Astrit Lulushi, Zëri i Amerikës

Një formë e re terapie me rrezatimit shton gjasat për një jetë më të gjatë për ata që luftojnë me kancerin e mushkërive. Mjekët kanë eksperimentuar një trajtim jo-kirurgjik të këtij kanceri. Gjatë procedurës, tumori goditet me një numër shumë të vogël dhe shumë të përqëndruar rrezesh të fuqishme; çdo tumor goditet 1 deri në 5 herë. Shkalla e suksesit ofron shpresa për pacientët që kanë qeliza jo të vogla të pa-operueshme kanceroze në mushkëritë e tyre.

Gjatë studimit, 55 pacientë u trajtuan me procedurën e re me rreze. Prej tyre, vetëm 1 pacient pati një përsëritje të tumorit kryesor. Kjo tregon se në afro 98 përqind të rasteve tumori kryesor u vu nën kontroll për rreth  tre vjet pas terapisë. Pas tre vjetësh, më shumë se gjysma e pacientëve në studim, 56 përqind, vazhdonin të jetonin. Gjithashtu, efektet anësore me këtë terapi të re ishin më të pakta sesa në trajtimet me terapi të tjera.