Astrit Lulushi, Zëri i Amerikës
Për herë të parë, shkencëtarët kanë gjetur prova se një kimikat në tru i quajtur glutamate është i lidhur me sjelljen vetëvrasëse. Kjo ofron një shpresë të re për përpjekjet për të parandaluar njerëzit nga marrja e jetës së tyre. Glutamate është një amino acid që dërgon sinjale mes qelizave nervore dhe ka qenë prej kohësh një i dyshuar në kërkim të shkaqeve kimike të depresionit.
Studimi i botuar në revistën Neuro-psycho-pharmacology, thotë se një ekip ndërkombëtar shkencëtarësh në fushën e psikiatrisë eksperimentale kanë gjetur provën e parë se glutamate është më aktiv në trurin e njerëzve që përpiqen për vetëvrasje.
Kjo gjetje është e rëndësishme sepse tregon ekzistencën e një mekanizmi, por edhe sepse ofron një këndvështrim të ri për trajtimin e depresionit dhe vetëvrasjes. Për trajtimin e depresionit, shkencëtarët janë përqëndruar në një neuro-transmetues të quajtur serotonin, por pa shumë rezultat. Prandaj edhe studimi thekson se është e nevojëshme që fokusi në trajtimin e depresionit tani duhet të kthehet tek glutamate.
Autorët gjithashtu shpjegojnë përse studimet e mëparëshme e kanë parë inflamacionin në tru si një faktor rreziku për vetëvrasje. Ata gjetën se personat që tentojnë vetëvrasje kishin mbi dy herë më shumë acid quinolinic në lëngun e shtyllës kurrizore, dhe se trupi prodhon acid quinolinic si pjesë e përgjigjes imune ndaj inflamacionit.
Barnat anti-glutamate janë ende në zhvillim, por së shpejti mund të ofrojnë një mjet premtues për parandalimin e vetëvrasjes. Në fakt, studimet e fundit klinike kanë treguar se metoda ketamine anestezion – e cila pengon dërgimin e sinjaleve glutamate mes qelizave nervore të trurit – është jashtëzakonisht efektive në luftimin e depresionit, edhe pse efektet e saj anësore e parandalojnë të përdoret gjerësisht sot.
Autorët e studimit thonë se mjekët duhet të jenë të vetëdijshëm se inflamacioni në tru është shkas i mundshëm për sjellje vetëvrasëse. Në të ardhmen, nga mostrat e gjakut të marra nga pacientët me inflamacione në tru mjekët mund të zbulojnë herët dhe të parandalojnë gjendjet depresive që i shtyjnë njerëzit në vetëvrasje. Prandaj është e rëndësishme që mjekët e kujdesit parësor shëndetësor dhe mjekët psikiatër të punojnë ngushtë së bashku për këtë çështje, thuhet në studim.
