Stiv Jobs: “Men har kuni o’limni eslayman”

Posted October 8th, 2011 at 7:28 am (UTC-5)
4 comments

“Apple” korporatsiyasi asoschisi va sobiq rahbari, Obama ta’biri bilan aytganda, bugungi kunning eng katta kashfiyotchilaridan biri Stiv Jobs shu hafta olamdan o’tdi. Bu xabar hanuz ommaviy axborot vositalarining og’zidan tushmay kelyapti. “Apple” rasmiy sayti bosh sahifasi Stiv Jobs xotirasi uchun o’zgartirilib, uning rasmi va u haqdagi qisqacha ma’lumot bilan to’ldirilgan. Mutaxassislar Jobsning o’limi “Apple”ning kelajagiga qanday ta’sir etishi haqida bahslashmoqda. “Apple” kompaniyasi axborot texnologiyalari sohasidagi ilg’orligini saqlab qola oladimi?

Yaqinda Stiv Jobs uni kashfiyotlar qilishga undaydigan eng katta kuch o’limni eslash ekani haqida gapirgandi:

“17 yoshimda shunday bir iqtibos o’qidim: “Agar sen har kuningni xuddi bu sening so’nggi kuning deb o’ylab o’tkazsang, bir kun kelib sen yaxshi odam bo’lasan.” Bu menga qattiq ta’sir qildi va o’shandan beri, o’tgan 33 yil davomida har kuni ertalab oynaga qarab, o’zimdan shuni so’rayman:

“Agar bugun umrimning oxirgi kuni bo’lsa, bugun qilmoqchi bo’lgan ishlarimni qilarmidim? Agar javob “Yo’q” bo’lsa, ketma-ket ko’p kunlarda shunday bo’lardi, nimanidir o’zgartirishim kerakligini bilardim.”

Stiv Jobs bu gaplarni bundan 6 yil muqaddam AQSHning Stanford Universiteti bitiruvchilari oldida aytgan edi. Qizig’i, bu daho o’zi hech qachon universitetni bitirishga muvaffaq bo’lmagan. Bundan ham qizig’i, o’zi asos solgan kompaniyadan, u 2 mlrd. dollarlik biznesga aylanganda, ishdan haydalgan.

Read the rest of this entry »

O’zbek olimlari uchun “Fulbright” dasturi tanlovni boshladi

Posted October 5th, 2011 at 11:35 pm (UTC-5)
Leave a comment

AQSHning “Tashrif buyuruvchi olimlar uchun Fulbrayt dasturi” (Fulbright Visiting Scholar Program) 2012-2013-o’quv yili uchun arizalarni qabul qilishni boshladi.

Ushbu dasturda imiy darajaga ega bo’lgan kollej va universitet o’qituvchilari yoki kamida 15 yillik ish tajribasiga ega professionallar ishtirok etishi mumkin. “Fulbrayt” har yili quyidagi yo’nalishlar bo’yicha grantlar ajratadi:

  • Huquq;
  • Ta’lim;
  • Kutubxonachilik;
  • Jurnalistika;
  • Siyosatshunoslik;
  • Biznes;
  • Moliya;
  • Jamiyatshunoslik;
  • Atrof-muhitni o‘rganish;
  • Madaniyat va san’at.

 

AQShning Toshkentdagi elchixonasi saytida yozilishicha, ushbu dasturdan ko‘zlangan asosiy maqsad Amerika Qo‘shma Shtatlari xalqi va boshqa xalqlar o‘rtasida o‘zaro hamfikrlilikni kuchaytirish, shu tariqa Qo‘shma Shtatlar va boshqa mamlakatlar o‘rtasidagi do‘stona, samimiy va tinch munosabatlarni rivojlantirishga ko‘maklashishdan iborat.

Fulbrayt stipendiyasini qo’lga kiritgan olim va professionallar AQShda to‘rt oydan 10 oygacha bo‘lgan muddatda tadqiqot olib borish imkoniyatini qo’lga kiritadilar.

