Texas ştatının qanunverici orqanında ilk dəfə olaraq Azərbaycan diaspor üzvləri haqda qətnamə qəbul edilib.

ABŞ-da yaşayan azərbaycanlılıarın şəbəkəsi USAN xəbər verir ki, hər il aparılan intensiv kampaniya nəticəsində Texas qanunvericisi Skot Hokberq tarixi addım ataraq, dünya ölkələrində ilk dəfə Amerikada yaşayan azərbaycanlılar haqda ştat Konqresinin Nümayəndələr Palatasına qətnamə təqdim etmiş və onun təsdiqinə nail olmuşdur.

Cənab Hokberq Texas ştatında və xüsusilə də onun doğma şəhəri olan Hyuston şəhərində yaşayan bütün azərbaycanlılara və onların təmsil olunduqları Hyuston-Bakı Qardaşlaşmış Şəhərlər Assosiasiyasına dəstəyini bildirib.

HR 220 nömrəli qətnamə 2011-ci il fevral ayının 25-də qəbul edilib. Sənəddə deyilir ki, Hyustonda yaşayan azərbaycanlıların sayı artır və onlar şəhərin iqtisadiyyatına töhfələr verir, Texas ştatının enerji sənayesinin gücləndirilməsinə öz bilikləri və səyləri ilə bölüşürərək kömək edir, habelə ştatın və şəhərin siyasi həyatında fəal iştirak edir.  Qətnamədə Amerika azərbaycanlılarının ştatın çoxmillətli icmasına mühüm töhfələr verdiyi qeyd edilir.

Skot Hokberq  Texasın Nümayəndələr Palatasında 1993-cü ildən Hyuston şəhərini təmsil edir. O, Nümayəndələr Palatasında İctimai Təhsil komitəsinin həmsədridir. 2007-ci ildə cənab Hokberq Texas ştatının 10 ən yaxşı qanunvericisi siyahısında göstərilmişdir.

Texas ştatının qanunverici orqanında qəbul edilmiş qətnamə ilə aşağıdakı linkdə tanış ola bilərsiniz.

http://www.legis.state.tx.us/tlodocs/82R/billtext/pdf/HR00220F.pdf#navpanes=0

Martın 17-19-u Vaşinqtonda Türk Amerika Milli Liderlik konfransı keçiriləcək. ABŞ- da fəaliyyət göstərən iki ən böyük türk təşkilatının sponsorluq etdiyi konfransa ABŞ azərbaycanlılarının şəbəkəsi USAN da dəvət edilib. Konfransda əsas diqqət Amerikadakı türk icmalarının fəaliyyətinin ABŞ və Türkiyə arasında münasibətlərin möhkəmləndirilməsinə xidmət edəcək bir şəkildə qurulması məsələsinə yönələcək. İki gün keçiriləcək iclaslarda ABŞ-dakı türk təşkilatlarının problemləri və onların fəaliyyətinin istiqamətləri müzakirə ediləcək. Tədbirdə Türkiyənin Avropa İttifaqı məsələləri üzrə xüsusi nümayəndəsi Egemen Bağış, ABŞ Konqresində Türkiyə üzrə işçi qrupunun həmsədri Virciniya Foks, aparıcı elmi-tədqiqat institutlarının ekspertləri, türk və Azərbaycan təşkilatlarının icraçı direktorları məruzələr edəcək.  Tədbir çərçivəsində türk təşkilatlarının nümayəndələri təmsil olunduqları ştatların Konqresdəki nümayəndələri ilə görüşəcək.

Konfransla bağlı ətraflı məlumatı aşağıdakı linkdə tapmaq olar:

http://www.ataa.org/

ABŞ-ın Merilend ştatının Montqomeri əyalətində 2011-ci il mart ayı Azərbaycan İrsi ayı elan edilib.  Əyalətin icra hakimiyyətinin başçısı Ayze Leggett bununla bağlı sərəncam imzalayıb. Sənəddə Azərbaycanın şərqdə ilk müstəqil müsəlman respublikası və müsəlman şərqində qadınlara səsvermə hüququnun verildiyi ilk ölkə olduğu qeyd edilir. Burada deyilir ki, Qafqaz regionunda mədəniyyətin beşiyi olan Azərbaycan şairə Xurşud banu Natəvan və bəstəkar Üzeyir Hacıbəyov kimi sənətkarlar yetişdirib. Sənəddə həmçinin Azərbaycanın ABŞ-ın strateji müttəfiqi olduğu bildirilir. Sərəncamda azərbaycanlıların ABŞ cəmiyyətinə verdiyi töhfələr göstərilir, Kaliforniyanın Berkli universitetinin doktoru Lütfü Zadənin adı qeyd edilir.

Sərəncamla aşağıdakı linkdə tanış ola bilərsiniz:

http://karabakhfoundation.org/assets/305/Montgomery_County_Azerbaijani_Heritage_Month_Proclamation.pdf

2011-ci ilin mart ayının Azərbaycan İrsi ayı kimi tanınması təşəbbüsü ilə Vaşinqtonda fəaliyyət göstərən Qarabağ Fondu çıxış edib və Montqomeri icra hakimiyyətinə bununla bağlı müraciət edib. Yaxın günlərdə əyalətin mərkəzi olan Rokvil şəhərində icra başçısı Ayze Leggetin iştirakı ilə mart ayının Azərbaycan İrsi ayı elan edilməsi ilə bağlı mərasim keçiriləcək.

Merilend ştatının Montqomeri əyaləti paytaxt Vaşinqtonun ətrafında yerləşir.