Astrit Lulushi, Zëri i Amerikës

Në ç’mënyrë truri i kombinon informacionet që i dërgojnë shqisat e tjera? Në psikologji e neuroshkencë kjo është një pyetje ‘klasike’, mbi të cilën një studim nga Instituti Karolinska në Suedi përpiqet të hedhë dritë. Studimi, në revistën Current Biology, tregon se imagjinata ndikon më shumë sesa mendohej në mënyrën se si njeriu e përjeton botën.

Eshtë thënë se imagjinata dhe perceptimi janë të ndarë, por sipas studimit imagjinimi i një zëri ose forme mund të ndryshojë mënyrën sesa njeriu e percepton botën njësoj sikur tingulli dhe forma të jenë realë.

Gjatë studimit, neurologët kryen një seri eksperimentesh duke vëzhguar veprimtarinë e trurit, përfshi rastin kur pjesmarrësit përjetuan iluzionin e përplasjes së dy objekteve, dhe imagjinuan zhurmën.

Shkencëtarët thonë se rezultatet e studimit mund të jenë të dobishme për kuptuar përse truri dështon të bëjë dallimin midis idesë dhe realitetit në disa çrregullime psikiatrike të tilla si skizofrenia. Një sferë tjetër e dobishme, që studimi mund të nxisë kërkime, është fusha kompjuterike, ku imagjinata e individëve të paralizuar përdoret për të kontrolluar pajisjet virtuale dhe artificiale.

Autorët thonë se ky është grupi i parë i eksperimenteve që përfundimisht synojnë të përcaktojnë se sinjalet shqisore të krijuara nga imagjinata janë mjaft të forta për të ndryshuar perceptimin e krijuar nga një shqisë tjetër.