Read the rest of this entry »

“Grin Karta – 2013” uchun ro’yxatdan o’tish boshlanmoqda

Posted September 29th, 2011 at 5:45 pm (UTC-5)
2 comments

AQSHning O’zbekistondagi elchixonasi saytining xabar berishicha, 2013-yil uchun “DV” lotereyasini (Diversity Visa) o’ynash 2011-yilning 4-oktabridan boshlanadi. Ro’yxatdan o’tish shu yilning 5-noyabrigacha davom etadi.

Xalq orasida “Grin karta” nomi bilan mashhur bo’lgan ushbu vizani yutib olganlar AQSHda doimiy yashash huquqini qo’lga kiritish imkoniyatiga ega bo’ladilar. Har yili AQSH hukumati “DV” lotereyasi orqali 50 000 kishiga domimiy yashash vizasini beradi. Ushbu dasturni amalga oshirishdan maqsad AQShda kamsonli bo’lgan immigrantlar sonini oshirish va bu bilan AQSHdagi muhojirlar rang-barangligini muvozanatga solishdir, deyiladi hukumat e’lon qilgan ma’lumotda.

O’zbekiston “Grin karta” eng ko’p beriladigan davlatlardan biri hisoblanadi. Har yili ushbu dasturda o’zbekistonliklarga 4-5 ming atrofida o’rin ajratiladi.

2013-yil uchun “Grin karta” lotereyasida ishtirok etishni xohlovchilar ro’yxatdan o’tishni  http://www.dvlottery.state.gov/ sayti orqali 4-oktabr kuni Toshkent vaqti bilan kechqurun 9:00 da boshlashlari mumkin. Ro’yxatdan o’tish muddati 5-noyabr kuni kechqurun soat 9:00 da o’z nihoyasiga yetadi.

Elchixona axborotiga ko’ra, ishtirok etuvchilar ro’yxatdan imkon qadar erta o’tishlari tavsiya etiladi. Dunyo bo’ylab kiruvchilar sonining kundan kunga oshib borishi oqibatida vaqt o’tishi bilan sayt ishida sekinlashish kuzatilishi mumkin. Ro’yxatdan o’tish mutlaqo bepul va oson bo’lib, AQSh hukumati “Grin karta” uchun ro’yxatdan o’tish xizmatini taklif etuvchi turli shaxs va kompaniyalar aslida firibgarlar bo’lishi mumkinligidan ogohlantiradi.

Read the rest of this entry »

To’liq grant beruvchi Amerika universitetlari

Posted September 25th, 2011 at 9:29 am (UTC-5)
Leave a comment

Xorijlik talaba uchun AQSHda o’qishninhg eng qiyin jihatlaridan biri bu o’qish uchun pul topish. AQSHda o’qish arzon emas. Buning ustiga, chet ellik talabalar AQSHdagi mahalliy talabalarga qaraganda o’qish uchun ancha ko’p to’lashi talab etiladi. Ana shunday vaziyatda talabaning joniga oro kiruvchi, ehtimol, yagona chora “scholarship” topish.

Quyida talabalarga to’liq grant ajratuvchi ayrim universitetlar ro’yxatini bermoqchimiz. Grant olish uchun, avvalo, o’qishga qabul qilinish kerak. Quyida keltirilayotgan olti universitet, to’liq grant berish bilan birga, Amerikaning kirish juda qiyin bo’lgan eng kuchli universitetlaridan hisoblanadi. Demak, o’qishga qabul qilinish uchun kuchli raqobatdan o’tishingiz kerak bo’ladi.

MIT, Massachusetts Institute of Technology in Massachusetts

Harvard University

Princeton University

Yale University

Williams College in Massachusetts Middlebury College in Vermont

Ushbu oliy o’quv yurtlari saytlariga kirganda, qabul (admission), moddiy yordam (financial aid) va xalqaro talabalar (international students) bo’limlariga kirib, o’qishga qabul va moddiy yordam olish yo’l-yo’riqlari haqida ma’lumot olishingizni tavsiya etamiz.

