Astrit Lulushi, Zëri i Amerikës

Evolucioni përdor çdo shans që i krijohet për të provuar diçka të re.

Duke hetuar se në ç’mënyrë formohen lulet, shkencëtarë holandezë pranë universitetit Radboud Njimegen, kanë zbuluar se natyra është më e shumëllojshme sesa sheh syri – dhe se gjenet e përfshira në formimin e lules mund të funksionojnë ndryshe në lloje të ndryshme. Pra, evolucioni i përmbahet një sistemi që jep rezultat, por brenda vetë sistemit, vazhdon të përtërihet a ndryshojë.

Deri tani, studimi mbi mënyrën e formimit të luleve është përqëndruar kryesisht në dy lloje; Arabidopsis dhe Anthirrhinum. Por shkencëtarët thonë se kanë në plan të fillojnë shqyrtimin e formimit të luleve në bimë të tilla si domate dhe patate. Duke kuptuar rregullin e formimit të luleve, ata mund të jenë në gjendje edhe t’a manipulojnë atë duke i bërë bimët të prodhojnë më shumë, në çdo stinë të vitit ose varietete të ndryshme.