Astrit Lulushi, Zëri i Amerikës

Studime të panumërta janë kryer mbi rreziqet për goditje në zemër dhe si të ulen ato. Por si për çdo sëmundje, për të parashikuar goditjet në zemër – shpesh të papritura – mjekëve u duhet një shenjë.

Një ditë – nuk dihet se kur – shkencëtarët thonë se do t’a gjejnë këtë shenjë “magjike” dhe atëherë goditjet në zemër do të parashikohen dhe viktimat do të shmangen – thuhet në një studim të ri.

Ndërsa puna vazhdon, shkencëtarët pranë Institutit Kërkimor Scripps mendojnë se kanë zbuluar një shënje të tillë duke analizuar “qelizat qarkulluese endoteliale” (C-E-C). Ata krahasuan mostra të gjakut të 44 personave të shëndetshëm me mostrat e gjakut të 50 pacientëve të cilët kishin shkuar në urgjencë pasi kishin pësuar goditje akute në zemër. Krahasimi nxorri në pah se tek pacientët me goditje në zemër nivelet e “qelizave qarkulluese endoteliale” ose CEC ishin 4 herë më të larta, ndërsa molekulat e këtyre qelizave – tek po këta pacientë – ishin shumë më të mëdha.

Shkencëtarët nuk vunë re ndonjë lidhje midis CEC-it dhe shenjave të tjera tradicionale diagnostikuese të një goditjeje në zemër – por ata zbuluan një mosfunksionim (dështim) të muskujve të zemrës tek këta pacientë.

Kjo i shtynë shkencëtarët të mendojnë se shenja CEC zbulon zhvillimin e një procesi themelor -fillestar- që ndodh para shfaqjes së shenjave të tjera tradicionale diagnostikuese të një goditjeje në zemër.

Studimi përfundon se, përveç përdorimit për të diagnostikuar një goditje në zemër, CEC ka shumë gjasa të jetë një “top i kristaltë” i cili një ditë mund të përdoret për identifikimin e një personi në prag të një goditjeje në zemër.