 

AQSHda talabalar soni kamaymoqdami?

Posted September 19th, 2011 at 10:26 pm (UTC-5)
Leave a comment

AQSH prezidenti Barak Obama “Amerika Ish qonuni” loyihasini Kongressga taqdim etarkan, mamlakat taraqqiyoti uchun ta’lim muhim ahamiyatga ega ekanini yana bir bor ta’kidladi. Asosan, mamlakatdagi ishsizlik darajasini kamaytirish maqsadida qabul qilinayotgan yangi qonun loyihasida maktablarni ta’mirlash va boy berilgan o’qituvchi ish o’rinlarini qayta tiklash ham ko’zda tutilgan.

Iqtisodiy inqiroz bevosita ta’lim tizimiga ham ta’sir etayotgani amalda allaqachon ko’zga tashlanmoqda. Yaqinda e’lon qilingan xalqaro tadqiqotda AQShda universitetni tamomlayotgan talabalar soni kamayib borayotgani tilga olingan.

Iqtisodiy hamkorlik va taraqqiyot tashkiloti tomonidan olib borilgan kuzatuv natijalariga ko’ra, 25 yoshdan 34 yoshgacha bo’lganlar orasida universitet darajasiga ega bo’lishni qayd etib boruvchi xalqaro reytingda AQSh  to’rt pog’ona pastga qulagan. AQSH jahon mamlakatlari orasida avvalgi ro’yxatda 12-o’rinda bo’lgan bo’lsa, hozir 16-o’ringa tushib qolgan.

Mutaxassislar universitet ta’limi bo’yicha AQSH ko’rsatkichlarining pasayib borayotganini ikki sabab bilan izohlashmoqda. Birinchidan, Osiyo va Yevropada universitetga qatnayotgan yoshlar soni keskin oshib borayotgan bo’lsa, ikkinchidan, AQShda oliy ta’lim, asosan, to’rt yillik kollejga qatnash bilan belgilanadi. Boshqa davlatlarda esa bir yoki ikki yillik professional kasb ta’limi kurslari soni ham ortib bormoqda.

Aholisi orasida eng ko’p bakalavr darajasiga ega bo’lish bo’yicha AQSH dunyoda Norvegiyadan so’ng ikkinchi o’rinda turadi. Shuningdek, AQSh oliy o’quv yurtlari xalqaro talabalarni o’ziga eng ko’p jalb etuvchi davlatlardan biri. Shunga qaramay, oliy ta’limni rivojlantirishni targ’ib etuvchi “Lumina” jamg’armasi rahbari Jemi Merisotisning aytishicha, oliy ta’lim sifatini oshirish bo’yicha boshqa davlatlar faol oldinga qarab bormoqda.

Read the rest of this entry »

Ehtiyot bo’ling: Ayrin to’foni!

Posted August 26th, 2011 at 3:49 pm (UTC-5)
Leave a comment

© NASA samodan olgan surat

Ertaga Shimoliy Karolinadan tortib Meyn shtatigacha AQSh sharqiy qirg’og’i Ayrin nomli dahshatli to’fonga yuz tutishi mumkin. Bu haqda AQSh ommaviy axborot vositalari bir haftadirki, bong urmoqda. To’fonga oid xabarlarni dovul xavfi yuqori bo’lgan shtatlardagi oliy o’quv yurtlarida ma’muriyat talabalar shaxsiy “e-mail”lariga ham yuborishmoqda.

Dovul sodir bo’layotganini quyidagi belgilar orqali bilish mumkin: yomg’ir aralash shamol har doimgidan kuchli bo’ladi. Kuchli jala yog’ishi mumkin. Dovul daraxtlarni va hatto uylarni ko’chirib yuborish quvvatiga ega. Bunday holatda ko’chaga chiqmaslik yoki o’qish joyida bo’lsa, bino ichida o’tirish tavsiya etiladi.

