Astrit Lulushi, Zëri i Amerikës
Keqpërdorimi i steroideve anabolikë është i paligjshëm, por një studim tregon se përdorimi i tyre është edhe më i rrezikshëm sesa mendohej më parë. Studimi i kryer nga shoqata e sëmundjeve të zemrës, tregoi se përdorimi për shumë kohë i steroideve mund të dobësojë zemrën. Steroidet anabolike janë imitues të testosteronëve; hormon që krijon muskuj dhe nxit karakteristika mashkullore. Studiuesit krahasuan një grup peshë-ngritësish që merrnin rreth 675 miligram steroide në javë për 9 vjet dhe një grup tjetër po peshë-ngritësish që nuk merrnin steroide. Shkencëtarët zbuluan se ana e majtë e zemrës tek personat që merrnin steroide ishte më e dobët dhe si rrjedhim pompimi i gjakut në të kryehej me vështirësi. Tek personat që nuk merrnin steroide, zemra punonte normalisht. Vështirësitë në pompimin e gjakut mund të bëhen shkak për probleme në zemër përfshi ndalimin e saj. Deri tani pasojat e steroideve në zemër nuk kanë qënë mjaft të qarta, kryesisht sepse steroidet filluan të përhapen në vitet 1980 dhe shumë përdorues nga ajo kohë tani kanë arritur në moshë kur problemet e zemrës bëhen më të dukëshme.
