Astrit Lulushi, Zëri i Amerikës
Ndërsa truri zhvillohet, edhe lidhjet e neuroneve ndryshojnë. Shkencëtarët thonë se tani mund t’i shohin këto lidhje nëpërmjet një skanimi me MRI, siç quhet shkurtimisht aparati i Imazheve me Rezonancë Magnetike. Nëpërmjet imazheve, shkencëtarët mund të dallojnë ndryshimet në të gjithë rrjedhjen e gjakut në tru, dhe mënyrën sesi pjesë të ndryshme të trurit punojnë së bashku. Studimi u kryesua nga doktor Bradley Schlaggar, neurolog pediatrie në Universitetin e Uashingtonit në Saint Louis, Misuri. Në studim u përfshinë 238 individëve nga mosha nga 7 deri në 30 vjeç.
Nëpërmjet skanimit, u analizuan rreth 13 mijë imazhe dhe u përzgjodhën 200 imazhet më të mira. Nëpërmjet tyre, shkencëtarët arritën të përcaktojnë shkallën e pjekurisë së trurit tek personat në moshë të caktuar.
Fëmijët zakonisht shkojnë në zyrën e mjekut pediatër, ku u matet gjatësia, pesha trupore, madhësia e kokës, dhe mjeku harton tabelën e rritjes së strukturës fizike. Por tani nëpërmjet imazheve, mjekët janë në gjendje të masin lidhjet funksionale dhe të krijojnë një tabelë a indeks që mund të përdoret si bazë krahasuese a pikënisje për matjen e zhvillimit të trurit për pacientë të tjerë. Pra, kur tek një person, p.sh. 10 vjeçar, imazhet tregojnë se lidhjet funksionale janë në nivelin e një 7 vjeçari, kjo mund të jetë një tregues se diçka nuk shkon mirë në zhvillimin e fëmijës.
Dr. Schlaggar thotë se studimi rreth skanimit të trurit u jep mjekëve një mënyrë shumë më të saktë për të vlerësuar zhvillimin e trurit të fëmijëve. Studim u botua këtë javë në revistën Shkenca.