Bugun “IREX” tashkiloti AQShda ta’lim grantlari bo’yicha tahsil olayotgan xalqaro talabalarga xavfsizlik choralariga rioya etish haqida maktub yo’lladi. Xatda, jumladan, shunday deyiladi:

  • Telefoningiz batareyasi to’la zaryadlangan holda ekaniga ishonch hosil qiling:
  • O’zingiz bilan pasport, DS-2019 formasi, I-94 kartochkasini hamda ASPE sog’liq sug’urtasi kartochkasini birga olib yuring;
  • Oilangizga qo’ng’iroq qilib, o’zingizning sog’-salomat ekaningiz haqida aytib qo’yishni unutmang;
  • Biror kor-hol yuz berganda, zudlik bilan dasturingiz bo’yicha siz bilan ishlovchi xodimga bu haqda xabar bering.

Biz AQShda tahsil olayotgan barcha xorijlik talabalarga sog’lik-salomatlik tilaymiz. Dovul bo’lishi kutilayotgan kunlar o’zingizni ehtiyot qilishingizni va yuqorida yozilgan ko’rsatmalarga rioya qilishingizni so’raymiz.

Ob-havo haqidagi so’nggi ma’lumotlarni www.weather.com saytidan olishingiz mumkin.

O’zbekistonda yuridik ta’lim: muammolar va ularning yechimi

Posted August 7th, 2011 at 7:25 pm (UTC-5)
Leave a comment

“Talabalar shaharchasi” mehmoni: Mirakmal Nizaymatov

Mirakmal Nizaymatov Indiana shtati Notr Dam universitetida huquq bo’yicha tahsil oladi. Quyidagi maqola muallifning O’zbekistonda va AQShda huquqshunoslik sohasida olib borgan kuzatuvlari va izlanishlari asosida yozilgan. Unda Mirakmal O’zbekiston ta’lim tizimida huquqshunoslik sohasining o’qitilishini AQSh ta’lim tizimi bilan qiyoslab, bu borada O’zbekistondagi kamchilik va muammolarni sanab o’tadi. Maqolaning ilmiy va amaliy qiymati shundaki, muallif ushbu kamchiliklarni bartaraf etish va bu soha ta’limini yanada yaxshilash bo’yicha AQSh tajribasi asosida amaliy tavsiyalar beradi.

Maqola O’zbekistonda huquqshunoslik sohasida tahsil olayotgan talabalar uchun foydali bo’ladi, degan umiddamiz.

_______________________________________________________________________________________________

Quyidagi maslahatlar bugungi kunda huquqshunoslik bo’yicha tahsil olayotgan talabalarga mo’ljallangan. Ushbu maslahatlarning aksariyati O’zbekiston va AQShda huquqshunoslik sohasida 4 yil davomida olib borgan kuzatishlarim asosida yozildi. Maslahatlar talaba hayotining mazmunliroq va unumliroq o’tishini ta’minlash bilan birga, yuqori malakali huquqshunos bo’lib yetishishiga ham yordam beradi, deb umid qilaman.

[1] Yodlash o’rniga o’qish

Talabalik davrimda kodeks moddalarini yoddan bilish huquqiy saviyaning yuqoriligidan dalolat berardi. Jinoyat huquqidan dars bergan domlamizga barchamiz alohida hurmat bilan qarardik. Sababi, u hammamizni O’zbekiston Respublikasi jinoyat kodeksining barcha moddalarini yod olganligi bilan hayratga solardi.  Chet ellarda esa, xususan AQShda, kodeks va qonun moddaralarini yod bilishga uncha ahamiyat berilmaydi. Yod olishdan ko’ra tushunish, tahlil va to’g’ri tatbiq qilish zarurroq hisoblanadi. Huquqshunosning qobiliyati va mahorati u kodeks moddalarining nechtasini yod olganligi bilan emas, balki ularning qaysi huquqiy munosabatlarni tartibga solishini bilishi, tegishli huquqiy me’yorlarni sinchkovlik bilan tahlil qilishi va amalda qo’llay olishi bilan baholanadi.

