Amerikadan turib internet orqali kosibchilik namunalari va antiqa buyumlarni sotuvchi “Etsy” (Etsi) kompaniyasining savdosi chaqqonlashib bormoqda. Shirkat aksiyalarini birjaga chiqardi. Ularning qiymati boshida ko’tarilganiga qaramay, bugunga kelib bir oz tushgan.

“Etsy” onlayn bozor bo’lib, odamlar qo’lda yasalgan, antiqa, eski buyumlarni u orqali sotadi. 10-yil oldin paydo bo’lgan kompaniya ketidan bugunga kelib bir yarim million odam narsa sotib non topmoqda, 20 milliongacha xaridor uning xizmatlaridan bahramand bo’ldi. Firma daromadi yil sayin o’smoqda. O’tgan yili 195 million dollarni tashkil etdi. Dekabr oyida qayd etilgan ma’lumotlarga ko’ra, “Etsy”ning uyali telefonlardagi applikatsiyasi 22 million bor yuklandi.

“Savdoga taqinchoqlar, mebel, kiyimlar qo’yiladi. Bu borada “Etsy” internetda yetakchi kompaniyalardan. Xaridorlar unga qayta va qayta murojaat qiladi. Asosan ayollar. 2011-yilda buyum sotgan va xarid qilganlarning yarmini 2014-yilda ham shu saytda ko’rish mumkin edi”, – deydi moliyachi Ketlin Smit.

“Etsy” aksiyalarini birjaga qo’ygach, 16-apreldagi ilk savdoda 13 milliondan ziyodi sotilib, kompaniyaga 267 million dollar daromad keltirdi.

“Shirkat marketing, reklama uchun xarajatlarni oshirib, mijozlari safini kengaytirmoqchi. Hozircha o’sish sur’ati yaxshi. O’tgan yil oxirida o’sish 50 foizni tashkil etgan bo’lsa, bu yili 30 foiz kutilmoqda”, – deydi Smit.

Aksiyalarni donasiga 25 dollarga sotib olish mumkin.

Reyter axborot agentligi muxbiri Liana Beykerning aytishicha, kelajakda “Etsy”ning bahosi bir necha milliard dollarga yetishi mumkin. Shunga “Apple” yoki “eBay” kabi yirik kompaniya uni sotib oladi deb o’ylayman”, – deydi Beyker.

Biroq, deydi moliyachi Ketlin Smit, shirkatning kelajagi mavhum.

“Ko’p narsa rahbariyatning yangi sarmoyadorlar bilan qanday ishlashiga hamda ularning umidlarini oqlay olishiga bog’liq”, – deydi u.