Astrit Lulushi, Zëri i Amerikës
Udhëzimet në etiketat e shumë barnave nuk përfshijnë informata mbi dozat për fëmijë. Për këtë arsye fëmijët shpesh quhen “jetimë terapeutikë”.
Një studim botuar në revistën e shoqatës amerikane të mjekësisë (JAMA) thotë se – në vitin 2009 – vetëm 46 për qind e ilaçeve përmbanin udhëzimet e duhura se si ato të përdoren për fëmijët.
Fëmijët i metabolizojnë barnat shumë mdryshme nga të rriturit. Për arsye se shumë ilaçe kurrë nuk janë provuar tek fëmijët, përcaktimi i saktë dhe i efektshëm i ilaçit bëhet me hamëndje nga mjeku.
Në këtë mënyrë, fëmijët u nënshtrohen padashje kërkimeve, ndërsa mjekët pediatër provojnë tek ata barnat që janë për pacientët e rritur.
Autorët e studimit bëjnë thirrje për miratimin e ligjeve që të kërkojnë më shumë prova pediatrike klinike të barnave dhe vendosjen e rezultateve të këtyre provave në etiketat e ilaçeve.
