هاوبه‌شی نێوانمان. له‌م بلۆگه‌مدا ، هه‌وڵ ده‌ده‌م هه‌موو جارێک بابه‌ته‌ هه‌ره‌ گه‌رم و گوڕه‌کانی ڕۆژهه‌ڵاتی ناوه‌ڕاست و جیهانیش بخه‌مه‌ به‌ر باس و لێکۆڵینه‌وه‌ ، پێکڕا بیانکه‌ینه‌ ده‌روازه‌یه‌ک بۆ گفت و گۆیه‌کی سیڤیلیانه‌ له‌سه‌ر بنچینه‌ی ڕێزگرتن له‌ بیر و بۆچوونی یه‌کتر و دوور له‌ هێرشکردنه‌ سه‌ر یه‌کدی. هه‌ر ڕاو بۆچونێکت هه‌بێت له‌سه‌ر هه‌ر یه‌کێ له‌و بابه‌تانه‌ی له‌ بلۆگه‌که‌مدا ده‌خرێنه‌ ڕوو ، یان هه‌ر پێشنیازێکیشت هه‌بێت ، به‌وپه‌ڕی سنگ فراوانیه‌وه‌ وه‌ری ده‌گرم و به‌ به‌شێک له‌ گه‌شه‌کردنی ئه‌م هه‌وڵه‌ی داده‌نێم بۆ پێکهێنانی زمانی لێکتێگه‌یشتن. له‌گه‌ڵ هه‌ر بابه‌تێکیشدا هێنده‌ی بکرێت به‌ گفت و گۆ و دانانی ڕاو بۆچونه‌کان و ته‌نانه‌ت گرته‌ی ڤیدیۆییش بلۆگه‌که‌ ده‌وڵه‌مه‌ند بکه‌م. تێبینی و بۆچونه‌کانی ئێوه‌ش ده‌شێت ببنه‌ مایه‌ی ئه‌وه‌ی ڕاسته‌وخۆ په‌یوه‌ندیتان پێوه‌ بکرێت و ئه‌و تێبینیه‌ی هه‌ته‌ ببێته‌ هه‌وێنی گفت و گۆیه‌کی تایبه‌ت له‌گه‌ڵ خۆتدا له‌ ڕوانگه‌ی ئه‌و بۆچونانه‌ و ئه‌و تێبینیانه‌ی له‌ بلۆگه‌که‌دا دایده‌نێێت و به‌هه‌مان شێوه‌ش ڕوانینه‌کانت کراوه‌ ده‌بن بۆ قسه‌ له‌سه‌ر کردن له‌لایه‌ن میوانه‌کانی بلۆگه‌که‌وه‌. چاوه‌ڕوانی هیممه‌تتانم.

Categories