Vaşinqtonda Türk Amerika Milli Liderlik konfransı işinə başlayıb. Amerikada türk təşkilatlarının liderləri iki gün sürəcək konfransda türk əsilli amerikalıların siyasi biliklərinin artırılması və ABŞ-ın ictimai-siyasi həyatında daha fəal iştirakına nail olmaq yollarını müzakirə edir. ABŞ- da fəaliyyət göstərən iki ən böyük türk təşkilatının sponsorluq etdiyi konfransa ABŞ azərbaycanlılarının şəbəkəsi USAN və Azərbaycan-Amerika Şurası da dəvət edilib.

Konfrans iştirakçıları bu gün Amerikadakı türk xalqlarının təmsil olunduğu təşkilatların fəaliyyətinin gücləndirilməsi və bu qruplar arasında fəaliyyətlərin əlaqələndirilməsi məsələsini geniş müzakirə edib. Amerika-Azərbaycan Şurasının baş direktoru Cavid Hüseynov və ABŞ-da yaşayan azərbaycanlıların şəbəkəsi olan USAN təşkilatının həmtəsisçisi və icraçı direktoru Adil Bağırov Azərbaycan diasporunun fəaliyyətinin istiqamətləri haqda danışdılar.

Amerikada Pax Turcica institutunun həmtəsisçisi Cavid Hüseynov prezentasiyasında ABŞ-da türk əsilli amerikalıların birliyi konsepsiyasına geniş yer verdi. O bildirdi ki, Pax Turcica institutu işini əsas üç istiqamətdə aparır. Bu da icma üzvlərinin təşkilatlandırılması və onların maarifləndirilməsi, habelə mədəniyyətlərarası dialoqun qurulmasından ibarətdir. Cavid Hüseynov dedi ki, əvvəllərlə müqayisədə bu gün türk təşkilatları arasında fəaliyyətlərin daha çox əlaqələndirildiyini müşahidə etmək olar. O, ABŞ-da yaşayan türk xalqlarının nümayəndələrindən ibarət diasporun gənc üzvləri ilə işləməyin vacibliyini vurğuladı.

ABŞ-da yaşayan azərbaycanlıların USAN şəbəkəsinin icraçı direktoru Adil Bağırov Azərbaycan icmasının fəaliyyətlərindən danışdı. O bildirdi ki, USAN Birləşmiş Ştatlarda Azərbaycan və azərbaycanlıların maraqlarını təmsil edən başlıca təşkilat kimi tanınıb. Adil Bağırov son zamanlar ABŞ-da yaşayan azərbaycanlılar arasında fəallığın artmasının müşahidə olunduğunu bildirdi. O qeyd etdi ki, diaspor nümayəndələrinin fəaliyyətləri nəticəsində ABŞ Konqresi və ayrı-ayrı ştatlarda Azərbaycanla bağlı bir sıra mühüm sənədlər qəbul və təsdiq edilib. Adil Bağırov bu sənədlər arasında dünya ölkələrində ilk dəfə olaraq Nevada ştatının qubernatorunun martın 31-nin kütləvi şəkildə qətlə yetirilmiş azərbaycanlıların anım günü kimi tanıyan sərəncamını və Texas ştatının parlamentində ilk dəfə olaraq Azərbaycan diaspora üzvləri haqda qəbul edilən qətnaməni göstərdi. Bunların böyük uğur olduğunu deyən Adil Bağırov görüləsi işlərin hələ çox olduğunu da qeyd etdi.

Türk Amerika Milli Liderlik konfransının sonuncu günü ABŞ-dakı türk təşkilatlarının gənclərlə işinə həsr edilib. Tədbir çərçivəsində keçiriləcək iclaslarda gəncləri maraqlandıran məsələlər və onlarla iş prinsipləri, habelə tələbə təşkilatları və dərnəklərinin işi müzakirə ediləcək.

Türk Amerika Liderlik konfransının açılış günü Türkiyənin Avropa İttifaqı məsələləri üzrə xüsusi nümayəndəsi Egemen Bağış və Amerika ictimaiyyətinin üzvləri iştirak edib. Tədbir çərçivəsində türk təşkilatlarının nümayəndələri təmsil olunduqları ştatların Konqresdəki nümayəndələri ilə görüşüb.