Yodlash o’rniga o’qish uchun talaba kodeks va qonun moddalarini o’qish bilan birga, ularga yozilgan sharhlar va huquqshunos olimlar yozgan darsliklarni ham o’qimog’i lozim. AQSh umumiy (anglo-sakson) huquq tizimiga kirgani uchun talabalar asosan Oliy Sud (Supreme Court) tomonidan ko’rib chiqilgan ishlarni sinchkovlik bilan o’rganishadi. O’zbekiston huquq tizimi esa romano-german (sivil) huquq tizimiga kirgani uchun, Oliy Sud tomonidan ko’rib chiqilgan ishlarni o’rganish keng tarqalmagan. Shuning uchun O’zbekistondagi huquqshunos talabalar uchun kodeks va qonunlarga yozilgan sharhlarni o’qish alohida ahamiyat kasb etadi.

Huquqiy normalarni tahlil qilish qobiliyatini rivojlantirishda huquqiy masalalarni o’qish ham muhim ahamiyatga ega. Bunday qo’llanmalarda muallif huquqiy masala keltirish bilan birga, uni qanday hal qilish kerakligi haqida ham o’z fikr-mulohazalarini bildirib o’tadi. AQSh huquq maktablarida tahsil olayotgan talabalarning deyarli barchasi shunday qo’llanmalardan foydalanadi (ayniqsa yakuniy imtihonlar uchun). Masalan, ingliz tilida chop etilgan shunday qo’llanmalardan birining nomi “Examples and Explanations: Constitutional Law,” Aspen Publishers, 2009 (“Masalalar va Sharhlar: Konstitusiyaviy huquq”). Rus tilida chop etilgan qo’llanmalar orasida esa “Сборник задач по уголовному праву,” Издательство: Щит-М, 2008 (“Jinoyat huquqi bo’yicha masalalar to’plami”) ni namuna sifatida ko’rsatish mumkin. Read the rest of this entry »

Abiturientlar diqqatiga: Imtihon natijalarini SMS orqali bilishingiz mumkin

Posted August 5th, 2011 at 4:04 pm (UTC-5)
Leave a comment

Vatanimizda abiturientlarning yuragi taka-puka bo’lib, mandat kunini kutayotganlari aniq. Ko’p yoshlar olis viloyatlardan imtihonlari natijasini bilish uchun Toshkentga yo’l bosib keladi. Bu, albatta, oson emas. Ayniqsa, shuncha yo’l bosib kelsa-yu, olgan natijasi – peshonadan sovuq ter chiqaradigan yomon xabar bo’lsa.

Bundan 10 yillar muqaddam men ham abiturient edim. Bu narsalarni o’z boshimdan o’tkazganman. Kaminaga imtihondan yiqilib, sovuq xabar olish nasib qilmagan bo’lsa ham, boshqa viloyatdan bir necha soat yo’l bosib Toshkentga kelgan va o’qishga kirolmagani haqidagi bir parcha ma’lumotni o’qib qaytib ketgan va bu narsani bir necha yillar davomida har yili takrorlagan abiturientlarni bilaman.

Bugun internetda yaxshi bir xabar o’qib qoldim. Anons.uz saytining yozishicha, “Bilayn” aloqa operatori o’zbekistonlik abiturientlarga 2-avgustda o’tgan kirish imtihonlari natijalarini telefon orqali bilish imkoniyatini taklif qilayotgan ekan. Kompaniya “Zava Mobile” provayderi hamda Davlat Test Markazi bilan hamkorlikda “Abiturient – 2011″ xizmatini yo’lga qo’ygan. Ushbu xizmatga ulangan foydalanuvchilar test natijalarini SMS orqali olishlari mumkin.

