Astrit Lulushi, Zëri i Amerikës

Jill Anderson po përgatitet për një operacion të rrallë plastik. Mjekët do të përdorin dhjam e yndyrna nga kofshët e saj për rritjen e gjinjëve të saj. Pra asgjë artificiale. Dhe pas operacionit, Jill shpreson se do të ndjehet “natyrale dhe e bukur njëkohësisht”. Doktor Bart Rademaker i kirurgjisë plastike thotë se Jill Anderson është një nga të parat në Tampa të Floridës që do të propvojë këtë teknologji e zhvilluar nga firma Cytori. Me anë të teknikës së re, mjekët janë në gjendje të veçojnë qelizat embrionale nga dhjami dhe yndyrnat në kofshët e saj. Procedura zgjat rreth 3 orë. Mjekët veçojnë rreth 100 milionë qeliza embrionale nga dhjami dhe yndyrnat e pacientes dhe i transplantojnë ato në të dy gjinjtë e saj. Për pacienten, fakti që rritja e gjirit në këtë rast kryhet me material natyral nga vetë trupi i saj, e bënë atë të mos e shohë këtë rritje si artificiale. Ndërsa për mjekësinë, ky rast është zhvillim, inovacion që hap rrugën për “çudira” të reja.