Astrit Lulushi, Zëri i Amerikës

Kompania farmaceutike Glaxo Smith-Kline, ka një problem të madh me autoritetet – ajo akuzohet që se u ka dhënë mjekëve ryshfete për të shitur barnat e saj.

Autoritetet thonë se firma Glaxo Smith-Kline ka shkelur ligjin, pasi u ka ofruar mjekëve pushime në Hawai, bileta për koncerte të Madonës dhe udhëtime gjahu fazanësh në Evropë, me kusht që t’u shisnin pacientëve barna të kësaj kompanie. Prokurorët federalë thonë se me këto veprime, firma Glaxo Smith-Kline ka vënë përfitimet përpara sigurisë së shëndetit të njerëzve, duke ndërmarrë fushata për reklamime barnash që nuk janë provuar si të efektshme.

Ndër akuzat përfshihen
– Shitja e ilaçit Paxil për trajtimin e depresionit tek pacientët nën 18 vjeç, edhe pse Administrata e Ushqimeve dhe Barnave (FDA) kurrë nuk e ka miratuar këtë ilaç për përdorim tek fëmijët. Glaxo Smith-Kline e bëri këtë, pavarësisht se ka të dhëna se Paxil mund nxitë mendime për vetëvrasje mes të rinjëve.

– Shitja i ilaçit Wellbutrin për të humbur peshë dhe trajtim të impotencës – pavarësisht se ky ilaç kurrë nuk është miratuar për këtë qëllim.

– Reklama të fuqishme për ilaçin Avandia kundër diabetit – por pa i treguar Administratës së Ushqimeve dhe Barnave rezultatet e studimeve që Glaxo Smith-Kline ka kryer dhe që tregojnë se Avandia mund të shkaktojë goditje në zemër.

Doktor Steven Nissen i Klinikës së Klevelandit thotë se nëse mjekët do t’a kishin ditur se këto të dhëna nuk i ishin dërguar Administratës së Ushqimeve dhe Barnave, ata nuk do t’ia kishin rekomanduar Avandian pacientëve të tyre.