Astrit Lulushi, Zëri i Amerikës
Rreth 10 deri 15 për qind e njerëzve në botën e industrializuar vuajnë nga zhurma kronike, një tingëllim konstant metalik dhe shumë shqetësues në vesh. Shkencëtarët e lidhin këtë gjendje me përdorimin e telefonit celular. Të folurit shumë në telefon celular mund të shoqërohet me dyfishimin e rrezikut që personi të preket nga tingëllimi kronik në vesh, thuhet në një studim që u botua kohët e fundit në revistën Shkenca mjedisore. Tingëllimi kronik është një term i përdorur për zhurmën e vazhdueshme në vesh por që nuk vjen nga ndonjë burim i jashtëm.
Rezultatet e studimit treguan se pacientët të cilët kishin përdorur një telefon celular ishin 37 përqind më në rrezik për t’u prekur nga tingëllimi kronik, në krahasim me personat që nuk kishin përdorur telefonë celular. Personat që kishin përdorur telefonin e tyre 10 minuta në ditë kishin 71 përqind gjasa që të prekeshin nga tingëllimi kronik. Rreziku ishte edhe më i lartë për personat që e kishin përdorur telefonin celular më shumë se 4 vjet. Studimi le të kuptohet se tingëllimi kronik në vesh është bërë më i përhapur gjatë 10 vjeçarit të fundit, duke afektuar deri 15 përqind të njerëzve në vendet e industrializuara. Tingëllimi kronik mund të krijojë shqetësime të mëdha në jetën e përditëshme. Për këtë çrregullim nuk ka ndonjë kurë.