Test natijasini bilish uchun abonent 5151 raqamiga javoblar varaqasi nomerini jo’natishi kerak. Javobda uning testdan olgan bali va o’qishga o’tgan yoki o’tmagani haqida xabar keladi. Masalan,  javoblar varaqasidagi 100005 nomerini 5151 raqamiga SMS orqali jo’natsangiz, quyidagi ko’rinishda javob keladi:

N:100005, VUZ:355, BALL:195.5. Siz GRANT asosida o’qishga qabul qilindingiz. Vi postupili na GRANT.

Xizmatdan Davlat Test Markazi imtihon natijalarini e’lon qilgandan keyin foydalanish mumkin. Ungacha jo’natilgan SMSga tarmoqqa ulanish mumkin emas, degan javob keladi va ushbu xabarga ham xizmat haqi olinishi mumkin.

“Abiturient – 2011″ xizmatidan foydalanish bahosi $0,75. Qo’shimcha ma’lumotni www.zava.uz saytidan topishingiz mumkin.

Fikrimcha, juda yaxshi xizmatni yo’lga qo’yishibdi. Afsuski, hozircha undan faqat “Bilayn” aloqa xizmatidan foydalanuvchi abonentlargina foydalanishi mumkin. Nazarimda, agar Davlat Test Markazi tashabbusni o’z qo’liga olib, bu xizmatni barcha aloqa operatorlari uchun taklif etganda, boshqa aloqa operatorlaridan foydalanuvchi abiturientlar uchun ham ayni muddao bo’lardi.

Hurmatli abiturientlar! Test natijalari e’lon qilingandan so’ng o’z imtihon natijalaringiz haqida bizga yozib, kayfiyatingiz av his-hayajoningizni biz bilan baham ko’rasiz, deb umid qilamiz.

“Talabalar shaharchasi” sizdan yaxshi xabarlarni kutib qoladi.

Ahvoling qanday, abiturient?

Posted August 2nd, 2011 at 4:11 pm (UTC-5)
Leave a comment

Siz bugun talabasiz. Yaqin o’tmishda abiturient edingiz. O’sha kunlarni, ayniqsa, kirish imtihoningiz bo’lgan kunni hozir ham juda yaxshi eslasangiz kerak. Hajayon, qo’rquv va nihoyat, orziqib kutilgan kun – mandat…

Yaxshi bilasiz, O’zbekistonda har yili 1-avgustda oliy o’quv yurtlariga kirish imtihonlari o’tkaziladi. Bu yil shu imtihon bir kun keyinga, 2-avgustga qoldirildi. Oliy va o’rta maxsus ta’lim vazirligining aytishicha, abiturientlarning bu yil har qachongidan ko’pligi imtihon kunining ortga surilishiga sabab bo’lgan.

Bu yil O’zbekistonda qancha odam o’qish uchun hujjat topshirdi? Qaysi universitetlarga eng ko’p hujjat topshirilgan? Qayerda bir o’rin uchun bo’lgan raqobat boshqa joylarga qaraganda yuqori bo’ldi? Shu kabi savollarga vazirlik e’lon qilgan raqamlar javob beradi. Keling, ularga bir nazar tashlaylik.

Bu yil oliy o’quv yurtlariga jami 418 724 nafar abiturient hujjat topshirgan. Bu o’tgan yilgi raqamdan 33 mingta ko’p. 20 159 abiturientdan hujjat qabul qilgan Termiz Davlat Universiteti ta’lim muassasalari orasida eng ko’p hujjat qabul qilish borasida yetakchilik qilmoqda. Undan keyingi o’rinlarda quyidagi universitetlar bor:

Nizomiy nomidagi Toshkent Davlat pedagogika universiteti – 17 357;

Samarqand Davlat universiteti – 16 369;

Andijon Davlat universiteti – 15 949;

Farg’ona Davlat universiteti – 15 668.

