Buxoro yahudiylari Nyu-Yorkda o’z nashriga ega

Posted February 16th, 2016 at 2:27 pm (UTC-4)
Leave a comment

Har bir mamlakatda ildiz otgan etnik jamoaning rivojlanishi, o’zligini saqlab qolishi uchun o’z matbuotiga ega bo’lishi lozim. 1990-yillar boshlarida Amerikaga ko’chib kelgan Buxoro yahudiylari buni yaxshi tushungan holda 2002-yilda haftalik gazetaga asos soldi.

“Buxarian Tayms” gazetasining bosh muharriri Rafael Nektalov bilan suhbatda bo’ldik.

“Buxarian Tayms” yoki “Buxoro vaqti” gazetasining tahririyati Kvins rayonidagi AQSh va Kanada Buxoro yahudiylari kongressi binosida joylashgan. Gazetaga 2002-yilda asos solgan asli samarqandlik Rafael Nektalov Amerikaga 1993-yili kelgan.

“Sovet paytida bemalol harakatlana olmasdik, yahudiylarning ovozini eshittira olmasdik. Axir SSSRda antisemitizm davlat darajasida edi. Shuning uchun bo’lsa kerak, Buxoro yahudiylari musiqasiga doir dissertatsiyam turib qolgan edi. Amerika bizga rivojlanishda yordam beradi. Maktablarimizni bemalol ocha olamiz, o’z tilimizni erkin o’rgana olamiz, o’z muzeyimiz bor, o’z konsertlarimizni tashkil eta olamiz, dunyoni keza olamiz. Bunga Amerikada hech qanday to’siq yo’q”.

“Buxarian Tayms” Rafael Nektalovning uchinchi loyihasi. Bungacha u “Most” (Ko’prik), “Buxoro yahudiylari dunyosi” gazetalariga qo’l urdi.

“Haftalik gazetani ochish orzum edi. “Buxarian Tayms” ilk ana shunday gazetamiz bo’ldi. Sevimli jamoam uchun buning uddasidan chiqa olganimdan yuragim faxrga to’la”, – deydi Rafael Nektalov.

Tahririyatda 18 kishi mehnat qiladi. 60 minglik jamoa uchun 10 ming nusxada chiqadi.

Rafael Nektalov, “Bukharian Times” gazetasi bosh muharriri

“Xodimlarimizning intellektual darajasi juda yuqori. Deyarli hammasi dotsent va professor. Yolg’iz men dissertatsiyamni yoqlay olmadim. Gazetani rivojlantirishda mana shunday martabali odamlar bilan ishlash sharafiga muyassarman”.

Rafael Nektalov nafaqat matbuot xodimi, balki jamoaning eng faol a’zosi, bosh tashkilotchisi hamdir. Hech bir madaniy tadbir uning ishtirokisiz o’tmaydi. Markaziy Osiyodan kelgan jamoalarga ham yaqindan yordam beradi. Masalan, o’zbek tilida chiqadigan “Vatandosh” gazetasining rivojlanishida muhim rol o’ynagan.

“Amerikaga tobora ko’proq o’zbeklar kela boshlaganida va ular uchun o’z tashkilotlari, nashrini tashkil etish ehtiyoji tug’ilganida vatandoshlarimga bu ishda jon-jon deb yordam berganman. Bir-birimizga foydamiz tegsin, deymiz. Amerikada ikki elat jamoasi o’rtasida do’stona aloqalar shakllanganidan xursandmiz. Amerika immigratsiyasining o’ziga xosligi ham shunda. Hamma bir-biriga yordam beradi”, – deydi Nektalov.

Gazetada rus, o’zbek, tojik, ingliz, Buxoro yahudiylari tillarida maqolalar chop etib boriladi.

“Biz muntazam ravishda Markaziy Osiyo haqida ma’lumot beruvchi yagona nashrmiz. Bu mintaqaga va, ayniqsa, O’zbekistonga alohida iliqlik bilan yondashamiz, chunki bu bizning Vatanimiz. Anchadan beri bu yerda yashayotganimizga qaramay, kindik qonimiz to’kilgan joyga, jonajon o’lkamizga, mozorlarimizga muhabbatimiz buyuk. Shu sababdan gazetamizda O’zbekistonga tegishli ko’p materiallar bor”.

Buxoro yahudiylari AQSh va O’zbekiston o’rtasida ko’prik vazifasini bajaradi.

“Amerikaliklarning O’zbekistonga e’tiborini oshirishda Buxoro yahudiylarichalik hech kim ko’p ish qilmagan, hatto AQShdagi o’zbeklarning o’zi ham. Universitetlarda bo’lamiz, leksiyalar o’qiymiz, konsertlar uyushtiramiz, shashmaqom festivalini o’tkazganmiz. Kimga bag’ishladik uni, deng? Turg’un Alimatovga. Xalqaro anjumanlar o’tkazamiz, xalq diplomatiyasini olib boramiz. Bu ishlarimizning hammasi gazetamizda yoritilgan. Nashrimizning arxivi yangi immigratsiyaning solnomasidir”, – deydi gazeta bosh muharriri.

Odil Ruzaliev

Nyu-York

Leave a Reply

Your email address will not be published. Required fields are marked *

BLOG HAQIDA

muhojirlar shaharchasi2

Garchi blogimizni "Muhojirnoma" deb nomlagan bo'lsak-da, u alohida muhojirning kechinmalari va yoki sarguzashtlari haqida bayon qiluvchi sahifa emas. Bu ma'lum ma'noda muhojirotni o'z tanasida tatib ko'rgan insonlarning kundalik daftariday. Sahifa Amerika bilan tanishish, uning ijtimoiy-ma'naviy hayotini o'rganish, qolaversa bu mamlakatga kelish va undagi ayrim “imkoniyatlar”dan foydalanishni ko'zlayotgan minglab o'zbekistonliklar uchun ma'lumotnoma vazifasini o'tashni maqsad qilgan. Unda nafaqat Amerika, balki butun dunyodagi muhojirlar hayotiga oid ma’lumot va kechinmalarni berib borishni niyat qilganmiz.
Bizni kuzatib boring.

Kalendar

February 2016
M T W T F S S
« Dec   Mar »
1234567
891011121314
15161718192021
22232425262728
29