Astrit Lulushi, Zëri i Amerikës

Para pak ditësh, në një konferencë të mjekëve onkologë në Çikago, shkencëtarët paraqitën studime rreth dy ilaçeve të reja, Vemurafenib dhe Yervoy. Ata thonë se ilaçet nuk e kurojnë Melanomën, por zgjasin dukshëm jetëgjatësinë e pacientëve të prekur nga ky kancer vdekjeprurës. Rezulatet e studimeve u botuan edhe në faqen internetike të revistës mjekësore të Nju Englandit.

Në njërin studim, ilaçi eksperimental Vemurafenib tregoi efekte shumë të shpejta pozitive tek personat me shkallë të avancuar kanceri në lëkurë. Ilaçi Vemurafenib synon të godasë një gjen të ndryshuar (mutacion), që gjendet në 50 përqind të të gjitha llojeve të Melanomës. Ilaçi Vemurafenib është zhvilluar nga firma Genentech and Plexxikon. Në një njoftim në Twiter, zëdhënësit e kësaj firme me bazë në Kaliforni thonë se dalja në treg e ilaçit të ri varet nga vendimi që do të marrë agjencia federale për kontrollin e barnave (FDA).

Studimi i dytë provoi ilaçin Yervoy të prodhuar nga firma Bristol-Myers Squib. Ky ilaç u miratua në muajin mars për pacientët e sapo diagnostikuar me melanoma. Yervoy përdoret si terapi për sistemin imunitar të pacientëve.

Ekspertët thonë se ilaçet e reja nuk përbëjnë kurë për Melanomën. Por doktor Lynn Schuchter i Universitetit të Pensilvanisë, i tha the Associated press,- se Vemurafenib dhe Yervoy krahas lehtësimeve që u sjellin pacientëve, përdoren edhe si bazë a pikënisje për zhvillimin e barnave më të suksesshëm. Sipas shoqatës amerikane të kancerit, vitin e kaluar, kanceri melanoma morri jetën e 8 mijë e 700 amerikanëve, ndërsa numrit të personave me këtë sëmundje gjatë vitit 2010, iu shtuan edhe 68 mijë të tjerë, burra e gra.