Astrit Lulushi, Zëri i Amerikës
Ka lajme shqetësuese rreth një lloji të ri kanceri në gji.
Një studim i kohëve të fundit sjell më shumë të dhëna për një lidhje të fortë gjenetike të kancerit të gjirit, duke e bërë diagnostikimin një çështje të ngutëshme familjare.
Gjenet BRCA1 dhe BRCA2 i përkasin një grupi gjenesh që njihen si “mbytës tumori”. Por mutacioni ose ndryshimi i këtyre gjeneve lidhet me kancerin e trashëguar të gjirit.
Rreziku i një gruaje për zhvillimin e kancerit të gjirit rritet shumë në qoftë se ajo trashëgon një mutacion të dëmshëm BRCA.
Studimi i botuar në revistën mjekësore “Cancer” tregon se nëse një grua zhvillon një gjen të ndryshuar BRCA në një moshë të caktuar, të afërmit e saj femra të brezit pasardhës mund të preken nga kanceri i gjirit 8 vjet më herët sesa ajo.
Autorët e studimit zbuluan se;
– Brezi i parë i grave në studim që kishin gjen BRCA të ndryshuar, ishin diagnostikuar me kancer në gji në moshën 48 vjeç.
– Mosha mesatare e diagnostikimit të kancerit të gjirit në brezin e dytë ra në 42 vjeç.
Bazuar në këto rezultate, autorët e studimit ri-afirmojnë këshillat e rrjetit kombëtar të Kancerit, që janë;
Kryerja e analizave dhe kontrollit për kancer në gji 5 deri 10 vjet më herët sesa mosha kur një paradhëse e brezit më të moshuar brenda familjes ishte diagnostikuar me kancer që lidhet me gjenet e dëmshme të ndryshuara BRCA.
