Astrit Lulushi, Zëri i Amerikës
Një studim i botuar në Revistën Alergji Klinike dhe Eksperimentale zbulon se ekspozimi i fëmijëve ndaj qenve dhe maceve nuk shton rrezikun e prekjes nga alergjia e kafshëve dhe nga alergjitë e zakonëshme në vitet më vonë.
Në studim u përfshinë mbi 550 persona, të gjithë 18 vjeçarë, djem e vajza, gjendja shëndetësore e të cilëve ishte vëzhguar që nga dita e lindjes.
Studimi arrin në përfundimin se të mbash një qen ose një mace në çdo moshë të fëmijërisë dhe për cfardo gjatësie kohe nuk shton aspak rrezikun e prekjes nga alergjia e kafshëve. Në fakt rreziku i alergjisë u pakësua 50 përqind tek djemtë që kishin pasur qen gjatë viteve të fëmijërisë dhe tek të gjithë të tjerët – djem e vajza pjesmarrës në studim – që kishin pasur mace gjatë viteve të para të jetës së tyre. Studimi u krye nga shkencëtarë të spitalit Henry Ford në Detroit të shtetit Miçigan.
