Çempionlar Liqası B qrupunda mübarizə aparan Türkiyə təmsilçisi Trabzonspor noyabrın 22-də İtaliyanın İnter Milan klubunu öz evində qonaq edib. Milanda keçirilən oyunda Trabzonspor 1-0 hesabı ilə qalib gələrək italiya təmsilçisini şok etmişdi. Dünənki oyunda da Trabzonspora qalibiyyət çox vacib idi. Çünki qrupun digər matçında Fransanın Lille klubu Moskva CSKA-nı 2-0 hesabı ilə məğlubiyyətə uğradaraq qrupda vəziyyəti daha da gərginləşdirmişdi.
Trabzonspor İnterlə oyunda matçın 18-ci dəqiqəsində 1-0 hesabı ilə geri düşsə də, cəmi 5 dəqiqə sonra oyunda tarazlığı bərpa etməyi bacarıb. Oyunun 23-cü dəqiqəsində Halil Altıntopun uzaqdan zərbəsi İnterli müdafiəçinin kürəyinə dəyərək istiqamətini dəyişib və qapıçının çata bilməyəcəyi nöqtəsinə istiqamətlənib: 1-1
Bundan sonra əsasən Trabzonspor hücum edən tərəf olub. Çoxsaylı qol imkanlarından yararlana bilməyən Türkiyə təmsilçisi ümidi son tura saxlayıb. Son turda Fransada Lille-ə qarşılacaq Trabzonspor hazırda qrupda ikinci yerdə olmasının üstünlüyündən yararlanmağa çalışacaq.
Gələn tur İnterin CSKA-nı məğlub etməsi və bərabərə qalması halında Trabzonspora Fransada bərabərlik də kifayət edir. CSKA İnterə qalib gəlsə Fransada heç-heçə Trabzonsporu Avropa Liqasına aparır. Türkiyə təmsilçisi məğlub olsa belə Avropa Liqasına qatılmaq şansı olacaq. Bunun üçün İnterin CSKA-ya qalib gəlməsi labüddür.
Trabzonsporun İnterlə möhtəşəm oyununun maraqlı anlarını və qollarını aşağıdan izləyin:
4 ildir Amerikanın səsinin əməkdaşıyam. İdmanın demək olar ki, bütün növlərinə, xüsusilə futbol, basketbol, böyük tennisə və şahmata böyük marağım var. 4 ilə yaxın futbol, 6 il basketbol və 3 il üzgüçülüklə məşğul olmuşam. İdman həyatımın önəmli bir hissəsi olduğu üçün onu həm də bloga çevirmək qərarına gəldim. Azərbaycanın ilk rəsmi idman bloguna xoş gəlmisiniz!
