Son üç gündə Azərbaycanda avtomobil qəzası nəticəsində 16 nəfər həlak olub, iyirmidən çox adam bədən xəsarəti alıb.
Fövqəladə Hallar Nazirliyinin məlumatına görə, iyulun 16-da Bakının Xəzər rayonunda VAZ markalı minik avtomobili ilə KAMAZ markalı yük avtomobilinin toqquşması nəticəsində 4 nəfər həlak olub.
Abşeron rayonunda KAMAZ markalı yük avtomobili atlıya çırpılıb. Nəticədə atlı hadisə yerində həlak olub, at tələf olub.
Bakının Xətai rayonunda VAZ markalı minik avtomobili sürücünün idarəetməsindən çıxaraq qatara çırpılıb və nəticədə avtomobildə olan 3 nəfər yaralanıb, 1 nəfər həlak olub. Daxili İşlər Nazirliyi Baş Dövlət Yol Polisinin məlumatlarına görə, iyulun 17-də İsmayıllı rayonunda Topçu kəndi ərazisində hərbiçi Sadiq Babayevin idarə etdiyi “Mersedes”in ağaca çırpılması nəticəsində 3 nəfər ölüb, bir nəfər xəsarət alıb.
Samux rayonunun Qarayeri qəsəbəsində Gəncə şəhər sakini Ramin Əsgərov idarə etdiyi VAZ markalı minik avtomaşını aşıb. Sürücü hadisə yerində həlak olub, xəsarət almış sərnişinlər – Səbuhi Əliyev və Yasin Səlimov xəstəxanaya yerləşdirilib.
Tovuz rayonunun Düz Qırıxlı kəndində Zəyəm qəsəbə sakini Namiq Quliyev idarə etdiyi VAZ markalı minik avtomaşını ilə Könül Cəfərovanı vurub. Xanım Cəfərova xəstəxanaya aparılarkən yolda ölüb.
Bu gün Beyləqan rayonunda Əli Hüseynovun idarə etdiyi “Mersedes” Türkiyə vətəndaşının idarə etdiyi yük avtomobili ilə toqquşub. Nəticədə “Mersedes”in sürücüsü ölüb, sərnişinləri isə ağır bədən xəsarəti alıb.
Digər bir yol-nəqliyyat qəzası Zaqatala rayonunun Əliabad kəndi ərazisində qeydə alınıb. Qəza nəticəsində 3 nəfər ölüb, 4 nəfər bədən xəsarəti alıb.
Şabran rayonunun Dəvəçi kəndi ərazisində Şabran rayonu Məliklər kənd sakini Sabir Ələsgərovun idarə etdiyi “Hyundai AX-35” markalı avtomaşın yolu keçən piyada, Quba rayonu Zərqova kənd sakini Əfqan Əliyevi vurub və o, hadisə yerindəcə dünyasını dəyişib.
Daxili İşlər Nazirliyi Baş Dövlət Yol Polis İdarəsinin məlumatına görə, 2010-cu ildə ölkədə 2721 yol-nəqliyyat hadisəsi qeydə alınıb ki, bunun nəticəsində 925 nəfər həlak olub. Yol qəzalarında 2871 nəfər yaralanıb. Göründüyü kimi 9 milyon əhalisi olan Azərbaycanda 2010-cu ildə hər gün avtomobil qəzasında orta hesabla 2,53 nəfər həlak olub.
Ölkədə təxminən 1 milyona yaxın avtomobil uzunluğu 25013 kilometr olan yollarda hərəkət edir. Ölkə yollarında orta hesabla hər 40 metrə bir avtomobil düşür. Bununla yanaşı, şəhərlərdə, xüsusilə paytaxt Bakıda avtomobil sıxlığı digər yaşayış məntəqələrinə nisbətən dəfələrlə çoxdur. Ölkədəki avtomobillərin yarım milyondan çoxu Bakı və onun ətrafında yerləşən rayonlarda istismar olunur.
Beynəlxalq hesablamalara görə, Azərbaycanda il ərzində dövlətə və insanlara avtomobil qəzaları nəticəsində dəyən maddi və mənəvi ziyanın məbləği on milyard dollardan artıqdır. Bu isə dövlət büdcəsinin 75 faizi deməkdir.
Beynəlxalq ekspertlər Azərbaycanda yeni yolların tikintisi sahəsində müvəffəqiyyəti qeyd edərək, yeni yolların tikintisinin davam etdirilməsini, yollarda avtomobillərin sürət normalarına, yol-hərəkəti nişanları ilə bağlı siyasətə yenidən baxılmasını təklif edir. Eyni zamanda, ekspertlər şəhərdaxili yollarda nizam-intizamın gücləndirilməsini, bütün yol xətləri üzrə işıqforların yerləşdirilməsini, səkilərin qanunsuz zəbtinin aradan qaldırılmasını, piyada yollarının nizama salınmasının vacibliyini bildirir.