Ajratilgan talaba o’rinlariga eng ko’p talabgor to’g’ri kelishi bo’yicha ham Termiz Davlat Universiteti birinchi o’rinda. Bu yerda bir o’ringa 12,8 kishi to’g’ri kelmoqda. Toshkent Tibbiyot Akademiyasi va Qarshi Davlat universitetlarida bir o’rin uchun 11,6 abiturient imtihon topshirgan. Bu borada keyingi o’rinlarni quyidagi o’quv yurtlari band etgan:

Toshkent Soliq akademiyasi – bir o’ringa 11.5 kishi;

Andijon Davlat tibbiyot instituti – bir o’ringa 11.2 kishi;

Andijon Davlat universiteti – 11.1 kishi.

O’quvchilarimiz orasida abiturientlar ham borligiga ishonchimiz komil. Yoki ularning yaqinlaringiz orasida borligi aniq. Siz uchun yoki tanishlaringiz uchun bu yil kirish imtihonlari qanday kechdi? Bu yilgi imtihonlar har galgidan nimasi bilan farq qiladi?

Shu haqda fikr-mulohazalaringizni biz bilan baham ko’rasiz, deb umid qilamiz.

 

F-1 talaba vizasini ololmaslik sabablari

Posted August 1st, 2011 at 11:04 am (UTC-5)
Leave a comment

Yaxshi bilamizki, AQShda o’qish istagiga ega bo’lgan hamma ham bu niyatiga yeta olmaydi. Chunki AQShda o’qish huquqini beruvchi F-1 talaba vizasini olish hammaga ham nasib qilmaydi. Ayniqsa, O’zbekistondan AQShga F-1 vizasini olish yildan yilga qiyinlashib borayotgani haqida ko’p eshitamiz. Buning sabablari nima? Odatda, qanday sabablar AQSh elchixonasi tomonidan F-1 vizasi uchun topshirilgan anketaning rad qilinishiga sabab bo’ladi?

“Baxtli maktablar blogi” (Happy Schools Blog) yaqinda shu haqda yozibdi. Unda talaba vizasini ololmagan 100 dan ortiq inson bilan qilingan suhbat asosida AQShdagi universitetlarga F-1 vizasini ololmaslikning eng ko’p uchraydigan 10 sababi haqida hikoya qilingan. Ushbu sabablarni quyida bittama bitta sanab o’tsak: Read the rest of this entry »

Muallif haqida


Behzod AQShning Shimoliy Karolina universitetida jurnalistika bo'yicha tahsil olgan. Ijtimoiy-madaniy va ma’rifiy mavzularda yuzlab maqolalari matbuotda e’lon qilingan. “Talabalar shaharchasi” sahifasining muallifi va bosh muharriri.

Talabalar shaharchasi haqida


Amerikada o'qishni xohlaysizmi? O'qish uchun grantlarni qanday topish yoki viza olish yo'l-yo'riqlari haqida ma'lumot qidirayotgandirsiz? Balki Amerikadagi vatandoshlarimiz hayoti, ular erishgan muvaffaqiyatlar haqida o'qishni istarsiz? Shu va yana boshqa ko'plab mavzular haqida "Amerika Ovozi" barcha sobiq, hozirgi va bo'lajak talabalarni Talabalar shaharchasiga muloqot uchun taklif etadi.
Talabalar shaharchasi - Sizning minbaringiz. Bu yerda Siz o'z tajribalaringizni boshqalar bilan baham ko'rishingiz, ijodiy ishlaringiz va fikr-mulohazalaringiz bilan blogimizda muntazam ishtirok etishingiz mumkin. Ijodiy hamkorlik uchun uzbek@voanews.com elektron manzili orqali bizga bog'lanishingizni so'raymiz.