Astrit Lulushi, Zëri i Amerikës
Kanceri pankreatik është një sëmundje tepër e rrezikshme. Më pak se 5 % e pacientëve jetojnë jo më shumë se 5 vjet pas diagnostikimit.
Zbulimi i hershëm i këtij kanceri mund të rrisë edhe shanset për mbijetesës. Por problemi është se zakonisht kanceri pankreatik nuk ka simptoma të hershme paralajmëruese dhe aktualisht nuk ekziston as ndonjë analizë për zbulimin e tij në fazën fillestare.
Tani një grup studiuesish japonezë kanë zhvilluar një teknikë të re shkencore që rrit shanset e zbulimit të kancerit në pankreas në fazë të herëshme duke përdorur një analizë gjaku, e cila mund të bëjë dallimin mes qelizave kanceroze dhe atyre normale.
Teknika e re, e quajtur “analiza metabolomik”, studion prodhimet metabolike të qelizave. Shkencëtarët zbuluan se qelizat e kancerit prodhojnë molekula dhe proteina në sasi të ndryshme me ato që prodhojnë qelizat normale. Nga 159 molekulat që morrën në shqyrtim, përfundimisht, shkencëtarët arritën të përcaktonin deri në 4 molekula që, të marra së bashku, treguan shenja të kancerit.
Modeli i ri matematikor rriti shanset e zbulimit të hershëm të kancerit pankreatik në katër prej pesë e pacientëve (78 %) që iu nënshtruan analizës së re. Kjo është një përmirësim në krahasim me analizën ekzistuese të gjakut, e cila mund të zbulojë vetëm 55% të kancereve.
Ekspertët thonë se analiza duket të jetë premtuese, por teknika është ende e re dhe nuk është gjerësisht në dispozicion në laboratoret spitalore.
