Astrit Lulushi, Zëri i Amerikës

Një lajm shprese për miliona njerëz që vuajnë nga kumbimi i veshëve. Për shumë njerëz, kjo lloj zhurme, e cila nuk vjen nga jashtë, përbën shqetësim të madh. Gjithashtu, shumë trajtime ofrohen, por pak janë të efektshme.

Një studim i publikuar në revistën mjekësore britanike “Lancet” thotë se shkencëtarët trajtuan një grup pacientësh me metoda konvencionale dhe një grup tjetër me terapi njohëse, përfshi seanca këshillimi dhe ekspozimi ndaj tinguj neutralë të jashtëm. Trajtimi ishte një punë e integruar mes audiologëve, psikologëve, terapistëve të të folurit dhe terapistëve fizikë.

Autorët e studimit thonë se rezultatet e këtij trajtimi të integruar ishin jashtëzakonisht bindëse, pavarësisht sesa shqetësues ishte kumbimi në vesh. Ky lloj trajtimi i specializuar e i ndërthurur mes ekspertëve nga disa fusha, thuhet në studim, ishte gjithashtu pa ndonjë efekt të dëmshëm anësor.